Вы здесь

Форум’ ваераӈгу. Фестиваль’ мэтава’’

 Перевод на ненецкий язык

Вэба’ ирий пудана яля’’ пиркана Москвахана ӈэрм’ тэнз’ мэта ненэця’’ ма’’лёванзь ятна. Ӈэрм’ яхана, Сибирькана, Дальний Востокхана илена’’ толырто’ тянё ненэця’’ ӈарка ассоциация’ юбилейм’ мэ’’манзь ӈарка март’ тута’’. Ассоциацияна’’ 30 пода паны.  Ӈарка ялямдо’ ненэця’’ вэба’ ирийхана ӈобкана ма’’лабнандо’ мэтадо’.

Тарця юн’ Всероссийской общественной организацияна’’ юн’ падабада’’ нина’’ тэвраць.
Ассоциацияна’’ президент’, РФ’ Государственной Дума депутат’ Григорий Ледков тарем’ лахана: – Едэй ӈадимы хабця’ нид ассоциацияна’’ юбилейм’ ёльцьхананда ниваць мэс’’. Ханзер’’ теда’ сер’’ миӈа’’, маниева’’. Янамбовна юбилеян’ хамякува’’. Тад’ нерня ехэрана хабця’ яӈгобнанда ма’’лёвава’’ ма’’лаӈгува’’.
Тамна хэтась тара, вэба’ ирий 23 яляхад 27 толыр’’ ӈэсонд Москвахана «Сокровища Севера» Международной выставка-ярмарка ваераӈгу, РФ’ ӈэрм’ тэнз’ ненэця’’ фестиваль «Кочевье Севера» мэта’’.
Ма’’лёвам’ хамадамбада’’ вадавна, Россияна’’ еркы март’ ӈэрм’ яхад падтаӈгода’’, ӈудидо’ мэта’’ ненэця’’, харто’ серкнандо’ я’’авлада’’ ӈацембой хибяри’’, общественной организация’ манзаи’’ нерня’ минрена’’ ненэця’’ тута’’.
Тамальӈгана концерт’’ ваераӈгу’’, ассоциация’ манзаяхана пон’ манзарана’’ сава вади’’ намдаӈгу’’, мядонзэй’ ня’’мгу’’.
Общественной движение’ манзая ветеран’’, ӈарка ненэця’’ таняна манзараӈгу’’.