Маня’’ яханана тыбэртя’’ ненэциена’’ ханярина манзара’’. Ханяӈы’’ хибярина’’ сельскохозяйственный производственный кооператив’ ты’’ лэтби’’, ханяӈына’’ семейно-родовой общинахана тыдо’ пэрӈа’’. Ӈокханда округханана юр’’ сиднтет ю’’ ёнар’’ мян тэва’’. Нара’ ямбан хойхана манзарана’’ ненэця’’ тэтнава ялудо’ мэ’’цьты’’. Ты’’сие ниць ирийхад’ те’ ёльць ӈэсонд’ хойхана тамна тэкоця’’ ни’’ӈа’’. Ханзер’’ тыбэртя’’ тыдо’ маниеӈгудо’, тикахад’ ты’’ толыр’’ вадюва’’ переӈгу’’. Тюку по’ нарада сацьри вэва нинархась’ӈа, япда мерця’’, хад’’ яӈгода то’’олхаць. Ӈодьбянда ёльцьхандо’ соявы’’ суюкоця’’ сенз’ ӈэбнандо’ таранарха’. Округна агро-промышленный комплекс управление’ манзаям’ пэртя’’ вадавна: тюку по’ округна ты’’ толыр’’ мат’’ ю’’ самляӈг ёнар’’ мянмана  ӈокамбата тара, таӈок сую’’ соябнанда тарась. Тикахад’, хусувэй сер’ нумгад’ пере, тикахад’ тыбэртя няхатана’’. 

Сян хую’’ ханяна соя’’. Тикым’ просчет манзая’’ манэ’’лабтаӈгуда. «Няръяна ты» СПК  … тыдо сацьри ӈока ни ӈа, няхар’’ ӈэсыхына юкад’вата тыбэртя’’ тыдо’ лэтби. Тюку ирий нертей яляхана хоян манзарана ӈэдалэйдаць, хуний просчет манзаи тасламби’’.