Няръяна маркана маля сян’’ юд’ мян по’’ ямбан санаторно-лесной школа манзаямда минреда. Тикы школахана округна ӈэсыхыт’ товы’’ хануй’’ ӈацекына’’ тоходана’’. Маркад’ турта’’ ӈацекы’’ ӈод пилибт’ танесеты’’.

Пыдо’ няюв манзаидо’ теневана’’ тохолкода’’, воспитатель’’ манзара’’. Ӈацекына тоходана’’, тикахад’ е’’эмняндо’ хуркари’’ сейхана сомбой серу’’ таняна манзарана’’ хамадабсеты’’. Таняна тоходанна’’, илена’’ поӈгана ненэця’’ ӈацекы’’ ӈод тянё ни’’ӈа’’, хуний округна ӈэсыхыт’ турӈа’’. Санаторно-лесной школахана ӈацекыдо’ харто’ вадамдо’ тохолабидо’. Манзарана’’ поӈгана ненэцие’’ вадам’ мэтидо’ ӈани’ таня, пыдо’ ӈацекы’’ няюв манзара’’. Ненэця’’ вадам’ пэртяӈэ’ Полина Александровна Большакова манзара, теда пыда тамна завучӈэ’ тара. Юлия Александровна Ледкова, Парасковья Егоровна Кауц ӈани’ ненэця вадавна лаханаӈаха’. Тоходанна’’ ӈацекы’’ харто’ вадавнандо’ вадако’’ масьтебсеты’’. Тарця манзаямдо’ хаювы ирийхана округна библиотекахана манэ’’лабтадось.

Округна санаторно-лесной школа’ ервотаӈэ’ теда мэта тохолкова поход’ Наталья Васильевна Корепанова тара. Тикы не маля ӈахэт’ тохолкодаӈэ’ манзара, тивак’ хабцям’ савумдамбава лекарь’ мякана ӈацекы’’ тохолабись. Тикы’ пуд маля ӈахакуд’ санаторно-лесной школахана ервандо’ ӈуда’ ӈылӈэ’ манзарась. Теда пыда директор’ манзаям’ минре. Минрена’’ манзаидо’ тад’ нерня ӈод’ сававна миӈая.