Вы здесь

Несэй манзаям’ падвы

Галина Тайбарей – тохолкода, паднана

Маня’’ яханана паднана’’ хибярина тянё ни’’ӈа. Сиддо’ округханана танеда «Заполярьем’» нюбета литературно-творческой объединение’ ӈобт’ ма’’ламби. Пыдо’ падвы’’ манзаидо’ сборникха’’на, альманах’’хана падбасьтыдо’. Ханяӈы паднана’’ нина’’ падвы’’ манзаидо’ книгаӈэ’ тарпсетыд’.

Галина Григорьевна Тайбарей тохолкода, пыда луца’’ вада, литература, ненэця’’ вада тохокодаӈэ’ округна школахана тарась. Округна ӈацекы’’ няюв’ ӈока манзарась. Тохолкодаӈэ’ тоходанна’’ ӈацекы’’ педколледжхана тохолабись. Хусувэй пэрта’’ манзаяханда ив’ ер сырта не. Теда школахана манзарана’’ тохолкода’’ поӈгана Галина Григорьевна тохолабвы хибяри’’ манзара’’, харто’ тохолкодамдо’ сава вадарина тензебтембидо’. Ядтабнандо’, нянда ихид’ миндя’’ вадидо’ хэтбасьты’’. Ӈарка вадам’ тохолкодандо’ мэцьты’’. Галина Григорьевна округханана соявы нянэй не. Ӈарка я’ тер. Харта паӈгуда теневана, ямда саць мэнена, харта вадамда мэта нява явнанда ӈэвамда тю’’у минресь’ пилибт’ нерняри’’ миӈа. Харта’ ныхыринда енась илевамда мэ’’ӈада. Галина Григорьевна луца’’ вадавна манзь- творческой хибяри. Ӈудида’ мэта не. Пыда сертавы’’ манзаида ӈока выставкаха’’на’’ хобсетына’’. Хынокад’, сёнда’ сававна хайнана не. Пыда сёмда «Сава сё» фестивалькана намдурцетыва’’. Тамна Галина Григорьевна паднана не. Пыда падвы’’ манзаида сеян’ мэёвна еримберӈа’’. Стихм’, прозам’ падбада нява. Хусувэй сертабада манзаямда пыда янамбовна, мунзипой пэрцетыда. Галина Григорьевна падвы манзаи’’ хуркари’’ сборникха’’на’’ хобсетына’’, газетанана падбасьтына’’, сян’ книгада тарпыць. Саво ирийна сидя ю’’ маттамдэй’ толыркана этно-культурный центр’ мякана литобъединение «Заполярье» манзарана’’ сава серм’ нямна ненэцие’’ ма’’лаць. Тикы яляхана Галина Тайбарей едэй падвы книга’ презентация’ ваерась. «Родом из тундры» луца’’ вадавна таремъюв’ нюмдевы.

Книгахана стих’’, проза’’ ма’’лавы’’. Паднана нява харта янда, харта нита’’, паӈгута’’ нямна падна. Презентацияхана пыда тарця вади’’ мэ’’ӈась: – Тюку книгам’ пон’ ӈатевась. Теда ӈудаха’’нан’ ня’’амбив’, маймбим’. Ихинян’ лимбяка, ибака. Тюку книгам’ толась’, намдгура’’: ханяхад’ маня’’ паӈгуна’’ пере; небян’ паӈг’ ханяхад’ миӈа’’, нисян’. Маня’’ паӈгуна’’ тэта’’хат’ миӈа, мэёвна илена’’ ненэцяӈгат’’. Мань’ перенин’’ теда ӈод ӈарка явна мюсерӈа’’.

Нина’’ нядабась илевава мэ’’ӈава’’.

Галина Григорьевна ӈарка вадам’ сита’’ нядабавы’’ няха’’та’’, презентациян’ товы’’ хибярихи’ хэтась. Тарця хибяри’’ тянё ниць’ ӈа, ханяӈыдо’ паднана няхандо’ ихид’ ӈэда’’ вадидо’ мэ’’ӈаць. Матрёна Ивановна Талеева ӈобтарем’ паднана не. Галина Григорьевна няюв’ ӈобкана школа-интернатхана манзараӈаханзь’, теда паднава серм’ пэрӈаха’. Пыда тарем’ лаханась: – Мань’ Галина Григорьевнам’ ӈахэт’ теневав’, Ӈарка я’ терни’, ӈобкана манзаранись. Пыда манзаямда тенена тохолкода. Саць харвадм’, Галина Григорьевна тохолкова’ манзаямда нерня минребнанда, ӈани’ манзаравась’ пябнанда. Тарця тохолкода’’ нянана’’ тара’’. Вадамда ёльце сававна теневана, ил’ теневана.

Тюку яля’ намдвы’’ вада’’ сейхана сомбой. Маня’’, Ӈарка яна’ нямна ӈока’’ лимбяка’’ вада’’ хэтвыць. Хой’ нямна, тыбэртя’’, мядм’ манзаям’ пэртя’’ не’’ нямна ихид’ лаханаць. Тайбарей, Сядейской, Пырерка, Явтысый мяд’ тер’’ мал’’ ӈопой я’тер’’. Мэбета’’, сававна илена’’ хибяри’’. Нерня ӈод, Галина Григорьевна тамна падна, сензан’ ӈа, нянд’ сейхад’ ӈарка вада’’!

«Родом из тундры» – таремъюв’ нюмдевы книга’ тарпыць. Сомбовна падвы, паскоювна падтавы книгам’ мядонзэӈэ’ Галина Григорьевнахад’ ня’’амава’’. Ма’’лёва мальӈгана сава вади’’ М.Д. Люблинская Санкт-Петербургад’ товы не, Л.Е.Сядейская Краснойхад’, ӈоб’ паднана; Инга Артеева, Любовь Царькова, Евгения Растегаева хэтаць.