Параӈода’ харад’ вэкана, няби вэта левсей хардакохона маӈгабада луца илевы. Ӈамгэхэрт ӈамгэда яӈговы. Ӈопойри вано савада, полен’ хэв пыркабтадо’’ӈа, хыдяда пя яндавакода. Хусавэй яля’ хоркы’’, тэваси’’ есъе мярыби. Хоркыци хадасеты, тикыда ӈавараданда ӈоворцетыда. Ся’’ны ӈэбта ӈод’’ есъеда манэ’’манзь хая. Есаӈгата ӈобкарт тэваси, хоркы нивы ерев’’. Идя ядэрӈа: – Мякани иб’’ хандадм’, мяканани ӈамандами яӈгунё’’. Ӈари’’ нерняку’ манэкарцяв.

Яданаханда еся салика’’ям’ манэ’’ӈа. Салика’’я’ тяхад ӈоб’’ нялодана ӈадимя. Маханда ниня паркасяда хабей’ не тиби. Сидя еяӈгад ӈумбая’ пакласетыда. Явола’’я ма’’нив’: – Вано сава, си’’ми няда’’. Та’ ӈыда ӈэбта хавандарахадм’. Тикы едяр тарси’’ са’’мы.

Вано савар я’ ӈаркадамда хо’’манзь хая. Тарем’ миндяханда неро яхам’ нярахала. Ӈыл’ няю’ ха’’аврада. Танянанда неро яхакода ямд’ ӈадаравы. Хэ’ сюр меӈга танявы. Тасий марахананда хуркари’ падвы’’ пэ ёльце ӈока’’. Тикы’’ пэ’ поӈгана еся проволок’ саноръ’’я юседавы. Вано савар ма’’нив: – Синий, си’’ми нядахар’’. Пыда Вано саван’ ма’’нив’: – Хар’’ни тутадм’. Ялй’’, пуня’ сырӈа: – сытоӈга’ санор’’ пумнанда манара миӈа. Еся саликан’ тэвъяха’. Еся сытоӈга’ санорм’ манэкава паркасяда хабей’ не тэри тэмзы’’. Сейда хадри’’ хэняраха. Хабей’ нем’ питаро’’махаданда Синий ӈани’ха. Пыди’ сидяриӈэ хаихи’. Явол’’я ма: – Си’’ми илебте’’манд е’’эёӈэ сит нядаидм’, илебцадамд таидм’.

Вадида вадесо’’маханда Явол’’я хая. Вано сава есъета сер’ялй’’. Хоркы’’, тэваси’’ есаӈгата тэри таркавыд’’. Си’’ив яля’ иле. Ханесэйда хусувэй яля’ есаӈгата таркаӈга’’. Ӈавормари сер’’. Ся’’ны ӈэбта ӈод’’ сидя солдат параӈодахад товэхэ’. Манзь ханади’: – Параӈодава’’ хаӈгулы’’. Пухуцяда илебянда пелям’ ваворӈась. Параӈодам’ савумданан’ тикы’ хавана не нюмда ваторпи. Маси’’ пыдар, Вано саваӈэ пиртанакэр? Ӈанихив’’ мал’ выдара’’. Параӈода’ мят’ ӈобкана хая’’. Танянандо’ тэвыд’’. Мят’ мятю’’. Тарем’ сырпата – параӈодам’ Явол’’я пявэда. Маханда ниня тибё ӈумбаяхана ейӈгад матидесетыда. Вано савам’ манэць Яволда хая. Пыда параӈодам’ харданда мюмня ядэлабтамбида. Ӈамгэ’’ пирка’’на параӈода савума. Вада’’ тарця’’ ӈэсо’’ма: параӈода я’ илебянда пелям’ Вано саван’ ми’’ӈада. Не нюмда ӈани’ ми’’ӈада. Параӈода миртяхата ма: – Вано сава’ пэ хардад сертада’’. Харданда пеля хардахадани перея. Тарполавада хардани мюмня ӈэя. Тиканда пуд миртя’’ хардадамди’ серта’’. Параӈода’ не ню’ ня’ пэ хард’ мюня илеӈаха’. Тюб’’ти’, тарпабати’ параӈода’ лабэ’’мана хэсетыхы’. Илевари’ сер’’. Мале сян ялям’ мэсо’’махаданди’ сидя солдат ӈани’ товэхэ. Манзь ханади’: – параӈода’ марцяхы хаӈгулы’’. Ситя савумданан’ илебцанда пелям’, не нюмда ваторпи.

Тад хая. Нерэнда тотрев’ параӈода’ марцяхым’ Явол’’я пявэда. Нинянда ӈамдё ӈумбаяхана ейӈгад мадембида. Ситя нядабада нямна хэвняку’ питарӈада. Параӈода’ марцяхым’ ядэлабтамба пяда. Тарем’ мэнаханда харта савума. Хабця’ тэри юху, параӈода’ марцяхым’ ӈэта ни’ нултада. Ватормы илебця’ пелям’ ханада. Параӈода’ марцяхы’ не нюм’ ӈани’ недана мэда.