Несь’ ӈэсыхына хойхана мюсерта’’ ненэцие’’ е’’эмня мядо’ сертамби’’. Едэй мивы’’ харадха’’на’’ тыбэртя’’, мяд’ манзаи’’ минрена’’ не’’ мяд’ терсавэй илевнда.

Округва’’ ю’’ тарця харад’’ тэмдаванзь ятна’’, – тарця юн’ маня’’ яна’’ нерм’ пэртя’ ма’’лёвахана округна’’ департамент’ строительства, ЖКХ, энергетики, транспорта манзаи’’ тасламбада Анатолий Фролов хэтась.

Хусувэй харад’ сававна сертавы ӈэбнанда тара, – тарця вади’’ губернатор’ Юрий Бездудной профильной департамент’ манзаям’ тасламбадан’ мась.

Ваеравы яляхана Несь’ ӈэсын’ едэй харад’’ манэ’’манзь ервуна’’ ӈэдалёрӈаць, хари’’ сэвхана хойхана мюсерта’’ ненэця’’ е’’эмня мивы’’ харад’’ хамандёвам’ хари’’ сэвхана манэ’’ма’’ е’’эмня. Хусувэй ӈамгэ’ хамадёбнанда, валакада тикахана округва’’ едэй сертавы’’ харад’’ тэмдаӈгуда.

– Маня’’ теневава’’ Несьхана хойхана мюсерта’’ ненэцие’’ е’’эмня мяду’’ наӈгадя ӈэсы’ вадысь. Тандая’ мимбась пябнандо’, манзаидо’ маниесь хибяри’’ харад’’ иба’ ӈэван’ сацьри нидаць пунрю’’. Саць мер’ сертамбада то’’олхаць. Ӈопой похона ненэця’’ таня илелпато’ тарась. Несян’ ӈэдалёрмавна вадам’ хэтаӈгуда’’, – губернатор’ Юрий Бездудной мась.

Несьхана едэй харад’’ ӈэсыхыд сидя ӈэдалававна ну’’. Тарця харад’’ тыбэртя’’ е’’эмня, очередьхана нуна’’ хибяри’’ е’’эмня сертавы’’. Тамна подрядчик’ харад’’ ӈэсонд’ сехэрым’ сертабнандо’ тарась.

Хойхана мюсерта’’ ненэця’’ харад’’ сертамбада’’ Няръяна маркана танеда ООО «Опора». Тарця харад’’ маня’’ яханана’’ сертабась серо’’ӈа’’, тарця хамадеркад’ мивы’’, хуркари’’ тецьдахана харад’ мюня иба’ ӈэбнанда тара’’.