Няръяна маркана музейно-выставочный центр’ харта мята’ таня. Тикы мякана ӈудидо’ мэта’’ хибяри’’ ма’’люрцеты’’, выставка’’ танесеты’’. Таняна ӈод’ хусувэй си’’ив маттамдэй яляхана маркана илена’’ мел’’ не’’ ма’’люрцеты’’.

Не’’ ӈобкана ма’’лась лаханакурцеты’’, нерня манзаравидо’ таслабсеты’’. Вадидо’ мэ’’мандо’ ёльцяӈгана тэри’’ тарем’ нисьты’’ ӈамдю’’. Вадидо’ мэ’’мандо’ поӈгана ӈудидо’ манзарасьты’’. Ӈопой нер’ наметком’ паркабаӈгу, нябиюмар’ ты’ пускэцям’ матурпаӈгу. Тарем’ не’’ маля си’’ив по’’ ямбан ма’’люрӈа’’. Теда таняна сэдорана’’ не’’ сиддо’ тохолавэӈэ’, ӈобт’ ма’’лавэӈэ’, сэдорава’’ серт’ тэвравэӈэ’ Екатерина Никитична Бобриковам’ нюмдемби’’. Теда клубхана’ мэна’’ не’’ нидо’ нюртеймэвна Екатерина Бобрикова мастер-классхана ядабтэйдось. Нюртей яляхад’ таняна ӈобкана манзара’’, теда ӈод’ хусувэй си’’ив маттамдэй яляхана таняюв’ маймбась’ турцеты’’ Галина Анатольевна Артеева, Людмила Васильевна Лаптандер, Маргарита Егоровна Латышева, Елена Киприяновна Чудинова; нянэй не’’ поӈгана таняюв’ ӈани’ тенз’ мэта не’’ ӈод харвась’ ядсеты’’. Ӈокханда пилибт’ ма’’люрта’’ юд’ мян не’’ ӈэдараха’’, пыдо’ харвась хусувэй манзаям’ сэдбась’ тоходана’’.

« Хойхана ханзер’’ не’’ сэдоравам’ няна’’ Екатерина Никитична манэ’’лабтась, сян’’ по’’ тяхана нюртей пыда’ тавы мастер-классхана ма’’лэйнаць. Сидна’’ сувенир’’ сэдба тохолабись. Тикы’ пуд ним’ паӈгалпавам’ Филипп Никитич Ардеев манэ’’лабтабись, таняна ӈани’’ ма’’лэйнаць. Тарем’ ма’’люрць, сэдорава серм’ харвабтась ӈобкана ма’’люрць идэйнаць, – Галина Артеева мась.

Тарем’ не’’ ма’’люрць пядось, сэдора’’, няхататто’ тоходана’’. «Маня’’ ӈока ӈамгэн’ тюкохона тухува’’, – Людмила Лаптандер тарця вади’’ хэтби. – Хусувэна харта сэдвы ной’ паныда таня. Маня’’ маля ӈани’ хибяри е’’эмня сэдорасьтыва’’. Тарем’ Архангельск маркана землячество «Тосавэй», Санкт-Петребург маркана «Нятва» хибяри’’ е’’эмня ной’ паны’’, мальци’’ сэдаваць. Ханярина мэбнандо’ ненэцие’’ яхад’ перевадо’’ ӈадьбата.

Нянэй не’’ клубханандо’ ӈани’ тенз’ хибяри’’ манзаи’’ сертабась’ ӈод тоходансеты’’. Хуркари’’ мастер-класс’’ таневахана пыдо’ манзарасьты’’, ӈока несэй едэй ӈамгэн’ тоходансеты’’. Таняна ма’’люрта’’ не’’ малӈэ’ мел’’ неӈэ’ нюмдембина’’. Теда пыдо’ манзаито’ выставка маркана танесеты’’. Тикы’ хавна пыдо’ ӈани’’ яха’ тэвормадо’ танесеты’’. Ӈани’’ яхад’ хусувэй тобнандо’ хуркари’’ диплом’ тэврасьты’’. Мел’’ не’’ ихивняндо’ ӈэда манзаидо’ харвась’ пэръядо’.