Яра ирийна сидя ю’’ нертей яля’ хари’’ вада хэбидя яляӈэ’ таславы. Маня’’ яханана тикы яляхана округхы’ этнокультурный центр’ хардахана хуркари’’ тэнз’ мэта хибяри’’ ма’’люрӈаць.«Мань вадав’, мань няв’ » мероприятие’ ваерась.

Округна ӈэсыхы’’на илена’’ хибярина ӈод’ тарця ялям’ мэ’’ӈадось. Тарем’ Нельмин’ Саляхана илена’’ нина’’ вада’ ялям’ сомбовна мэ’’ӈадонзь. Культура’ серу’’ минрена’’ нидо’ ӈэсыхына илена’’ хибярито’ е’’эмня «Мань вадав’» нюмдевы конкурсм’ хамандаць. Яра’ ирийна сидя ю’’ маттамдэй яляхана тарця конкурсан’ ненэциедо’ ма’’лаць. Саляхана илена’’ нянэй ненэця’’ харто’ вадавнандо’ лаханавам’ мэ’’ӈаць. Нянэй ненэця’ паднана падвы манзаи’’ толабиць. Ӈокханда конкурсхана школахана тоходанна’’ ӈацекы’’, садикхана’ мэна’’ хамадавы’’ манзаидо’ манэ’’лабтаць. Тикы’хавна тамна няхар’’ ӈарка хибяри’’ Прокопий Явтысый, Алексей Пичков падвы манзаи’’ толабиць. Ӈарка хибярито’ поӈгана нюртей местам’ ханавы, вадамда сававна теневана не’ Анна Николаевна Талеева. Пыда Прокопий Явтысый падвым’ «Хаер’ хыно’’ӈа» тохоладась, ёльце сававна толадась. Екатерина Николаевна Ардеева «Небян’ табекова» падвым’ хасава ӈацекэця’ нюяв манэ’’лабтаханзь’. Пыди’ нябимдейӈэ’ хаяхась. Нина Сафроновна Ноготысая Пичков’ падвы манзаям’ толась, пыда няхарамдэйӈэ’ хаясь.

Нельминхана манзарана’’ тохолкода’’, воспитатель’’ пэдова’’. Пыдо’ конкурсан’ ӈацекыдо’ хамандавыць. Ӈацекы’’ паднанина’’ падвы’’ манзаи’’ толабиць, тикахад’ хобцоко’’ ваде’’ӈаць, вадако’’ масьтевыць. Нюртей классхана тоходанна’’ хобцоко’’ ваде’’ӈаць, ныланавась’ товы’’ хибяри’’ тткы хобцоко’’ хомбидось. Тетимдей классхана тоходанна’’ ӈацекы’’ саваць, пыдо’ «Хибя’ рескам ябца» лаханаком’ манэ’’лабтаць. Тохолкодадо’ Любовь Гавриловна Павлив. Хусувэй вадам’ мэ’’мы’’, толанзёвы’’, вадако’, хобцоко ваде’’мы’’ хибяри’’ саваць. Пыдо’ малӈэ’ пэдова’’.

Вада’ конкурсан’ тэвравы манзаи’’ жюри’ манэ’’сармахана, тикым’ ӈатевахана хибяри’’ вади’’ хомбиць, хынота’’ сё’’ мэ’’ӈаць.

Тикы яляхана ӈэсы’ тер’’ хибяри’’ сававна нылэйдаць. Тарця ныланавам’ е’’эмняндо’ Маргарита Фомина, Татьяна Соломатова хамандавыць, нянди’ ӈарка вада’’. Хибяри’’ тарця вади’’ хэтаць: - Нерняна ӈод’ тарця ма’’лёва ӈэсынана’’ таняя’’. Хари’’ вадам’ теневана малӈэ’ турӈая’’!.