Округна толаӈгова’’ хардахана ӈэрм’ ненэцие’’ отделкана манзарана’’ нина’’ ваеравы’’ яляхана маркана илена’’ ненэцие’’ ма’’ламбиць. Тюку’ мэвахана тарця серм’ таслабиваць.
Отдел Севера манзаям’ пэртина едэй клуб’ нэмбиць, литературно-этнографический клубамдо’ таремъюв’ нюмдедонзь «Толаӈго книга». Тад’ нерня таняюв’ хусувэй литературам’ мэнена хибяри турць’ пиртада. Ӈобкана ма’’лась хибярина’’ ӈэрм’ тенз’ ненэцие’’ паднана’’ нямна лахарёдо’ мэта’’, тикахад’ падвы’’ манзаидо’ толабаӈгу’’. Клубан’ турта’’ нидо’ ӈод нидо’ юрбаӈгу’’, со’’яма яляханандо’ няхандо’ сейхад’ миндя’’ вадидо’ хэтбаӈгу’’. Отдел Севера манзарана’’ вадавна: – Тарем’ ма’’лёвахана нина’’ ӈод саваркавна торомдабгуна’’, несэй хибяри’’ толаӈгова’ хардахана турта’’.
Едэй клуб нэвахана сямянд’ нерде вадам’ ханавы Алла Кожурова мась: – Клубхана ма’’лёда ӈопой серм’, и’ӈудом’ минресьты’’. Теда ӈадимдевы клубан’ товнда’’ хибяри’’ харто’ культурамдо’, традициидо’, паднава’’ серм’ нерня лэтрабгудо’. Тюку яля’ паднана Пэля Пунух нямна лаханава’’. Пыда ненэць’ нибнанда ӈа’’ӈод, ненэцие’’ ила’ нямна паднась. Нянэй ненэця’’ поӈгана илевы’’, иламдо’ теневавы’’. Падвы’’ манзаида сёнзян’ мэёвна еримберӈа’’.
Паднана манзаямна’’ ӈэрм’ яна историям’ тохоламбива’’.
Пыда’ пуданда Зоя Ивакилева лаханась: – Нюртей ма’’лёвахана Пэля Пунух нямна лаханава’’. Тикы’ хасава тюку по’ март ирий’ няхарамдэй толыркана юр’’ сидя ю’’ помда ядабтаӈгува. Няхар похонанда нисяси’ хаювысь, маендорць илевы. Небядо’ самляӈг нюкцямда ӈопориӈэ’ вадабидась, сибиць нись’ӈа’’. Пэля Пунух – тикы Тимофей Петрович Синицын. Сава ӈацекеӈэ’ вадюданась, хусувэй ӈамгэм’ теневаван’ харвась. Тарця хасаваком’ тохолкода сэвтевэдась. Школамда ёльцесь Воскресенской училищена тоходанась. Тикы’пуд Архангельск’ маркана семинариям’ ёльцевысь. Ёнар’’ хасуюёнар’’ няхарамдэй’ яӈганя похона тохолодаӈэ’-манзарась’ пядась.
1925 похона Едэй Ян’ илевась’ товысь, таняна школам’ нэмбись. Тыко Вылкам’ савовна теневадась. Сямянд’ нюртей падвы манзаяда «Народный учитель» журналкана ӈадимясь. 1929 похона тарця книгида тарпыдаць: «Девочка Саване», «Из под пяты веков», «Новоземельские будни».
Сайнорма похона Пэля Пунух «Правда Севера» газетахана манзарась.
Зоя Степановна вада’’ пуд’ «Ханебцё» фольклорной группахана сянакода нина’’ «Стрела восстания» книгахад’ отрывок толаць, ненэця’’ вадан’ вадидо’ Людмила Булыгина, Федосья Кауц падвыдись.
Надежда Талеева ӈоб’ толаӈгова’ хардахана манзарана нява Тимофей Петрович Синицын не ню вади’’ ма’’лавы’’ хибярихи’ тэврась. Ханяна Полярина Тимофеевна ваде’’ӈадась: ханяна соявы, ӈамгэ нисяда’ не нюмда’ таремъюв нюмдевэдась.
Ненэцие’’ школа-интернатхана манзарана тохолкода Людмила Егоровна Пэля Пунух нямна хамандавы’’ вади’’ хэтась, ваде’’ӈадась ханзер’ паднана’’ манзаи’’ урокхана тохолабидо’.
«Толаӈго книга» клуб’ нюртей ма’’лёвахана хибяри’’ саць ӈока ниць’ ӈа’’. Ялянда саць тецьва’ нид’ ӈокаюв’ таняюв нидаць’ тэв’’. Тарця клуб’ ирийхананда ӈопоймэвна харвана’’ ненэцие’’ ма’’лабгу’’. Нябимдеймэвна нерняна товнда ирийхана нина’’ ма’’лаӈгуд’, хибя’’ харвана’’ турӈада’’. Хэвняхана тарця сава серкад’ нёда’ хаюр’’.
