Хусувэй по’ хэвхы округхана ӈацекы’’ ма’’люрцеты’’, хуний краеведение’ няби нянэй вада’ нямна хамандавы олимпиадам’ мэцьты’’. Ӈацекы понгнандо’ хусувэй предметмана ныхыдо’ хорпасеты’’. Хибядо’ сямянд’ мэбетамдо’ тэрабасьты’’.

Тюку по’ ӈод ӈацекы’’ олимпиадам’ мэ’’мась Саля’хардахана ма’’люрӈаць. Хэвхы округна еркы’ март ӈацекы’’ Я’мал хусувэй районхад’ товыць, тикахад’ хусувэй маркад’, маня’’ округна ӈацекы’’ӈод тарця олимпиадан’ маля няхарамдэй’ ядэрӈаць. Округва тарця сер’ е’’эмня есям’ хобсеты’’.

Тюку по’ маня’’ яхадана мат’’ ӈацекэва’’ краеведение’ няби ненэця’ вада олимпиадахана манзараць. Сидя не ӈацекехэ’ Ненэцие’’ школа-интернатхад’, няхар’’ не нацекы’’ Ома’ ӈэсыхына тоходанна’’, ӈопой-до’ маркы школахад’. Ӈацекына ненэця’ вадавна олимпиадам’ мэ’’наць, тикахад краеведение’ олимпиадахана паднаць. Маркы школа тоходанна Мария Кушнир Саля’хардан маля няхарамдэймэвна тэворӈась. Пыда хусувэй по’ сава манзаравам’ манэ’’лабтабасьты. Тюку по’ ӈод маня’’ яна’ тер не ӈацекэва краеведение’ олимпиадахана нябимдеясь. Тюку по’ ӈацекына Надежда Вольхина ядалэйдась, тикы не Ома ӈэсыхы школа’ ерв ӈуда нылӈэ манзарана.Тохолкода мась: – Ӈацекына ӈокавна манзараць, хусувэй яля’ манзаядо танясь. Тарем’ ӈэбнанда ӈод, ӈацекына мар’’мана ядэрӈаць, тикахад’ паднана’’ няюв ма’’лёвадо’ танясь, экскурсии’’ мэ’’ӈаць, ханярид товы’’ ӈацекы’’ няюв нидо’ торомдабиць. Ӈокханда тюку по’ олимпиадам’ мэ’’мась самляӈг ю’’ ӈацекы’’ товыць. Ӈокаювдо’ Я’малкана илена’’.

Краеведением’ мэ’’мы’’ ӈацекына’’ научно-исследовательской проектадо’ ваде’’ӈаць, тикахад’ викторинам’ мэ’’ӈаць, ханяна ю’’ хонаркован’ вадам’ падась’ тарась, тикахад’ ӈацекы’’ Шемановской нювм’ нюбета музеян’ ядэрӈаць, таняна манэ’’мэмнандо’ сочинением’ падбиць.

«Родные языки» олимпиадам’ ӈобтарем няхарамдэймэвна хамададось. Нянэй ненэця’’, хаби’’, тасу’ хаби’’, ӈысма’’ вадам’ мэта’’ ӈацекы’’ паднаць. Маня’’ ӈацекына ӈод хусувэй по’ таняна мэсьты’’. Тюку по’ ӈацекы’’ ӈэрм’ ненэця’’ падвы’’ стих’’ толабиць, тикахад’ викторинам’ мэ’’ӈаць, устной народной творчество’ сянаковаӈэ’ манэ’’лабтабиць, сочинением’ нянэй вадавна падбиць.

Краеведение олимпиадахана ӈацекына сававна паднаць, сидя не ӈацекэюна’ нюбедо’ нерденя поӈгана нюмдевыць, тикы Мария Кушнир, Любовь Торопова. Нянэй вада олимпиадахана маня’’ округна ӈацекы нерденя’ поӈгана яӈгуць. Я’малкана тоходанна’’ ӈацекы’’ харто’ вадамдо’ сававна теневадо’. Олимпиадан’ товы’’ ӈацекы’’ малӈэ’ сававна нянэй вадавна лаханана’’, паднана’’. Тарця ӈацекы’’ пирдалесь тоена’’. Тарем’ ӈэбнанда ӈод маня’’ ӈацекына пэдова’’. Хусувэй по’ олимпиадам’ мэ’’мась хэвхы округан’ тэворӈа’’. Тикы сава сер’. Валакада ӈамгэвась вадам’ пэртя тохолкодина ӈобкарт’мэвна таняна ниць’ мэ’’. Ненэця вадам’ минрена’’ тохолкода’’ ӈод таня ядэрпато’ таранарха’ ӈэдарха.

Теда ӈацекына маля харто’ яхандо’ тоць, тохолковамдо’ школаханато’ мэ’’ӈа’’. Нерняна’ товнда похона харвабнанда ӈани’ олимпиадан’ ӈэдалаӈгуд’.