Леонид Васильевич Лапцуй ненэцие’’ паднана. Ёнар’’ хасуюёнар’’ няхар’’ ю’’ нябимдей похона Я’мал няна мюсерта ненэця’’ мякана соявысь. Илеванда ямбан ӈокавна вымна мюсерӈась, нянэй ненэцие’’ мят’ ӈока тэвормысь.
Ёнар’’ хасуюёнар’’ самляӈг ю’’ тетимдей похона Саля’хард маркана медицинский училищем’ ёльцевысь, тикы’пуд сидя по’’ ямбан Москва’ маркана ЦК ВЛКСМ Высшей комсомольской школа’ журналистика отделенияхана тоходанась, тикахад’ тамна ЦК КПСС Высшей партийной школам’ ёльцесь. Тоходанвамда манзараванда поӈгана минредась. Тамальӈгана пыда ямальский районхана комсомолкана манзарась, тикахад’ ӈани’ падар манзаям’ пэрмысь. Теда маня’’ Леонид Лапцуй паднанаӈэ’ теневава’’. Паднава серм’ нянэювна ёнар’’ хасуюёнар’’ самляӈг ю’’ нюртей поход’ пэрӈадась. Тамальӈгана падвы’’ манзаида ненэця’’ вадахад’ луца’’ вадан’ падвыць, «Урал», «Дружба народов» журналкана, «Сибирские просторы» альманаххана, ӈани’’ сборникхана тарпурӈаць. Тюмень’ маркы издательствона ненэця’’ вадавна падвы сидя книгада ӈадимяханзь – «Цвети, мой Ямал», «Рассказы о Ямале». Илеванда ямбан Леонид Лапцуй падвы’’ манзаида маля ӈока.
Нянэй ненэця’’ паднана’’ поӈгана Леонид Василеьвич Лапцуй мэбета паднанась. Тюку ялян’ лаханась пыда ӈэрм’ тенз’ мэта’’ ненэцие’’ ихиня’ иле’’. Падвы манзаида ӈацекына школахана толабидо, тохолабидо. Лапцуевский чтения яля’’ хусувэй по’ Я’мал яхана танесеты’’. Ӈацекы’’ падвэмнанда конкурс’’ мэцьты’’.
Леонид Васильевич мер’’ яӈгумась, 1982 похона сейда ныклёвысь. Няхар’’ юкад’ вата по’’ ваера’’. Саля’ хард маркана сюры.
Паднана яӈгумахад’ манзаямда’ нерня минренаӈэ’ пухуцяда Елена Григорьевна Сусой тара. Тикы не’ хасаванда падвы’’ манзаи’’ ӈобт’ ма’’лась книгаӈэ’ сертабида’’. Леонид Лапцуй яӈгу’’махаданда сян едэй книгада тарем’ тарпыць. 1994 похона Я’мал еркы маркана паднанана музей-квартира ӈадимясь. Леонид Васильевич илевы мядм’ литературный музейӈэ’ сертадось. Таня турта’’ хибяри’’ ӈока ӈэсьты’’. Школахана тоходанна ӈацекы’’ урокдо’ мэ’’мась турцеты’’. Тюку по’ тарця музей ӈади’’мяхад’ сидя ю’’ поӈэ’ хая. Тарця яляхана Леонид Лапцуй тенена’’ хибяри’’, маркана илена’’ ненэця’’ музей-квартирахана ма’’лыць. Паднана нямдо’ тензебтець, падвы’’ манзаида толабиць. Леонид Васильевич Лапцуй теневавы’’ хибяри’’ ӈока ихид’ миндя вади’’ мэ’’ӈаць.
