Манзараванда ямбан Роза Ивановна Канюкова ӈока книгам’ ӈацекына тоходанва е’’эмня сертась. Пудана’ няданда нябимдей класс’ «Ненэця вада- ненецкий язык» тохолкова пособиехэна ма’’лавы манзаита поӈгана хуркари’’ тенз’ ненэця’’ вадако’’ таня. Ӈопой тарця вадаком’ нюхута’’ толада’’.
Саць ӈахы похо’’на, саць сеняна сидя няс илевэхэ’. Ӈопойди’ тэта, нябиди’ маӈгбада. Ӈоб’’мэва’ маӈгбада’ ӈано-хан тюмюнда ту хабтёвы. Няханда лэйнана ята’’мамам’ хосаявась то, ман’’ма: – Туми хабты, лэйнана ята’’макодув татан? Едкон терха’.
Тэта мунзи, ӈаворӈа. Маӈгбада я мяд’ сеяхана ну, ӈатена. Тэта нерцирей’’, тёрена: – Ӈамгэн’ харбелын! Тя’ хань’’! Тюкона пэртяр яӈгу!
Маӈгбадакое нянда тёрм’ нида ла’’амда’’, мунзипой’’ мяканда хая. Хури’’ понку’’ яда. Пэдарам’, хойм’ ваярта. Харта нида хамада’’ – паль’’ пэдаран’ еремы. Ныланавась хавдавы пя’ ни’ ӈамды’’. Тыратабэй халя’ ютикэцям’ тюхулӈа. Лэркабт’ вабцм’ намда. Сырӈа – неранда няна ян нюдякоця сихиртяко ну, лахана: – Ӈано-ханатако, халянд ютикэцям’ татар? Халян’ харвадм’. Халякохона мядолабтаӈгун?
Ӈано-ханатанако сихиртякон’ пудана ютикэцямда ми’’ӈа.
Сихиртякор хибярин’ ман’’ма: – Ӈамгэ ир вома? Хибя сит маянда? Маӈгбадако нись харва’’ лахана: – Нив хэтаӈгу’’, хибя си’’ми маяда, вэварахамбидм’. Тув хабты. Пыда епдя ята’’мадув ни та’’. Ӈадьбята ив вэва. Халя’ ютикэцям’ мэхэва сихиртякор ман’’ма: – Нимдя нёр хэтбю’’, харта някун тута. Едкомд тад.
Маӈгбадако едкомда ми’’ӈа. Сихиртяко едм’ мэ, лакри’ сэя. Тад тикэд лакри’ ӈадимя. Хибярин’ едком’ вадасавэй мипи, ма: – Тям’’, мэд, едко епи, мят ӈэсонд’ ла’’амдад. Маӈгбада едкомда мине. Няръяна ята’’махат едко епхама. Едкомда ӈодь’’ мяканда тэврада. Мят’ ни тю’’. Тапхалъй’’. Едкода мантэй’’, тахара. Ята’’макуда ма’’ламба пя. Тикыд ӈамгэсь ӈэбта ни’’ епю’’, ӈудида ни’’ парадамбю’’. Саваркавна сылаб’’, ята’’макуда ненэй есяӈэ хэвы’’. Тикэхэвана маӈгбадако сававна илесь пяда.
Тэтан’ папаконда нямна юн мер’ тэвы’’. Маро тэта ӈока есян’ харбелы’’. Пыда мер-мерувна нямда хо. Няханда юнра: – Мерку’ вадет, ханзер’’ ненэйкуд хояд! Мань ӈока ненэйкон’ харвадм’! Хибя тарця мядонзэйдамд та? Мерку’ лахан’’!
Сава юнм’ намдхава тэтар пэдаран’ парума. Хавдавы пям’ хо, ӈамды’’.Лэркабт’ сихиртяко ӈадимя. Тэта сита парумлаби, тёрена: – Мерку’ епдя ята’’мадув та’’!
Сихиртяко мерривна сэя, мерривна пуня то, ма: – Тям’’, таранамд мэд. Ӈудид нён парада’’.
Тэта сюрба мяканда тэвы’’, сюри тапхалъй’’, мантэй’’. Едкода тахара. Ята’’макуда тянры’’. Я мята Парана. Тыда якэхэд танета хая’’. Тэси’’, мяци’’ тэта хаи. Папакохонда хая, хывна, няханда хусарку: – Ти хурка серт’ еремядм’, ӈамгэхэртаси’’ хаидм’. Си’’ми нядаӈгун? Сидя няс ӈобкана иле пяди’. Тюку тенад илеӈаха’.
Вадакони’ та малда.
