Яханана пудана’’ юд’ мян по’’ ямбан тарця мэкад’ сер’ ӈадиберӈа’’. Хусувэй по’ Няръяна маркана «Буран Дэй» нюбета пирдырма танесеты. Тюку по’ ӈод тарця ялям’ мадаттаваць.

Марад’ хавна буранхана ӈэдалёрма’’ яля’’ тамна округна ханяӈы’’ ӈэсыхына танесеты’’. Тюку ирийна самлязимдей яляхана тарця ӈэдалёрма Каменкахана ваераць. Таняна сян’’ ӈэсыхыт’ товы’’ хибяри’’ ныхыдо’ хорпиць. Сямянд’ нердевы’’ мякандо’ мядонзэйсавэй ӈэдалэйдаць. Хаювы ныланава яляхана «Буран’ яля» Нельмин’ Саляхана ваерась. Таняна маля сян’’ по’’ ямбан тарця ялямдо’ хамандаби’’. Тюку по’ ӈод Салян’ товы’’ хибяри’’ тянё ниць’ ӈа’’. Ӈэсынандо’ хув’ мер музыка’ сось, яндахат’ товы’’ мядондидо’ саля’ тер’ нина’’ нянэй мякана ядабтабидось. Хынота’’, тарана’’ харто’ программамдо’ тарця ялян’ хамандаць.

Буранхана ӈэдалёрма серкана сямянд’ меретидо’ сомбой мядонзэй’ ханаць. Тюку по’ не поӈгана нюртей местам’ ханавы Ольга Ардеева, хасава поӈгана нердевы’’ ӈоб’ Саляхана илена хасава Андрей Петрашов. Тарця яля’ хусувэй по’ сававна ваерасьты’’, ӈэдалёрман’ харвана’’ ӈод хусувэй по’ нядоӈга’’. Теда хибяри’’ ӈани’ пом’ ӈатеӈгу’’. Тарця ялян’ маля теда хамякось пяӈгудо’.