Носиндалава ирийна си’’ивумдей толыркана «Няръяна вындер» газетана сиднтет ю’’ самляӈг пода панысь. Тюку по’ февраль’ ирийхана сидя ю’’ самляӈг поӈэ’ хая’’ ханзер’’ округханана «Ялумдава» ӈадиберӈа’’. Маня’’ газетана нямна нина’’ тарця вади’’ хэтби’’.

Ледкова Ф.Х.

– Хар’’на газетава пилибт’ толабасьтыв’,ӈатесетыв’. Теда, ветеранӈэ’ няна,газетава есяси’ табидо’. Тюкоход’ хуркари юн’’ намдурнава’’, газетахад’ теневасьтыва’’ хурка сер’’ яханана таневыць. Культура юн’’ ивнян’ ӈэсьты, сельской хозяйствона серудо’ ханзер’’ миӈа’’ теневаван’ харвасетым’. Харн’ саць пон’ сельской хозяйствона манзарамась. Хибяри’’ е’’эмня падвы’’ сава ӈэсьты’’, хурка ветеран’’ яханана иле’’, ханяна пыдо’ манзаравыць газетахад’ теневасьтыва’’. Нерня сырта ӈацембой хибяри нямна паднава ихиня саварха’ ӈэсьты, ӈацекы нямна паднава.

«Ялумд» страницава саць тара’’ӈов. Тарця хибярина тамна таня, хуний ненэця’’ вадавна толанзёвам’ харва’’. Мань’ ӈод пилибт’ толабасьтыв’. Харн’ сававна лаханам’, хамадабив’ ӈамгэм’ таняна падбида’’. Сава сер’ сертабида’’, ӈоб нерня тарем’ манзарада’’.

Сенда ӈада’’, тад’ нерня сомбоковна хибяри’’ е’’эмня паднада’’, илебцара сава ӈэя, ты’’ тартарев’ лимбяка ӈэя.

Баркулёва Н.И.

– Газетава ихинян’ саць сава ӈоб. Харна’’ газетава тобта, нерде ненэця’’ вадавна падвыд’ пюдаресьтым’. «Ялумдава» толабасьтыв’, газетава саць мэнев’. Нерня тарем’ сомбоковна миӈая. Наӈгадя газета ӈэбнанда тамна саварка ӈэӈгусь.Вадам’ теневанаӈэ’ няна’’ таня ӈамгэм’ вадець, таня ӈамгэм’ падбась. Харн’ вадав саць со теневав’. Тюку яля’’хана манзаранаха’, газетана паднанаха’ мададм’: сензда ӈада, нида’’нядабась сомбоковна нерня манзарада’’. Саӈго’’вота яляха’’ната хибяри’’ няку ядась’ пэрӈада’’, лаханась’ пэрӈада’’. Ӈоб нерня нида’’сомбоковна няць манзарада’’. Сидна’’ нёда юрбю’’.

Талеева М.И.

– «Няръяна вындеркова» ханзер’’ мань толаӈзё тухум’ пилибт’ толабасьтыв’. Ненэця’’ вадавна ӈэда страничкава – тикым’ пилибт’ мядонзэйӈэ’ мэцьтыв’. Тикахана мань’ падвын’ танесеты’’, харн’ паднасетым’. Газетана ӈадимы ялям’ ӈарка ялядарев’ ӈатесетыва’’. Тохолкодаӈэ’ манзаранаӈэ’ тикы газетава стол’ ниня ӈэда’’ книгархава’’ ӈэсьты. Пудана’’ похо’’на ӈацекы’’ сабе ни’’ лахана’’, толанзё’’ ехэра’’. Мань’ харн’ толаӈгосьтыдм’. Ханяӈэна вадако’’, мэкад’ падвы танебнандо’ падвыдо’ мадасетын’, ӈока газетам’ тэмдасетым’ ӈани, хусувэй ӈацекы’’ толанзёва вадида танябнандо’. Тикахана цепочкавна толанзёсьтыва’’. Ӈопой ӈацекы’’ толанзёда’’, нябю ӈани’’ переводчикна’’ ӈэсьты’’. Ӈацекэхэна тикы мэкадарха’ ӈэсьты.

Газетан’ паднасетыдм’, нянан’ маймбцо сер’ ӈэ’’нив. Вы’ янана илена’’ хибярина е’’эмня, тыбэртина’’ е’’эмня, ханзер’’ ява’’ мэнева’’, тохолкода’’ нин’’ е’’эмня, ӈацекын’ е’’эмня харвась паднасетыдм’.

Газетахана манзарана’’ хибярихи’’ мададм’. Нерде нянд’ саць сава вади’’ хэтван’ харвадм’: сяӈгова мани’ ӈобкана газетана манзаранись’, Валентина Артемьевна отпускан’ хэвахана. Тикы’ пуд, мани’ саць сава няӈэ’’ хаяни’, нини’’ хамадабини’. Харвам’, тем’ нерня газетава’’ пилибт’ танябта’’. Маня’’ маймба няюнд’ туртава’’, ӈамгэ’’ падувда танябта паднагува’’.

Дуркина С.П.

– Мань’ газетава толанзё тухум’ тикахана манэ’’ӈав’, толанзёсьтыдм’, ёльце газетава мэнесетыв’. Янда’’на маня’’ тоходанбэва’’, Варандэна, Пэ’яхана, Оксинохона, тикахад маркана Лесозаводхана тоходанаваць. Ханярина теневана’’ хибярина таня, ханярина манзара’’ пыдо’ е’’эмняндо’ падвы толабась ихиня сава ӈэсьты. Таняхад’ намдсетыва’’: ханзер’’ хибярина ӈэсыхына иле’’, ханзер’’ хибярина манзара’’, ханзер’’ школа’’, клуб’’ манзара’’; ханяна едэй харад’’ ӈадиберӈа’’. Мань’ культурахана манзарамась тамальӈгана. Хуркахова ӈэсыхына едэй клуб’ сертабнандо’, маймбасьтыдм’. Нина’’ сава хардахана манзаямдо’ минреӈгудо’. Мань’ ӈод ӈопой по’ ненэця’’ страницам’ газетахана пэрӈамась. Сими’ Валентина Артемьевна Ханзерова тохолабись. «Ялумдава» нерня тамна пон’’ илея’’, маня’’ нюна’’ ню’’ ненэця’’ вадавна толабабнандо’ тарцян’ тэвъинаць.