Носиндалава ирийна сидя ю’’ си’’ивумдей яляхад’ сидя ю’’ хасуюдимдей’ толыр’’ ӈэсонд’ хэвхы округна еркы маркана Саля’хардахана финно-угорский тензхад’ перена’’ ненэця’’ паднана’’ ма’’лёй манзарась.

Тюку по’ паднана’’ нябимдей яӈганя конрессан’ ма’’лэйдаць. Ӈокханда конгрессхана си’’ив ю’’ мян’ делегат’’ манзараць – тет ӈани’ параӈгода яхад’ Финляндияхад’, Венгрияхад’, Эстонияхад’, Францияхад’ паднана’’ таняць, тикахад’ Россия’ сидндет регионхад’ – Ӈысма Республикахад’, Карелия, Мари Эл яхад’, Удмуртияхад’, Пермский крайхад’, Ханты-Мансийский, Ямало-Ненецкий округхад’ хибяри’’ товыць, маня’’ округхадана паднана нява таняна манзарась.

Ханярид’ товы’’ паднана’’ сидя секцияна манзаидо’ тасламбидось. Нюртей секцияна манзаравы’’ финно-угорский мирхана ӈацекы’’ е’’эмня паднава серудо’ ханзер’ мимам’ манэ’’сарӈаць. Тикахад’ ӈацекы’’ тохолкова, вадамбава серкана хуркари’’ тенз’ ненэця’’ фольклор’ нядаӈговам’ ваде’’ӈаць. Нябимдей секцияхана ӈани’ луца’’ вадавна хэтась – « Роль детской литературы в образовании и изучении родных языков в образовательных учреждениях.» тасламбиць.

AFUL – ассоциация финно-угорских литератур ёнар’’ хасуюёнар’’ хасуюр’’ тетимдей похона ӈадимясь. Финно-угорский тенз’ ненэця’’ паднани’’ е’’эмня сертавысь.Тарця организация’ манзаям’ пэртя паднава’’ серу’’ нямна манзаидо’ тасламбидо’. Ваеравы паднани’’ конгрессхана Союз финно-угорских литератур президентха’ тэраць, тикы манзаям’ тад’ нерня Яношу Пустаи минреӈгуда, тикы хасава поэт, профессор; Венгрия Сомбатхей маркы университетхана манзара.

Лукерья Александровна Валей маня’’ яханана соявы, ненэцие’’ паднана. Харта янда нямна падна, падвыда няхар’’ вадавна ӈадимберӈа’’. Саля’хардахана ваеравы ма’’лёйкана Лукерья Валей маня’’ округхана ӈацекы’’ е’’эмня падбада литература’ нямна вадамда мэ’’ӈась. Хурка литература’ этно- культурный центрхана ӈацекы’’ е’’эмня ӈадимберӈа таняна манэ’’лабтамбидась.