Вы здесь

Ялумд’’

Ямалкана манзарана’’ депутат’’ сертамбада манзаядо’ тянё нисьты’’ ӈа’’. Хусувэй по’ округханандо’ илена’’ ненэцие’’ нядамбава сер’’ нямна тарана’’ Закон’ ня’’амарпи’’, тикы нямна яханандо’ яӈга ня’’амвы программа’’ манзара’’.

Хусувэй по’ Санкт Петербург маркана «СеЗаМ» нюбета конкурс’ ваерасьты, ханяна паднана’’ хибяри’’ харто’ манзаидо’ манэ’’лабтабасьты’’. Тюку’ по’ ӈод тарця конкурс’ ӈока паднани’’ ма’’лась.

Ӈэрм’ яханана паднана’’ ненэциена хуркари’’ тенз’ поӈгана таня. Мал’’ пыдо’ харто’ вадавнандо’ падна’’. Ханяӈы паднана’’ манзаидо’ ӈарка хибяри’’ е’’эмня таславы’’, ханяӈы яӈга ӈацекы’’ е’’эмня падна’’.

Сян’ масьтыва’’: нянэй ненэця’’ ханярина иле’’. Невхы ватовна таслась, ӈокаювдо’ няхар’ округхана илець – Ненэцие’’ округ, тикахад’ Ямало-Ненецкий, Долгано-Ненецкий округва танясь. Теда лаханая’ ӈод, ненэця’’ тенз’ мэта хибяри’’ невхы илесь’ яханато’ иле’’ма’’.

Тюку ирийна нюртей яляхана ӈармбэй ненэциена ӈарка ялям’ мэ’’ӈаваць. Ӈарка хибярина тарця ялям’ харто’ илӈганандо’, манзаравахандо’ недво’’мы’’ ӈэ’’ним. Мал’’ пыдо’ харто’ ӈэсынандо’ ӈэя, маркана ӈэя манзаравандо’ мальӈгана ныхыдо’ нись’ сяй сававна манзараць.

Яханана ханярина илена’’, хуркари манзаяхана манзарана’’ хибяри’’ манзарась’ тенева’’, ныланась’ тенева’’. Культура’ серкана манзаранина’’ хибярина ныхыдамдо’ ма’’лава’’ е’’эмня хуркари ныланави’’ хамадабсеты’’.

Саля’хардахана «Ямал регион» нюбета телерадиокомпаниядо’ таня, таняна радио’, телевидение’ манзаи’’ пэртя’’ манзара’’. Тикы округандо’ компания, есям’ бюджетхад’ ня’’амарпи’’.

Ӈокханда манзаранито’ толыр’’ няхар’’ юр’’ мян хибяри’’. Сертабада манзаядо’ ӈока, хуркари’’ программы’’ хамандаби’’. Я’мал яда ӈарка, округханандо’ самляӈг’ ёнаркад вата хибяридо’ си’’ив ӈарка маркана, си’’ив район’’ ӈэсыхына иле’’. Хусувэй яхад’ тэвравы юн’’ радио’, телевидение’ манзарана’’ ма’’ламби’’, тикахад’ округандо’ иленаха тэврамбидо.

Тюку по’ ӈарка пэвдэй ирий’ мат’’яӈганя толыркана ненэцие’’ паднана Василий Николаевич Ледков сидндет ю’’ пода пангусь. Тарця ялян’ паднана нява тенена’’ хибяри’’ хамяку’’. Маня’’ ӈани’ няна’’ манзаи’’ газетанана падбина’’. Нюртей падбадава’’ повесть «Нярмодана хубта».

Маля сян’ по’’ ямбан хор’’ ирийва хэбидя яля’ нэмбида. Россиянана ӈармбэй хибяри’’ яляӈэ’ таславы. Тикы яляхана ӈарка няха’’на’’ сейхад’ ӈэда’’ вади’’ мэцьтыва’’, пыдо’ е’’эмняндо’ мядонзэйм’ хамадабсетыва’’.

Вэба’ ирий (сентябрь’) 26-28 толырка’’на Мордовия Республика Саранск’ маркана «Финно-угорский транзит: родственные встречи» фестиваль гала-концерт ӈась. Мале’ матадамдэй по’ тикы фестиваль финно-угорской’ хибяри’’ явна мюсерӈа.

 

Вэба’’ ирийхана Няръяна маркана мел’’ хибяри’’ ма’’лыць. Округна еркы маркана фестиваль рукотворной куклы ваерась. Тарця ихиня’ сомбой сер’ округна этнокультурный центрхана манзарана’’ нина’’ хамададось.

Тюку ирий’ нюртей яля’’ мальӈгана сян по’’ ямбан ӈарка ялям’ мэцьтыва’’, тикы ӈармбэй хибярина е’’эмня таславы’’ яля’. Тарця ялям’ мэць маля торомава’’. Ӈармбэй хибярина ханярина иле’’.

Округна еркы маркана, хусувэй ӈэсыхына школа’’ таня’’, ханяна тохолкодина ӈацекы’’ тохоламби’’. Пыдо’ саць тарана манзаям’ пэртя’’ хибяри’’. Тикахад’ ханзер’ ӈацекына школахана тоходангу’’ пыдо’ илан’ тарпгуд’.

Сававна тоходанвы’’ ӈацекэр’ нерня тоходанвась’ едтёда, илевамда месури’’ нида’’ мэт. Харта янда е’’эмня харвась манзараван’ харваӈгу. Хусувэй сава серт’ школахана манзарана’’ нина’’ ӈацекы’’ тохоламби’’.

Пыдами тыбэртяӈэ пэрць мань сянакудма, ӈэваханани ӈани’ «сэрако’’ неняӈгарид» поӈгэрӈа’’, тикыт хавна ӈамгэхэрт ӈэвахан вуни мий’’. Мань тикы сэр’’ неняӈгаха’’», хар’’н пыдахан, ӈэвахан неныдм’. Тикыринда ӈод’’ ин ӈу’’ то: «Небяхан юнрахарцюдм’!»

– Пыдар, Василей, ӈамгэ? – небяв пыса. – Мал’ пятанню’’! Сармикахад хунмбасан хыли? Ӈамгэр хадкэ?

– Ниӈэ.

– Са’’лимбада нохо ни тут’’?! – хадами ӈод’’ сэвда сюртявмла.

– Та ни-и, -ӈудам’ хоймлась, мань юнрадм’: – Тикы’’… «сэр’’ неняӈг’’»… мер’ тиӈгуд’’?

Страницы