Хаювы ирий’ сидндетимдэй’ яӈганя яляхана тарця юн’ намдамась: Егор Николаевич Ледков яӈгума. Пыда сита мань’ нюдякодан’ теневавась.
Нися’ хасан няюв ӈобкана хойхана манзараӈахась. Тикы хасава Хонгурейхана илесь, ӈока по’’ ямбан «Няръяна ты» колхозхана ты’’пэртяӈэ’ тарась. Сава хибярись. Тюку по’ ты’’ ниць ирий нюртей толыркана Егор Николаевич сидндтет ю’’ помда ядабтась. Ӈарка илеван’ мэ’’мы ненэць пудана похо’’на хаӈгурӈась. Хибярихина сава ӈэсьты. Мань’ Хонгуреян’ тэворман’ мальӈгана пикувна ядасумбванда ёльцяӈгана ядабтасьтыв. Мунзюпой’ хэвувнанд’ сяхарт’ нисьты ваера. Хэтувнда вадада пиликов’ танесеты, хонарковада ӈод тянё нисьты’ ӈа. Мань’ ихинян’ тарцярхась: Егор Николаевич харта вадамда, ненэця’’ вадамда саць мэнедась. Ханярина мэбнанда пили ненэця’’ вадаривна лаханасьты. Нюда’’ ӈод харто’ вадамдо’ мэнесь тохолась. Ӈаркаюм’ не нюнда хасава нюкця иринда’ хэвхана вадюданась, тикы’ хасава ӈацекы вадамда со теневада. Лаханась’ тарабта, нись’ вэвархамбю лаханаӈгу. Нюда’’ нянэй ненэцие’’ ватомна вадамбидась. Тарем’ хусувэй мякана ӈэбнанда нив’ тара, тикахана вадава тю’’ури миндась.
Егор Николаевич Нюдя яхана ёнар’’ хасуюёнар’’ няхар’’ ю’’ няхарамдэй похона ты’’ ниць ирийхана выӈгана мюсерта’’ ненэцие мякана соявысь. Нися’ хасада Николай Митрофанович Ледков хойхана теневана ненэцясь. Кареговка ӈэсыкоцяхана колхоз’ председательӈэ’ манзаравысь. Небяда Анастасия Ивановна «Няръяна ты» колхозхана хуркари’’ тарана манзаяхана манзарась’ пэрмысь. Ханесь тарабнанда ханеӈгу, таӈы’ мальӈгана сенокосхана манзарасьты, почтам’ ӈэсымна ядэлавысь; тарабнанда тэхэна мэвы ӈэсьты. Тамальӈгы’’ похо’’на мал’’ не’’ тарем манзараць. Сибицяда яӈгусь.
Егор Николаевич илевада хойхана ваерась, пилибт’ тэхэна мэсьты. Си’’ив яӈганя похонанда нелевыць. Ненда няюв самляӈг ю’’ ӈопой по’’ ямбан илевэхэсь. Егор Николаевич ненда Антонина Максимовна няюв няхар нюмди вадаӈаханзь. Нюди’’ ӈарка хибяри’’, харто манзаидо’ таня, нюдо’ маля вады’’.
Е.Н.Ледков сававна илесь, ӈокавна манзарась. «Няръяна ты» колхоз ты’’пэрӈась, бригадирӈэ’ тарась. Манзаян’, илан’ ив’ сырта хасавась. Сававна манзара’’мида ӈока грамотыда ваде’’ядо’. Мел’’ хасава ӈэвысь: хан’ мись, тынзям’ паӈгалць сер’ нись’ӈа. Пир’’манда ямбан хоян’ ядэрцеты. Та’ мальӈгана ӈодям, мараӈгам, тудаком ма’’лабгу. Сыра’ тэвраӈгу, халям’ хоӈгу. Ӈахэт’ пэрта манзанда нибнанда тэвор’ ӈод пудана похона пиликов’ хой’ някумна ядерцеты. Хойси’ илесь нидась пирас.
Ӈэсыхына илена’’ хибярина ихиня Егор Николаевич Ледков пилибт’ илеӈгу, тарцям’ сававна илехананда, манзараваханда недво’’мы хибяри.
