Тюку по’ «Лучший учитель родного языка и родной литературы – 2024» всероссийской конкурс’ Татарстанхана ваерась.
Ненэцие’’ автономной округхадана’’ Ома ӈэсыхы’ школахана манзарана тохолкода Юлия Бобрикова таня ӈэдалёрӈась.
Юлия Анатольевна, тохолкода высшей категории, округна’’ педагогической мастерство’ «Профессионал года-2024» конкурсхана «Учитель родного языка и литературы» номинацияхана нердевы.
Вверавы’’ яля’ пиркана Юлия Анатольевна Бобрикова Казаньхад тось.
– Мань нертеймэвна тамбир’ ӈарка конкурсхана мэдамзь, сейми’ пинаркась, ими’ саць няркнась. Ненэця’’ вада урокм’ минредамзь, урокханани’ ӈацекы’’ харвась манзараць, ӈока ненэця’’ вадам’ тохолаць. Маня’’ ӈэрм’ яна’’ нямна лаханадамзь, ӈакекэхэ’’на’’ намдвэдо’ мал мэкадась, урок’ пуд’’ хэвхани’ турӈаць, маня’’ яна’ нямна хонарковадо’ ӈокась, сими’ хари’’ нядрев’ севолпиць, – конкурсхана мэвы тохолкода тарця вади’’ мэ’’ӈась.
Татарстан республикахана мань’ вэба’’ ирий 17 яляхад 22 толыр’’ ӈэсонд’ мэдамзь. Таняна хусувэй тохолкода родной язык урокм’ манэ’’лабтась, тикы’ хавна ӈацекы’’ е’’эмня хибя внеурочной мероприятием’ хамадась, хибя харвана мастер-классм’ манэ’’лабтабись.
Тюку по’ Всероссийской конкурсхана Россияна’’ 79 регионхат, 36 хари’’ вадамдо’ минрена’’ 112 тохолкода’’ манзараць. Маня’’ яханана’’ хуркари’’ вадавна лаханана’’ хибяри’’ ӈока. Сяӈок’ тэнз’’ мэта хибяри’’ Россиянана’’ иле’’, тикым’ Татарстанхана ма’’лёвы’’ тохолкода’’ манэ’’лабтадо’. Тарця тохолкоди’’ поӈгана ӈэрм’ яхана илена’’ толыродо’ тянё ю’’ вадам’ минрена’’ таняць.
Тарця конкурс’’ таневам’ маня’’ государствова’’ нерня’ минреда, хари’’ вадам’ мэта’’, нерня’ минрена’’ харто’ культурамдо’, историямдо’ тамна тяха’ таневабнандо’. Традициидо’ тамна тяха’ минребнандо’.
Казаньхана ваеравы конкурсхана тюку по’ нердевы’’: Светлана Раданжапова, нюдяко ӈацекы’’ тохолкода, бурятской вадам’ минрена, Улан-Удэ маркад, Бурятияхад; тамна Алия Ишдавлетова, Уфа маркана башкирской детской сад воспитатель, Башкортостанхад.
– Хэтась тара, тарця конкурсхана мал нердець. Хусувэй конкурсант’ – мале нерденя! Хари’’ яханандо’ ваеравы конкурсхана нерня’ тарпыдаць, – Людмила Талеева, НАО’ региональной центр’ развития образования методист.- Юлия Анатольевна пэдава, маня’’ ява’’ саць со’’ манэ’’лабтада, урокада ёльце савась. И’ӈудота хибяри, манзаямда’ теневана, ханзоць манзарана тохолкода. Юлия Анатольевнан’ ӈарка вадам’ хэтбидм’, нерня’ манзараваханда хусувэй серк’’нанда мэбэ’’ӈая!
