Хойхана мюсерта’’, тэхэ’’на’’ мэна’’ хибярина’’ ӈарка ялямдо’ мэ’’ӈа’’. Пилю’’ ирий’ няхарамдэй яляхана хоян’ нертей тиртя’ ӈано’’ тийдаць.

Маня’’ яханана’’ тэхэ’’на’’ мэна’’, хойхана мюсерта’’ ненэциена’’ мале ӈока по’’ ямбан’ хэбидя ялямдо’ мэцеты’’. Тикы е’’эмняндо’ сямянд ӈарка яля’.
Округханана’’ ӈахы’ похот хой’ тер’’ ненэця’’ ныланаванзь ма’’люрцеты’’. Ӈобкана ма’’лась по’ ямбан манзаравидо’ тасласеты’’, нерня’ манзарава серудо’ манэ’’сарцеты, поӈгнандо’ пирдырцеты’’, мядоманзь нидо’ тосеты’’, перенидо’ хобсеты’’.
Ты яляхана тэхэ’’на’’ ӈэдалёрцеты’’, сямянд’ ныхытидо’ нюмдебасеты’’. Ты ненэцяӈгана сямянд’ тарана’’, ненэцие’’ ил’ тэхэд пере. Тэхэ’’на’’ ненэця’ ӈэдалёрӈа’’, ты ненэцям’ ӈавламбида,ембпида… Тэхэд ӈэрм’ ненэцие’’ илевада нерня’ миӈа’’.
2007 поход округханана’’ Ты яля’ яна’’ хэбидя яляӈэ таславы. Хусувэй ӈэсыхына, маркана илена’’ хибяри’’ Ты ялям’ ӈатесетыдо’, ӈарка яляхана хойхана манзарана’’ хибяри’’ ма’’лабсеты’’.
Пилю’’ ирий’ няхарамдэй толыркана нертей тиртя’ ӈано хоян’ хаяць. Тюку по’ ненэцие’’ мюсерта’’ ян’ тиртя’ ӈанохона тарана ӈавори’’ тэвраӈгу’’, ӈавар’’, мядонзэй’’ ханаӈгу’’. Тюку по’ хойхана илена’’ ненэциена хэбидя ялямдо’ харто’ мэтадо’. Ехэрана хабця’ нид’’ маркад, ӈэсыхыт товы’’ мядондидо’ яӈгуда’’, хыно’’та’’, тарана’’ хибяри’’ хоян’ нид’ тэвӈгу’’.
Ненэця’’ ӈарка яляханандо’ поӈгнандо’ пирдырта’’, хан’ тя санарта’’, тынзям’ моепаӈгу’’, сюрберта’’. Сямянд’ ӈатенадо’ – тэхэ’’на’’ ӈэдалёрма’’. Варёмдо’ мэць’ ныланаӈгу’’.
– Теда’ хойхана мюсерта’’ ненэця’’ едэй хабцям’ ехэрадо’, пыдо’ хаӈгула’’ нибнандо’, мято’ тер’’ сенз’’ ӈэбнандо’ маня’’ нядана’’ пере’’. Ӈодьбянда хоян’ тюку по’ ӈока хибяри’’ ни’’ хант’’. Маня’’ енава’’, хибярина’’ тарця серм’ хамадабидо’.
Тюку яля’ Канин выӈгана мюсерта’’ нина’’ нылана’’. Мядондито’ поӈгана Василий Ананьевич Канюков, пыда илеванда’ ямбан’ тэхэ’’на’’ манзаравы.
– Ты яля’ – е’’эмняна’’ сямянд ӈарка яля’, хэбидя яля’, – вадамда ветеран Василий Канюков ханада.
Пыда тэхэ’’на’’ манзарась пябнанда тет яӈганя пота’ хасавакось, 19 похонанда мале ӈэсынандо’ бригадирӈэ таравысь. – Ӈока по’’ ваера, ханзер’’ илеваць, манзараваць хусувэй ялямда тененархадм’, – Василий Ананьевич ибедорӈа. – Мал ӈобкана манзаравы’’ нин’’ тенеян’, хибя’’ сими’ манзаян’ тохолабись, хибя’’ ня’ манзарадамзь. Теда’ хардана иледм’, хусувэй по’ пилю’’ ирийм’ ӈатесетыдм’, ӈарка яляхана хоян’ ядэрцетыдм’. Невхы похо’’на’’, маня’’ мюсермана’’ мальӈгана хэбидя ялява’’ саць сававна мэцетыва’’. Тэхэ’’на’’ ӈэдалёрцетыва’’, мань’ ӈод’’ тын’ хамадабсетыдм’, ханяӈэхэна нердесетыдм’. Саць сава ӈэсеты.
Нюдя яхана мюсерта’’ ненэця’’ ӈод’’ ныланава ялямдо’ ӈатедо’.
– Маня’’ хойхана илева’’, тына’’ пэрӈава’’. Иринана’’, нисянана’’ ватовна илевава’’ мэ’’ӈава’’, – тарем’ «Вы’ ту’’» семейно-родовой община нерм’ пэртя Ольга Владимировна Явтысой лахана. – Теда’ хойхана манзарана’’ нина’’ иринато’ ватом’ лэтбась манзара’’, тыдо’ сахарамби’’, ямдо’ лэтамби’’. Маня’’ нисянана’’, небянана’’ пэрмы манзаи’’ нерня’ минрейна’’, пыдо’ няна’’ тыдо’ хаець. Тюку яля’ маня’’ тэхэ’’на’’ мэва’’, тына’’ лэтамбива’’, хари’’ илевава’’ тарем’ мэ’’ӈава’’. Пудана’’ нюна’’ миӈа’’, пыдо’ ӈобтарем’ тарем’ манзараӈгу’’, е’’эйдана хаюда’’. – тарем’ ӈэван’ енась Ольга Владимировна вадамда минреда. – Тюку по’ ты ялява’’ «Ялумд’’» общинахана мэтава’’. Таня тикы яляхана манзаяхад ныланана’’ тыбэртя’’, мяд’ манзаи’’ пэртя не’’ ма’’лаӈгуд. Нина’’ манэ’’тава’’, Саляхад тэвравы юн’ намдаӈгува’’, тикахад пирдыртава’’, тэхэ’’на ӈэдалёртава’’.
«Няръяна ты» СПК’ тыбэртя’’ тюку по’ пилю’’ ирий’ няхарамдэй яляхана ныланаць. Тиртя ӈанохона ненэця’’ хоян’ манзараванзь хаяць. Ӈарка ялямдо’ мэ’’махад хусувэдо’ харта ӈэсынанда ханта. Герман Ардеев тэхэ’’на няхар’’ юкад’ вата по’’ ямбан’ манзара, тюку мэвахана хоян’ танэй.
Пыда ямда теневана хасава, тынзям’ моепава серкана мел’’.
– Маня’’ паӈгхадана перена хибяри’’ пирдырма’ серкана ныхыцеты’’, тарем’ ӈахы’’ похот миӈа. Тэхэ’’на’’ ӈэдалёрцеты’’, тынзям’ моепасеты’’, санарцеты’’, нисеты’’ хаюр’’. Нисяв’ Чемпион округа по национальным видам спорта нювм’ мэ’’ӈась, спортхана я’’авладась.
Теда хоян хаядм’, таняна мэна’’ нин’’ нядагудм’. Тюку по’ таӈы ямбан’ ядемби, ты’’ паде’’. Хойхана нядаӈгода тара. Хэбидя ялям’ мэтадм’, тикахад манзараӈгудм’!