Округна этно-культурный центрхана манзарана’’ нина’’ ӈарка манзаи’’ сертаби’’. Ӈэрм’ яхана илена’’ хибяри’’- нянэй ненэця’’, ӈысма’’, устьцилём’’ харто’ культурамдо’ тю’’увку минрева’’ е’’эмня манзара’’.
Хуркари’’ коллектив’’ таня’’. Таня турта’’ хибярина’’ ӈобкана ма’’лёсь сё’’ мэцьты’’, тарабцодо’ манэ’’лабтабасьты’’. Пыдо’ масьтевы’’ манзаидо’ хуркари’’ фестивалькана маниесьтына’’. Теневана’’: «Сава сё», «Мел’’ манзарана’’», «Печорянка», ӈока хибяри’’ ма’’лабсеты’’. Тарця ма’’лёви хибярина ӈатесетыдо’.
Этно-культурный центрхана манзаранина’’ манзаидо’ пилибт’ несэюмдабсетыдо’, ибедорцеты’’: хурка несэй ӈамгэм’ хибярихи’ манэ’’лабтава е’’эмня хамандась, ӈамгэ несэй ӈамгэм’ сертась. Тюку по’ округханана этно-культурный центрхана манзаранина’’ научно-практической чтения хамандаць. «Мужчина в традиционной культуре» таремъюв’ нюмдевы ма’’лёвам’ нюртеймэвна ма’’лаць. Хойхана мюсерта’’ хасава’’ харто’ нюдо’ нюдякоходандо’ хасави’’ пэртя’’ манзаяха’ тохолабсетыдо’. Невхэна нянэй мякана вадюданна хасава ӈацекы иринда, нисянда манзаи’’ маниесь янамбовна харта тыбкам’ ня’’амбась, хар’ мэць тоходансеты. Нюдяко хасавако нисянда’ хэвхана нерде ӈацекы ханаком’ сертабась, тем’ паӈгалпась, сянакодамда сертась тоходансеты. Тикахад’ вадюданванда’ сер манзаида’ ӈод ӈарумзеты. Юкад’ вата потаӈэ’ хэсь хасава ӈацекэр’ маля ӈэдалёсь мэта’’ хандамда сертась пир’’цеты. Нисянда’ хэвхана тэхэ’’ ядэрцеты, яӈгом’ мярась, халяком’ ня’’амась теневасеты.
Невхэна тарцясь. Теда хурка ӈэдакы? Те’’ны илӈгана илена’’ хасава’’, хойхана мюсертина’’, хардахана иленина’’ нюдо’ тохоламбидо’, харто’ тарця манзаи’’ пэрӈам, ним? Тикы нямна хибярина ӈобкана ма’’лась лаханорӈаць. Хурка’’ мел’’ хибярина округханана илеса’’, хурка манзаяха’’на пыдо’ нердець тикы нямна ма’’люрмы’’ нина’’ лаханаць. Хойхана илевам’ мэ’’ма нямна вадидо’ мэ’’ӈаць, тикахад’ халядана’’ манзая’ нямна тасалкуць; ханзер’’ ним’ паӈгалць, лэхэд’ тарана’’ ӈамгэм’ мадась тикы нямна ӈод’ вада’’ таняць. Ханзер’’ хусувэй теневавам’ вадюданна’’ ӈацекэхэ’ тэврась, тикым ӈод’ ӈобкана ма’’лась хибяри’’ таслабидось.
«Арктикам’» нюбета КДЦ мякана «Мужских рук творения» нюбета выставка яля’ ямбан манзарась. Таняна мел’’ хасава’’ ӈудаха’’на’’ сертавы’’ манзаи’’ манэ’’лабтабиць: сянако’’, хуркари’’ лэхэд’, пяхад’ мадавы’’ тарана’’ ӈамгарико’’, невхы есяхад’ сертавы’’ ӈавори’’ таняць. Филипп Никитич Ардеев мел’’ ненэцие’’ поӈгана теневана нява’’. Хойхана вадюданась, нюртей пяхад’ мадавы сянакомда си’’ив ю’’ по’’ тяхана сертавэдась. Нюртей ханамда сертаванда мальӈгана мат’’яӈганя потась. Теда ӈод’, ӈарка хибяриӈэ’ хэсь пяхад’ маторась мел’’, тарця серт’ хусувэй харвана хибярим’ тохолась пир’’ӈа’’. Ваеравы ма’’лёйкана манзаям’ манэ’’лабтабись.
Хасава’’ манзая’’ нямна ӈарка лаханарма ваераць. Тарця ма’’лёва яханана нюртеймэвна танясь. Ӈока мэкад’ ӈамгэм’ таняюв турмы’’ хибяри’’ намдаць, ӈока несэй ӈамгэм’ манэ’’ӈаць. По’ ваерась этно-культурный центр’ манзаранина’’ ненэциена тарця сер’ нямна ӈани’’ ма’’лаӈгудо’.
