Хэвхы округхана харто’ вадамдо’ мэта хибяри’’ яндаха’’на манзара’’. Харто’ вадамдо’ тю’’у пэртя хибяридо’ ханярина таня’’. Елена Николаевна Окотэтта маля ӈарка хибяри. Пыда илеванда ямбан ӈацекэхэ’’на манзарась, нюдяко ӈацекы’’ е’’эмня падвы манзаида тянё ни’’ӈа’’. Сидя ёнар’’ юдимдей похона Елена Николаевна « Лаханако’’» таремъюв’ нюмдевы книгада’ тарпыць. Тикахана ӈацекы’’ е’’эмня таславы лаханако’’ ма’’лавысь. Сидя лаханаком’ тюку яля’ ӈацекэхэ’’та толада’’.

Ябто

Ханена есанд’ ябто еремы. Ябто ханенам’ манэць, ня’’лыторць пэй:

- Си’’ми  ӈэдара. Ӈамзами, нянзкоми сабе яӈгу. Си’’ми ӈэдарабат мань сава вади хэтӈгудм’. Ханена ма: - Ӈэё.

Ябто ма: - Савамбовна инзели. Яӈгода ӈамгэрим’ нёр сяй.

Ханена ма: - Ненэся тарця. Ябто ма: - Няби вадами ти. Хэвы серо пуня’ нид сюрхалеӈгу. Ханена ма: - Ӈани’ ненэся. Ябто ма: - Няхаромдэй вадани савамбовна инзели. Сияк’’ вадаха нён’’ инзели.

Ханена ӈани’ вахалй:- Ненэсяри ӈод’’тарця.

Тикы вади’’ пуд ханена ябтом’ ӈэдарада. Ябто тода мярабта, ханена’ ӈэва’ нимня сюра. Тадикахад хане­на хэваркан’лахаця’ни ӈамды, вахалй:

- Ханена, няна’’ са’’лананё. Ханзер’’ си’’ми ӈэдаран’? Нерцю тыра’ ӈap солотой ютекм’ паледамзь. Си’’ми ӈамы ӈэбат солотой ютекм’ хоӈгурась. Пареӈгодан мирдатарась. Ӈули’’ саць тэтаӈэ хантанась. Ханена ида вома.Тарем вахалй:

- Ти, са’’ладамню. Ӈамгэ сит ӈэдарадм’. Ябтококо, таля. Нянани илеӈгун. Сит минартадм. Ӈобкана ӈавортани’. Сит ӈули’’ мэнеӈгудм’.

Ябто письлы:- Ханена, пыдар ненэся ӈод’’ са’лан’ ӈэвэн. Ханзер’’ мань вадини юрыд? Яӈгода   ӈамгэрим’ нёр сяй. Ваеравы сер’’ пуня’ нир сюрхалеӈгу. Сияк’’ вадаха нён’’инзели. Мань сит не’’эльтедм’. Ханяд ӈадимта солото ютек? Ханзер’’ пунрэй’’ен.

Тикы вадита’’ пуд ябто тир’ тяхана сэя.

Я’’авлада писяко

Яха’ мюмня ӈо сэр’’я хайна. Я’ варувна писяко сюрби. Писякор тёрена:

- Ӈо сэр’’ёв’’, пинякумнов! Саля’малхана пидяв таня. Пидяв нён тахабта!

Ӈо сэр’’яр манзь ӈуркада:

- Ӈоб’ манзадаб’’нани, нисетыдм' манн’’, пидя таненакы.

Писякор ма’’нив’: - Ӈарка’’я ӈо сэр’’еков’’! Ӈамгэ’’ ехэданд ӈаркаданан’’? Хаер’’ тарпаб’’ тэри юӈгун.

Тарця вадаха’’на ӈо сэр’’ мунзялма.

Хаер’’ вахалъй:

- Писяков’’, писяков’’! Няна’’я’ ни’ хаянаню’’, няданд ӈарка нямд мунзялмден.

Писякор ма’’нив’:

- Хаерэця’’ей’’! ӈамгэ’’ехэданд наркаданан’’? Тири’’ тоб’’ тэри тири’’ тяхамдан.

Тарця вадаха’’на хаер’’ мунзялма.

Тирар вахалъй’’:

- Писяков’’! Писяков’’! Няна’’ я’ ни’ хаянаню’’, няданд нарка нямд мунзялмден.

Писякор ма’’нив’:

-Тирко’’ей’’! Ӈамгэ’’ехэданд ӈаркаданан’’? Мерця’ тоб’’ Ӈарка пэ’’ӈэвахана’’ тэри лядӈгалтын.

Тарця вадаха’’на тирар мунзялма. Мерцяр вахалъй’’:

-Писяков’’, писяков’’! Няна’’ я’ ни’ хаянаню’’, няданд ӈарка нямд мунзялмден.

Писякор ма’’нив’:

- Мерцяко’’ей’’! Ӈамгэ’’ехэданд  ӈаркаданан’’? Лахацие’’ ваӈган’ тэри ёходан, ханяхарт’ хэ’’мяр яӈгода.

Тарця вадаха’’на мерцяр ӈо’’ мунзялма’.
Писякоця’ тарем’ пыхы’’лёдаханда пидяконда ӈо’’марида яда.

Елена Окотэтта падвы