Хусувэй манзаяхана манзарана’’ хибярина харто’ манзаито’ хэбидя яля’’ таня’’. Лекарь’’ ӈарка ялям’ саво ирийхана мэцьтыва’’, ты’’ ялява пилю’’ ирийхана ваерасьты’’, сельской хозяйствохона манзаранина’’ ӈарка яля’ хор’’ ирий нябимдей си’’ив ныланава яляхана ваерасьты’’.

Тохолкода ялява’ ӈобтарем’ хор’’ ирийхана мэцьтыва’’. Тикы ирийна самлязимдей толыркана тохолкодаӈэ’ тарана’’ няха’’на’’ ихид’ ӈэда’’ вадина’’ мэцьтыва’’. Тюку по’ ӈод мэта’’ ирийна самлязимдей толыркана тохолкодина’’ ялям’ мадаваць. Тарця ӈарка яляхана тохолкодаха’ сямянд’ сава вадина мэ’’ӈаваць, сямянд’ тенена’’ тохолкодахана’’ мядонэйсавэй ядсетыва’’, ӈамдэд’ няндо’ тэврабсетыва’’.

Санкт-Петербург’ маркана мат’’ юдимдей по’ тохолкоди’’ тохолкода Мария Яковлевна Бармич иле, ӈока по’’ ямбан Институт народов Севера мякана ӈэрм’ тенз’’ ненэцие’’ ӈацекы’’ тохоламби’’. Пыда тохолабвыда ханярина манзара’’, ханярина иле’’. Ӈокаювдо’ харто’ маля ӈока по’’ ямбан тохолкодаӈэ’ манзара’’. Галина Григорьевна Тайбарей тохолкода. Харта тохолкоданда со’’яма ялян’ стих’’ падвысь. Толэйда’’.

Марьяко неӈэй!

Нехэтэй неӈэй,

Ӈули’’ похобэн,

Канин’ саля’ тер не!

Сеня ӈавнандов

Ӈарка пэ харданэй,

Параӈода’ март’’

Тоходанванзь

Тэри’ хэривэн.

Тохосо’ ӈэсяконд

Ӈарка терда яӈгувы.

Са’’ню яд’’мамдэй

Минаць хаёвэрэй.

Хэхэ’ сата сарёв

Няна’’ сит ядабтавы.

Недам’ сертавэнэй –

Ӈарка ӈэдалавам’.

Ӈыхы’ яха’’наӈэй

Ненэцие’ вадамд

Луца вада’ пирувнов

Теда’’ тю’’у илвэрэй.

Хой’ некоцяӈэ

Няна’’ мэцеян.

Тохолкода’’ нидэй

Нянд тарем’

Манд’’ нида’’ мэй.

х х х

Ида сава хибёв

Яӈгада мин’’ӈаӈэй.

Си’’ив ю’’ сюдбя по’

Ир ӈули’’ латов.

Ӈарка хибёв тарем’

Вадахаракомдов

Ӈабцата мэцьты’’ню’’.

Выӈгы яхананов’’.

Тюку яляханов,

Пэдавако неӈэй,

Ир сава ӈэя,

Нюм’ ялякохонандэй.

Сава нитэй’ поӈгана

Ӈэвакор саӈганая.

Маня’’ ӈани’ мядондава’’,

Сава вади’ ӈули’’ мэтава’’.

Сензкон пили’’

Ӈэрибат тара’’ нивэй.

Ябдако ӈоб’’ нерня’

Иламд’ тяха’’ мэсэй’’.