Си’’ив ю’’ самляӈг по’’ тяхана маӈгты ирий’ сидя ю’’ нябимдей яляхана яндана’’ илена’’ хибяри’’ вэвко юнм’ намдаць. Хэвний яндер’’ сайнорць яхана тэвыд’. Тарця юн’ хойхана мюсерта’’ хибярихи’ ӈод тэвыць. Хойхана таӈга’’ илевы’’, мюсермы’’ ненэця’’ сайнорма’ товэм’ намда’’.
Война - ехэрана луца вадам’ хавдо’ намдурць пя’’. Яндахана илена’’ хибяри’’ ямдо’ хэвняхад’ товэхэт’ сахарамбавась ятналыдаць. Ӈока’’ маям’ хойхана илена’’ хибярихи’ сайнорма’ тэврась. Пыдадо’ пирта’’ ненэця’’ хусувэй выӈгад’ хаяць. Мякнандо’ вэсако’’, пухуця’’, ӈацекы’’ хаиць. Пыдо’ хусувэй ӈамгэм’ пэрць илевамдо’ минредось. Маня’’ яхадана ӈэдалавы’’ ненэця’’ ханярина сайнорӈаць, ӈокаювна ӈэрм’ ямдо’ лэтбиць.
Сайнормахана мэвы’’, сайнормахана яӈгумы’’ хибяри’’ хусувэй мякана таня’’, Тарця хибяри’’ перенито’ ихиня’ пилибт’ иле’’. Нябимдей по’ маля «Бессмертный полкхана» сайнормы’’ нито’ сидяӈг ядэлась нина’’ ядсеты’’. Тюку ирий сидя ю’’ нябимдей толыркана «День памяти и скорби» яляхана хибярина’’ ӈобкана ма’’ласьтыд’. Тикы яляхана сайнормы’’ нина’’ вадецетыва’’.
Иван Егорович Ледков округханана теневана ненэця’, пыда евакоӈэ’ вадювы. Нися’ хасава Егор Алексеевич Ледков сайнормахад’ хаӈгурць’ товысь, нись’ пон’ илесь яӈгумась. Тиман’ выӈгана сюры. Иван Егорович нисянда’ сюрмы ян’ тэворцеты. Тюку по’ таняюв ӈани’ ӈэвамда хавравась тэворӈась. Иван Егорович ваде’’ӈадась: - Мань нисяв’ ӈарка войнана мэбэясь. Войнахад’ тет’’ ю’’ маттамдэй’ похона пуня’ тобэясь. Маня’’ хибярина мал’’ ӈобкана оленно-транспортный эшелонхана’ хаяць. Мань нисяв’ ӈань тарем хаясь. Нюртей Ледковхана мал’’ ма’’лэйдаць. Тикахад’ тэхэ’’на’’ Коткинон’ хаяць, Таняд Пёша, Мезень няӈэн’ ӈэдалэйдаць, Архангельскан’ тэвыдаць. Нисяв’ пон’ яӈгусь. Никель, Печенга, Киркенесс няна сайнорӈась, таняна пыда сита раневыць. Лэмбараханда осколок’’ хаёвыць. Госпиталькана понку мэвысь, осколокда мал нивыдось врач’’ тюл’’, тэвась я’’амвакэдо’. Справкав’ таня, тарця падарм’: таняна тарем’ пады «инородное тело (осколки )». Пон’ нись иле, война’ пуд тыбэртяӈэ’ манзарась. 1960 похона нисяв’ яӈгумась, ся’’ня «Няръяна ты» колхоз’ тыдо’ забоян’ Индига’ няӈэн’ тэвравыдось. Индига’ няна яӈгумзь, таняна нидо’ сюрӈадонзь.
Нись ӈакуна таня ӈэдалёрӈамась. Окружной программава таня. Хибя’’ войнана мэбэй, война пуна яӈгумаць пыдо’ е’’эмняндо пэхэд’ сомбой памятник сертаба пя’’. Мань’ тарця заказм’ сертамась. Теда Индиган’ ӈэдалёрӈамась, тикы ӈэсыхына тарця памятник сайнормы’’ хибярито’ е’’эмня ӈамтаць.
