Я’малкана Нейко Янгасова иле. Пыда тохолкодаӈэ’ ӈока по’’ ямбан манзарась. Нюдякоданда ненэцие’’ вадако’’ намдурӈась. ӈарка хибяриӈэ’ хэсь сяӈгова’’ намдвы’’ вадакуда падарт’ падбась пэйдась. «Ненэцие’’ лаханако’’, сюдбабц’’, ярабц’’» книгам’ падась. «Писяко’ вомдё’’ма» лаханако’ таняд’ ханавы.

Тамна миндяхандо’ неда’ мюня нехолцавэй пэхэнабць’ хаёвы, ютнабця’ пэ хаёвы. Пыдо’ мал’ ӈокахандо’ ядалъяд’’. Тарем’ миндяхандо’ ӈоб’’ пя’ пия’ яӈгом’ хо’’. Тикы яӈгохона ӈоб’’ пия икахаданда тарку. Писякор яӈго’ тебкабтавы’ пиям’ пирбяхананда тю’’у’ илада. Яӈгоход ха’’мвы пияко наӈэдя яляхав ӈопой яхана сюра, тарем’ мэнаханда ӈахат мирканда ха’’мы. Пия’ яӈгом’ сертаба’’ма яхананда хасава парэнда таня хаевэда. Писякор маси’’: – Ӈацекые’’, тамна нерня’ хандава’’, яля ӈэваханда тюку хэд’’ ненэцям’ ӈули’’ тэвахава’’.

Пыдо’ мал’ ӈоб’’ пумна ядалъяд’’. Ӈэсовы мят’ тэвабато’ хаерта пакалй’’. Писяко няхата ма: – Тедари’ нылэйда’’. Пыдар пиякоӈэ ненэць’ вэдет.

Пиякор ӈуво’’ помна сянамбой халцаптэй’’. Пон’ нись мы’’ пияко тэвы’’, ма: – Нядэна хасава ӈэвы. Ёро’’махаданда тандая’ мят’ тэвавы’’, поӈгамда тёмби.

Писякор ман’’ма: – Пияко, ӈани’ хань’’. Пияко ӈани’ хая. То’’махаданда ман’’ма: – Ня-дэна хасава халэда пэрӈа, едда пина,са’’нюй паныда екаби. Писякор ма: – Ӈани’ хань.

Пияко хая. Нядэна хасавам’ си’ панувна вэдепида. Тарем’ сырпата Нядэна хасава ӈаябарць няларӈга мынода та’’вавдавэй хан’’ӈа’’. Писякор ман’’ма:- Пияко, ӈани хань.

Пияко ӈани’ сырӈа. Нядэна хасава ӈаворць малевы’’, ва’’вамда сертаби. Хонаванда нерцюна пин’ ядэрӈа. Мят’ тю’’махаданда мо’’нарка юсибтэй’’, минаханда ӈарӈоёда нэкалъяда. Ӈарӈоцяӈга’’нато мядикомда илыбадараха. Пиякор серокута сер’ писякон’ мал’ ваде’’яда. Писяко ӈэта ни’ санэй’’. Нида тёрде. – Ептов’’, мер’ тай’ ӈада’’! Пуня’ ялъяда’’. Мал’ ӈокахандо’ ӈобт’ ядалъяд’’. Мяд’ хэван’ тэв’’махадандо’ писякор ман’’ма: -Пыдар, нельне’’мяӈэ, ту’ сибя’ понд паклад’’. Пуна хасава тумда посыбаб’’ сэвта таре парадаин. Нацдэйӈэ, пыдар Нядэна хасава’ пиби’’ мюмня паклад’’. Пибида серыбаванда мальӈгана ӈэда мадеин. Парэ’’ӈэ, пыдар синдад понд’ паклад’’, пин’анда мальӈгана пэянда латан’ паклаин. Сябу’ подер’’ӈэ, макода син’ танаин, пуна макода’ сивна пябта иканда сэхэр’’мана сапартаир. Нёхолцавэй пэхэнабцяӈэ, нё’ син’ лясад, ютнабця’ пэӈэ, не’ ня’ ти’’ сяр’’ман’ танад’’. Пуна пэхэнабця’ нид лясабата сейнда ед’ юталаир. Мани’ пиякони’ня’ ӈыламнанда и’’насавэй санартани’. Ӈаяхаданда хаця’ сяторпаӈгуми’.

Писяко’ саю’’ тодо’ яха’’ манрамби’’. Нядэна хасава неманда паӈом’ мэ’’ӈа. Писяко, пияко мяд’ мюмня и’’насавэй санлыйха’, хонёда хасавам’ ӈэванда таркад ӈопоё’’ сякалцетыди’. Нядэна хасава ӈамда санэй’’, пэвдя мякана тум’ посахалӈа. Нельне’’мя’’ хаӈгмандо’ сер’’ хасава’ сэв’ таре парада’’. Тикахад лэрё макоданда син’ тарада. Макода сихиня подер’’ хацяда есай’’.