Ваеравы ирийхана Няръяна март’ ӈока’’ мядондина’’ турӈаць. Яндахат’ турта’’ хибяри’’ поӈгана хэвхы округхад’ «Вы’ сейм’» нюбета группа танясь. Ӈокханда таняна сидя юд’ мян хибяри’’ хыно’’ӈа’’. Пирибцяко’’, наныкоця’’ малӈэ’ вадамдо’ мэ’’ӈа’’.

Ӈопой тарця не нацекым’ лаханась ня’’аӈамась. – Мань’ Сэрне Вануйтадм’. Новый портхад’ ӈадм’. Теда Саля’ хойхана тохолкудм’, хоровое пение. Сё’’мэць тоходанадм’, няхарамдэй курс’ пэрӈам’.

Корр: Ханзер’’ тохолкурӈан?

Няръяна маркана музейно-выставочный центр’ харта мята’ таня. Тикы мякана ӈудидо’ мэта’’ хибяри’’ ма’’люрцеты’’, выставка’’ танесеты’’. Таняна ӈод’ хусувэй си’’ив маттамдэй яляхана маркана илена’’ мел’’ не’’ ма’’люрцеты’’.

Хусувэй тенз’ мэта хибяри’’ харто’ вададо’, культурадо’ таня. Тикы’ серм’ хибярир’ нюдякоданда минреда. Вадамда намдурпата лаханась тухуда, сём намдурпата хыно’’та, вадакон’ нюдякоданда инзелебнанда вадаком’ мэта.

Ты’’ ниць’ ирий няхарамдэй толыркана марад’ тер’’ хибяри’’ едэй ӈадимы книга презентациян’ ма’’лэйдаць. Ӈамгэ нямна падвы книга? Тарця книгам’ кандидат исторических наук Марина Коловангина падвы.

«Смысл жизни Александра Выучейского» таремъюв’ нюмдевы. Хибя’’ округханана Александр Иванович Выучейской нись’ ехэра? Теневанида’’ ӈокаць, маркана илена’’ хибяри’’, тикахад’ тыбэртя’’, геолог’’ манзаям’ минрена’’, паднана’’.

Округна этно-культурный центрхана ӈока манзаидо’ теневана нина’’ манзара’’. Таняна ӈод маля ӈока’’ по’’ ямбан Александр Ледков манзаямда минре. Нянэй ненэця’, манзаям’ теневана, вадамда мэсури’’ нида’’ хавраӈгу’’.

Округханана ненэцие’’ вадам’ минрена’’ тохолкодина ханярина манзара’’. Ӈокаювдо’ маля ӈахэт’ ӈацекы’’ тохоламби’’, манзаидо’ сававна теневана’’ хибяри’’.

Тохолкода манзаяда тарця’’, ӈацекы’’ тохоламбава’ хавна харта ӈод’ хусувэй самляӈг по’’ ваерась курсхана тоходансеты. Тикахад’ хуркари’’ танеда конференцияха’’на, манзаяхататто’ перена’’ ма’’лёвахана манзарасьты. Те’’ны похо’’на школахана манзаравахана ӈока ӈамгэ’ теневась’ тара, ӈодьбянда хусувэй тохолкодахана тоходанва сер’ тарасеты.