Вэба ирыхад пода мале селбита няю сюрхаледа.Танта ваера. Хусувэй яля’ тавна хув’ тецьдя’’ сах’’ ворӈа. Неро’ вэба’ мерця’ сер’ сарё тэсдаре’ ян’ тэсна’ то’’олха’’. Хохорэй иры пуданахна мале янта’’ серма тахруваӈэ ханӈа, ӈув’ янамбовна хаӈга.
Сывы ялэда’ навэд тальня миӈа’’. Сисако’, либирёко’, тохотабцо’ ӈэдакы мале’’ сеня’’ ӈана я’’ ӈыл лыӈгарэйдаць’. Я’’нийм’ вэба Иры пуданахна янабовна сыра тонтаба пяӈгуда. Выӈгана вадёдана пюӈгкоця, нерокоця, паёкоця мале ӈана вэбаси’’ вэрцорта, сыра панэдамдо ӈатена толха’’.
Тюку ирыхана тюмна мюсярта не’ хурина ӈувонзь ядерӈа. Сыра ямбан мэманта пивиту’ ӈумт ныдпа варемту мэӈа, тад тикад ӈум’’ пэӈададу сяропи ӈоб мят ӈамтхая. Пихна навэд тецьхамя, неро’, пиӈгкоця вэбиту янамбовна хаморӈа. Ет хурина сырап янта сяр ний мале ӈарханта тасихэйӈэ ханӈа вэба ирыхана. По’’ тенӈгана выӈгана ӈэда тохна, яха’ мюня ӈобкад поӈгарта ненэць, ӈаманта халядаду хадаба варемту мэта. Иры пуданавахана мале неро ӈарханту вэбасяламтама, яда мале хаӈгу нив.Вэба ирыхана ӈармы’ ненэця тад ӈадиманта яля амгэ’’ толха ӈэвам тарем вадесятыдо: нув’’ сёрхана минюй иры нярмореӈэ ӈадимпата –мер саримта. Нув нярам яля ямбан синтабавы пойда’, паридена тир’’ лакри лядоб’’нанту – тебтад няна сава нувм’’ пэрӈа.
Вэба иры сусава ёльцянт тудако’ выӈгана тамна ӈока ӈэб мер ни сыримт. Лакри мяд хэвувна тэва савак сыра лэморако’ хаерад яляна сялкаптыраць саналаб тадри Саре яля тута’. Пи’ сарма ӈоб тарем пэвсюм няана сюдартадрев мяд сарва ни ӈамторма ӈани вэва, тецьдя, Саре ялям пэрӈа.
Тюку ирыхана хуркари я’’ сармик тованта сыран ӈоб тарем ӈахкуд хамекурӈа. Нинававна нохо писяко ваӈготадамта сертапа варемта мэӈа. Хурина тарем сырап писяко ваӈготанта си’’ ӈэрм няю сядопата – сырада иба ӈэӈгу, хаерад няю ӈэбнанта- тецьда, ӈэрм сырам пэрӈа. Вэба ирыхана вымна ядерма сер тарем сыраб хуркари пися’’ тэнз ваӈготиту мю’’ ӈуво’’ ӈокая’’вана тэбаданту манэб – ӈоб тарем ӈэрм сыран ӈанэкурӈа. Вэба Иры пуданахна тэвасико мале тарта сэрӈэ хэва пода мер сыримта. Я’ сяр’ ниня иленя’’ ӈамгэкоця’’ ӈоб’’ ян’ хасерӈгалыд’’.
Вэба Иры ямбан хабто, иба ялэ соховахнанту ӈэб – селбида ямб ӈэӈгу, мер ни сыремт. Иры сусава ёльцянд паё’ вэбиту’ тамна переб – сырада мер ни хамаӈгу. Хурина селбя няана ӈодя ӈоковна вадёб, тадако тянё ӈэб – тованта сырада тецьяӈгу.
Вэба ирыхана хора’ нямтоду’ селдюрӈа, ӈарханту лэӈэ яльне. Хурина тыӈ нямтоду’ пон нибнанту селдюр – селбя няана нувода саре ӈэӈгу, сер пода нидя ӈгу, сырада мер ни хамаӈгу.
