Вы здесь

Ты’’ саполана ирий

Хойхана те’ ёльцяӈгана тарця ӈэсьты’’

Нара нянэй ненэцие’ яля падаркана ты’’ саполана, варё’ ирыхад пэӈг нив. Сид’’ нямна сылабнанта мале ханяӈы пирця’ сэда’ ӈэва’ мал ниня варё’ ӈадиберӈа’. Янта сяр’ ний ӈарханта сыра ӈэбта ӈод, ялэда янабовна ӈавэд ямбума.

Яра седа’’ нимня хуна’’ тня хоркыця’ яра пэкоця’ тылыба варемту мэ’’ӈа. Тёркосавэй латарць тня ӈамторӈа’. Хурина хорки пирцим тад ер’хая манэб хуркари ӈолькоця тумбэ пэкоця манэт нинав. Ӈацекы тикакоця сянакоданту маламбсятыду. Тад тикад яра ӈэва ниня ӈоб тарем хуркари пэкоця ӈадив ним хаерад юдавы яхана.

Варё ирыхана ханена ненэця мале яӈгоду сыпи, хане та ёльцяӈгана мале ӈэвадаӈг нидам. Нохокоця’ ваӈготиду тай сомбовна сирыби, сидя иры ёльцяӈгана тня мале нит’ ним. Хурина хаерад нув пэвсюм няана сыра ний тари яберырӈа сыранта янабовна ховаӈгава сер.

Мюсерта ненэця нара няна мэтиду тыту’ хадоко’ мюсе янамбована. Хурина  ненэця ӈахакуд теваван харва нидум наранта, тад ӈадиманта танта амгэ толха ӈэвам. Невхы ненэцяӈгат тарць ва’’алад мэцьты: - варё иры ӈэвана ет ханярина ӈэда седа’ ӈэва мал ниня сыранта мер холкаб – ямб нарам пэрӈа. Иры еркана лакри ӈаюмбата – тад ӈадиманта танта ханзо ӈэӈгу, сарё нув’ соховахнанта ӈэӈгу’. Нумта мин пилипон иба ня’’ад мимбнанта – та ямбан сарё ӈэӈгу. Иры ер’ ей ёльцянт нувота ӈэрм ӈэб – та ёльцяӈгана хэ’ етри мунота’, салаба хад тняӈгу. Нара пензя’ мюня тэвасико’ хурид санарӈа’’. Пыдо’ илебей неро’ хабарти’’, неро’ маликэця ӈаворӈа’’. Тэвасико’ сарпяха’’ ненэця еся яӈгокоцидо’, енз’ мярыпи’’.

Варё ирыхана ты’ ӈорта сармик’’ туду ях’ лядурӈа, нохо’, тэваси’, тёнеко’. Пыду мале тад ӈадиманта ирыхана нисерць пэӈгу нидам. Нохокоця’ ваӈгосиду  ӈахакуд ниду’’ нерземба мэла. Хурина нохо иры еракана ваӈгосиду мэлвату – нарма няна нувота вэва ӈэӈгу, пилипон тецяӈгу. Сыра ямбан нохо’ писякоця ваӈготанта си’ ӈэрм няю сядомы ӈэбтананта – танта ядембагу. Хаерад нумгана писяко ваӈотиту мюд ӈадимбату, понкая хаерад няю сядоць тэванта нид палла’ ӈамзебата – сава нувм пэрӈа. Тюку иры ямбан ӈэрм яля соховахнанту ӈэб – ябембада там пэрӈа.

Саполана ирыхана ӈэрм яхнана иба’’ яля’’ навэд тэвыд. Тирсяда нум’’ няра тэри ябере. Ӈарка пэ хой’’ тэри ялине’’. Выӈгы яхако’’ сыра навэд холкана’’, сырада янамбовна пармы. Выӈгана варё ӈадимя.

Раиса Яптунэ падвы