Хойхана мюсерта’’, тэхэ’’на’’ мэна’’ хибярина’’ ӈарка яля’ танеӈгу. Пилю’’ ирий’ нертей яля’’ пиркана хоян’ тиртя’ ӈано’’ тиӈгуд.

Теда’ тарця сер’’ ервуна’’ тасламбидо’.

Маня’’ яханана’’ тэхэ’’на’’ мэна’’, хойхана мюсерта’’ ненэциена’’ мале ӈока по’’ ямбан’ хэбидя ялямдо’ мэцеты’’. Тикы е’’эмняндо’ сямянд ӈарка яля’.

Округханана’’ ӈахы’ похот хой’ тер’’ ненэця’’ ныланаванзь ма’’люрцеты’’. Ӈобкана ма’’лась по’ ямбан манзаравамдо’ тасласеты’’, нерня’ манзарава серудо’ манэ’’сарцеты, поӈгнандо’ пирдырцеты’’, мядоманзь нидо’ тосеты’’, перенидо’ хобсеты’’.

Ты яляхана тэхэ’’на’’ ӈэдалёрцеты’’, сямянд’ ныхытидо’ нюмдебасеты’’. Ты ненэцяӈгана сямянд’ тарана’’, ненэцие’’ ил’ тэхэд пере. Тэхэ’’на’’ ненэця’ ӈэдалёрӈа’’, ты ненэцям’ ӈавламбида,ембпида… Тэхэд ӈэрм’ ненэцие’’ илевада нерня’ миӈа’’.

2007 поход округханана’’ Ты яля’ яна’’ хэбидя яляӈэ таславы. Хусувэй ӈэсыхына, маркана илена’’ хибяри’’ Ты ялям’ ӈатесетыдо’, ӈарка яляхана хойхана манзарана’’ хибяри’’ ма’’лабсеты’’.

Тюку по’ Ты яля’ танеӈгу. Оргкомитет’ манзаямда минреда. Пилю’’ ирий’ няхарамдэй-тетимдей толыркана нертей тиртя’ ӈано хоян’ тиӈгуд. Тюку по’ хоян’ хойхана мюсерта’’ ненэцяӈгана тарана ӈавори’’ тэвраӈгу’’, ӈавар’’, мядонзэй’’ ханаӈгу’’. Ӈопой, тюку по’ хойхана илена’’ ненэциена хэбидя ялямдо’ харто’ мэтадо’. Ехэрана хабця’ нид’’ маркад, ӈэсыхыт товы’’ мядондидо’ яӈгуда’’, хыно’’та’’,тарана’’ хибяри’’ тюкумэвахана хоян’ нид’ тэвӈгу’’.

Ненэця’’ ӈарка яляханандо’ поӈгнандо’ пирдырта’’, хан’ тя санарта’’, тынзям’ моепаӈгу’’, сюрберта’’. Сямянд’ ӈатенадо’ – тэхэ’’на’’ ӈэдалёрма’’. Варёмдо’ мэта’’.

Тюку по’ Ты яля’ тарем’ ваеравнда.

Пилю’’ ирийхана округна’’ еркы маркад тет яӈганя тыбэртя’’ ян’ тиртя’’ ӈано’’- вертолёт’’ тиӈгуд. Тарця сер’’ е’’эмня округна’’ бюджетхад самляӈг яӈганя миллион’’ есям’ яӈгрець.

Оргкомитет манзаям’ пэртя’’ хибяри’’ вадавна, тюку по’ Ты яля’ призовой фонд 750 ёнар’’ еся’’, тэхэ’’на’’ ӈэдалёрма пирдырмахана нердевы’’ хибяри’’ поӈгана тяртыдо’.

Тюку по’ сян ирий’ ямбан я’ сяр’ ниня’ хибяри’’ ӈопой лахарёдо’ коронавирус хабця’ нямна ӈа’’. Ханярина ехэрана хабцяӈгана хибяри’’ хаӈгурӈа’’. Маня’’ округхана’’ ӈод’’ тарця хабця’ тэвыць. Хойхана мюсерта ненэцяӈга’ тарця хабця’ нибнанда тэв’’, тюку по’ хэвний хибяри’’ таня ни’’ хант’’. Ты ялям’ мэ’’манзь валакада хойхана манзарана’’, илена’’ хибяри’’ ханта’’.

– Теда’ хойхана мюсерта’’ ненэця’’ едэй хабцям’ ехэрадо’, пыдо’ хаӈгула’’ нибнандо’, мято’ тер’’ сенз’’ ӈэбнандо’ маня’’ нядана’’ пере’’, – оргкомитетхана маць. – Ӈодьбянда хоян’ тюку по’ ӈока хибяри’’ нива’’ тэвраӈгу’’. Маня’’ енава’’, хибяри’’ хамадабидо’ ӈамгэ тарем’ сертамбива’’.

Ехэрана хабця’ нид ханярина илма’’ нулмы то’’олха’. Тарем’ ӈод’’ по’ ямбан’ ӈатевы Ты’ ялява’’ тюку по’ ниня’’ тарем’ ваераӈгу. Хойхана мюсерта’’ нина’’ е’’эмня хэбидя ялядо’ танеӈгу, тикахарт сава.

Маня’’ ӈани’’ пом’ ӈатеӈгува’’. Валакада хибярина’’, тына’’ cенз’’ ӈэя’’!