Маня’’ яханана хойхана мюсерта’’ нина’’ хэбидя ялямдо’ мэ’’манзь’ пилю’’ ирий’ нюртей яля’’ мальӈгана ма’’люрцеты’’. Ты’’ ялям’ тарем’ маля самляӈг юкад’ вата по’’ ямбан мэ’’ӈава’’. Хойхана илена’’, манзарана’’ нина’’ тарця серт’ торомы’’.

Хэвхы округхана мюсерта’’ ненэця’’ ӈани’ ты’’ ялямдо’ нара мальӈгана мэцьтыдо’. Я’мал тер’’ ненэця’’ ты’’ ниць ёльць’ тэвва’’ нерцюна ӈобкана ма’’ласьтыд. Поӈгнандо’ пирдырцеты’’, нито’ няюв’ нерня илевамдо’, тыдо’ пэрмам’ таслабсеты’’. Сямянд’ нюртейӈэ’ Шурышкарский районхана мюсерта’’ ненэця’’ ты’ ялям’ мэцьты’’, сямянд’ пуданаӈэ’ Тазовский район’ Гыданский выӈгана илена’’ ненэця’’ ӈарка ялямдо’ мэ’’мась ма’’ласьтыд’. Хойхана илена’’ ненэця’’ тарця яляхато’ хамякосьты’’, ӈарка ялямдо’ ӈатесетыдо’. Хасава’’ тыдо’ хамадабсеты’’, не’’ едэй сэдвы манзаидо’ манэ’’лабтаван’ харвасеты’’. Сямянд’ мэбетидо’, сямянд’ мелдо’ нюмдесеты’’. Приуральский районхана мюсерта’’ маня’’ нядана сямянд’ хахаи’’, пыдо’ пэ’ хой поӈгана илена’’. Таняна илеванда ямбан Ольга Ивановна Тайшина иле, пыда ӈод” ӈарка ялямда хусувэй по’ ӈатесетыда. – Тарця ӈарка ялява хусувэй по’ танесеты, хусувэй по’ турцетыва’’, ӈока ненэцям’ тюкохона манэ’’цетыва’’. Хусувэй тарем вани ма’’люр’’ ненэця’’. Ӈарка яля’ мальӈгана валакада тэворӈа’’. Нидо’ манэ’’пи’’, тикада ти’ сава. Маня’’ Байдарацкий выӈгана мюсерӈава’’, хар’’на’’ тына’’. Хари’’ мядуна мэць илева’’, нина’’ няюв’ мал’’ ӈобкана мэва’’.

Надым’ маркана ӈод ненэця’’ ӈарка ялям’ мэцьты’’. Таняна маля сидя ю’’ по’’ ямбан тыбэртя’’ пирдыр’’ма ваерасьты. Луца’’ вадавна хэтась: соревнования оленеводов на кубок губернатора ЯНАО. Тарця пирдырман’ ненэця’’ ив’ ер хамякосьты’’. Тюку по’ тарця пирдырмадо’ маля сидя юдимдеймэвна ненэцие’’ ма’’лаӈгу. Тарця яля’’ мальӈгана тамна конкурс «Кочевая семья» танеӈгу’’. Ханяна яндахат’ товы’’ не’’ мел’’ ӈэвамдо’ манэ’’лабтаӈгу’’. Ты’’ саполана ирийна тетимдей’ яӈганя самлязимдей’ яӈганя толыркана Я’мал сян’’ районхана мюсерта’’ ненэця’’, Ханты-Мансийский округхад, Таймыр’ яхад’, Ненэцие Автономной округхад’ товы’’ хибяри’’ ма’’лаӈгуд. Ныхыдо’ хорпаӈгу’’, нидо’ манэць лахарёдо’ тянё ни’’ӈэӈгу’’. Маня’’ округна хибяри’’ ӈод’ таня ӈэдалэйдаць. Нельмин Носхад’ сидя тыбэртя, Красной ӈэсыхыд’ тет хибярива хаяць. Пыдо’ хэвхы округхана илена’’ тыбэртя’’ нидо’ манэ’’та’’, пыдо’ поӈгнандо’ пирдырта’’. «Кочевой семья» конкурсан’ СПК «Ерв» тыбэртя хая’’, тикы Александр Михайлович Ледков мяд’ тер’’, неда Валентина Федотовна, хасава нюди’ Вениамин. Мал’’ хойхана мюсерта’’, хой’ илӈгана илена’’, ты’’ илм’ теневана’’.

Округна Союз оленеводов манзаям’ пэртя Владислав Александрович Выучейский хой’ тер’’ нита’’ няюв’ Надымкана ваеравнда пирдырман’ хаясь. Я’малкана ваеравнда сянакован’ нина’’ тэворма нямна вадина падвы’’ ӈэӈгу’’.