Яханана тарця хибярина ӈока , хуний илевандо’ ямбан ӈокавна манзараць, маня тарця хибярина теневына’’, танейна’’. Со’’яма яляндо’ тось няндо’ сейхад миндя’’ вадина’’ мэцьтыва’’. Тарця вади’’ тюку яля Роза Ивановна Канюкован’ мэтадм’.

Роза Ивановна Нюдя яхана соявы не, Саляхана вадювы. Няръяна маркана тоходанась, тикад Ленинград маркана Герцен нюбета институтм’ ёльцембэй. Тохолкода профессиям’ ня’’амась округхана манзаравась тэвыць. Ӈока по’’ ваера’’, ӈока по’’ ямбан Роза Ивановна манзарась. Ханяна нися манзара, ханяна нися иле. Харта со’’явы янда’ тер’’ нюкци’’ школахана тохолабись, тикахад’ Каратайкахана хойхад’ турта’’ ненэцие’’ ӈацекы’’ толаӈгось, толанзёсь, паднась тохолабись. Няръяна март еримзь – ненэцие’’ школахана манзарась. Ӈацекы’’ тохоламбавам’ сававна торомдась, Роза Ивановнам округна управление образованиен’ ханадось. Таняна местодистӈэ’ тарась, тарця манзаяхана манзарась пыда ӈокавна округмана ӈэдалёрнась. Округна школахана манзарани’’ тохолкоди’’ нядабасьты. Сертамбада манзаянда ив’’ер сырӈась, хусувэй несэй ӈамгэм тохолкода манзаян’ тэврабсеты. Тикахад’ Роза Ивановна окроно ерв’ ӈуда ӈылнэ манзарась, тарця ӈарка манзаям’ пенсиян’ хэванда ӈэсонд минредась. Илеванда ямбан манзаравы хибяри, ныланавам ехэравы пенсияна ӈамдёсь ванида пирас. Тикахана ненэцие’’ культурам’, вадам’ сававна теневана не тамна ивнянда ӈэда манзаядамда хось. Управление культуры ерв’ ӈуда ӈэ манзарась, тикахад этнокультурный центрхана ненэцие’’ отделкана ӈарка манзаям’ минресь. Тикы поӈгана «Тэдарма» группахана сянако пядась. Роза Ивановна тохолкода манзаям ёльце сававна теневада. А.И.Рожин букварьм’ несэювна падась, тикахад методический пособиеда тянё ни на, теда ӈод школахана манзарана нита е’’эмня паднасьты.

Тюку яля Роза Ивановна Канюкова со’’яма яляда. Пыда нянда тарця вади хэтбидм’: ӈоб нерня сава имд’ мэць илевамд’ минред’, сензан ӈа. Нянд’, сейхад лаханадмэ. Пыдар ӈока газетахана паднасьтынэ, сими’ нядабасьтын’. Нерня тарем манзарахани’. Сёнзяр’ сава ӈэя, иламд’ маймба мэт’, ябда.