Таӈы ядембада яля’ еркана сисьда (пэвдя) наро’ поӈгана хабарта’ яхадей нюкцяда соя. Хабарта’ яхадей ӈардавнанда ӈарка’’я ӈэвы, тарта ябти, сермавнанда тюнзибяраха ӈэвыю Нюкцяхавада тарта нямна сита пыдавы, тэ’’муй, ӈули’’ хорова’ суюраха. Ӈэкцяхабида ӈули’’ ябтакоця, тарця ӈэ ниня нува серта яӈгода’ то’’ола, тадри’ мальва’ то’’олхари’’. Хахабида ӈалекоӈаленд, тэваси’ хараха’’.

Лохорта’ лабтан’ вадёвы’ паю’ мандал’ поӈгана юсидаӈаха’. Хабарта’ су’’ляко, пыямда небяханда тильтехэя, яля сэв ядён’ хонаравы’’. Сидди’ пяванда мая’ ханяд товам’ намдаванда е’’эмня, небяда ӈэвамда тю’’у’ илахая юседа, ӈули’’ сававна хусувэй се’’нан’ инзеле. Ханяна таняна ӈули (се’’наси) сыӈгоси. Тарем’ инзелебта, Неру поӈгана лохорта сю’’лармонда. Пэдара’ лэ’’мороко хабарта’ ӈэва ний пя’ таркан’ ӈамдавонда, сёмда хана. Лэ’’мор’ муно’’ма ихинанда сава. Теканда хахаяда яхана пилю’’манда яӈгу. Яхадей’ ида таӈгамй’’ ӈэвамда нибкамлахая хонарэй’’.

Лэракабт’ ӈамгэхэв ейӈганда сита тирциде. Пыда ныдамй’’. Ӈамгэ хадкэ? Ӈамгэхэрт нивы хадкэ’’ . Нюкцяда сидёвы, ябтакоця ӈэта ни;’ юркота пявэда. Ӈэта ни’ юркаван’ харва ханзели’’ ханӈа. Лакри’ хаця’ санахая ӈэта ни ха’’мы. Небяда ӈод’’ юркана нюмда манэць няркома, ӈобтарем’ юркы.

Нумда пэвсюмя’ ӈэсонд хабарта’ су’’ляко тапаёркава, хаця’’ ядэрць туху. Небянда пумна няватарка пябта тапхалцеты’’, ӈани’ юркасеты’’. Небянда пуӈэхэ’’ пыянда малари тэворӈа. Нерденя’ ялэди’ лохорта лабтахы паю’ мандало’’ поӈгана иле мэ’’яди’. Яля’ пэдара’ тид’ ханзохона синдарёсетыхы’. Ялэмдакана пэдара’ вынд’ хадырманзь хэсетыхы’. Тетимдей ялянди’ пэвсюмзь, хабарта’ яхадэй нюнда ня’ пэдара’ вы’ няку хадырманзь пяди’. Мале неновна пэвсюмя. Тарем’ мэнаханди’ пи’ мал’’ тяхад минюй иры ӈадимя. Пэдара’ вы’ минаханда ялэма. Пи’’ тид’’ я’ сяр ни’ хамыд’’.

Хабарта’ яхадэй мында мале мэда. Ӈаркая хады’ хэвахана ну, нюкцяда ӈод’’ инда ватовна ӈамя. Хури’ хэ’’нёкоко. Пэдари’ тер’’ немато паӈом’ мэ’’ӈа’’… Лакри’ мерця нимнебтей’’. Яха’ лабта’ няд ханзомы япада индад’ ӈабтм’ тэвра. Хуркари’ ӈамдэдо’’ ӈабт’ лехэда’’… Яхадей ӈэвамда мерця’ ӈабт’ ни’ ӈосабтада, япада е’’яда индадм’ ӈэхэлӈа. Лэракабт’ тосалй’’. Ӈэвамда тю’’у’ илада. Ӈамгэдо ӈабт’ помна тосакабтада яӈганя ӈабтм’ намда. Нюкцяда ӈамгэхэртаха’ нись тоса ӈаворӈа, ӈопой лыб’’ӈада. Теканда савамбаковна тасламба пяда, яӈганя ӈабт сахамданабатав, нибтав.

Мерця ӈабт ӈани’ лехэда. Тадахава хабартар сававна таслада, намдавы тосакабтада ӈабтада ӈоб’’ сахамдана. Сиди пяванда мая’ хахаядараха, тальняри миӈа…