Тюку ирий’ 24 яляхана Няръяна маркана семейно-родовой община’’ манзаи’’ пэрта’’ ненэця’’ ӈани’’ ма’’люрӈаць.
Тарця хибяри’’ е’’эмня округна’’ администрация’ внутренней политика департаментхана манзарана’’ «Сохранение и развитие коренных малочисленных народов Севера в НАО» программавна’ таславы тоходанавам’ хамадаць. Округна’’ ӈэсыхыт товы’’ ненэця’’ яля’ ямбан маркана манзараць.
Те’ ёльцяӈгана семейно-родовой общинахана манзарана’’ нина’’ нертей ма’’лыць. Округна’’ ерв’’ таня турӈаць, семинар’ манзаравам нэмбиць.
Общинахана манзарана’’ ненэця’’ поӈгана Чукоткахад товы’’ мядонда’’ танець. Сидя хасаваха’ Руслан Куттегин, Антон Тыке Лорино ӈэсыхына илеӈаха’, пыди’ харти’ яхананди’ мале’ ӈахакуна «Лорино» нюбета территориально-соседской общинам ӈадимдевэхэнзь. Ханзер’’ манзаравамдо’ ваде’’ӈадись. Семинаркана лаханана’’ тянё ниць’ ӈа’’, Софья Урун, Санкт – Петербург’ маркад Институт народов Севера нерм’ пэртя вадам мэ’’ӈась. Пыда хэтадась, ханяхад товы’’ ӈацекы’’ таняна тоходана’’, хурка специальность’’ тане, хурка нядмам студент’’ ня’’амарпи’’. Ханзер’’ есяхана яндо’ тер’’ ерв’’ нядамбидо. Тикы’ хавна лаханана’’ ӈокаць, семейно-родовой община манзаи’’ минрена’’ нина’’ ӈока манзаяханандо’ таранам’ намдаць, отчёт’’ сертабавам’ таслабиць.
Тюкумэвахана хамадавы семинаркана минрена манзаито’ нямна семейно-родовой община нерм’ пэртя’’ лаханаць Михаил Валей, «Ямб’ то» община, Анастасия Засухина «Некуця» семейно-родовой община, Светлана Канева «Сияние Севера» нюбета обищинахана манзарана. Пыдо манзаравито’ нямна отчётм’ хамадавыць, хэтадонзь хурка манзаи’’ сертамби’’, ханзер’’ манзара’’, хурка няд’’ми нямарпи’’… Ханзер’’ нерня’ манзаравамдо’ маниедо’, тасалкуць.
Чукоткахад турмы Руслан Куттегин яхананда территориально- соседской община нерм’ пэрта ӈуда’ ӈылы ӈани’’ вадам’ мэ’’ӈась. Пыдо’ ямӈгана хане’’, икана илена’’ ӈаву’’ ханисэйӈэ тэвода’’. Хэтадась ханзер’’ манзаядо’ таславы, сяӈок хибяри’’ таняна манзара’’, ханзер’’ сиддо’ сельской хозяйство’департаментадо’ нядаби. Тикы’ хавна хибяридо’ сэдорава хардахана манзара’’, лэ’’эмна’’ маторанидо’ тане. Харто вадамдо’ , культурамдо’ нерня’ минре’’. Пудана ваеравы семинаркана ӈока серу’’ таслаць.
Тоходанава’ хавна хибяри’’ «Мясопродукты» нюбета акционерной общество’ хардан’ экскурсиян’ тэворӈаць. Таняна манэ’’ӈадось – ханзер’’ ты’’ ӈамзахад хуркари’’ ӈавар’’ сертамби’’, ханзер’’ манзаидо’ миӈа’’.
Тикахад тамна округна’’ музеян’ тэворӈаць, тарця экскурсияхана ӈэсыхыд товы’’ ненэця’’ нылэйдаць, ӈока мэкад ӈамгэм’ таняна манэ’’ӈаць.
Нани’’ семинаран’ нина’’ тюку по’ тамна ма’’лаӈгуд.
Справка «НВ»
Округханана’’ толыродо’ тянё ненэця’ нертей община’’ 2002 похона ӈадимяць. Тюку ялян’ хэтанзь 26 общинаха’’на’’ манзаидо’ минре’’, 12 – тыдо’ пэрта манзара’’, ӈопой общинахана – халям’ ня’’амарпада, 3 – народной промысел’ минрена, тамна ӈопой – ханена’’ община.
