Маньзьван хадан Пронтинда ня’ мэта вадахат ӈамгэхэртм’ нидм’ хамада’’. Нямюхунан мале юр’ мян’ юнра мэ’’эмда’’ вадин сюраць, валакада лахананаха’’ хэвняд лабцеӈгаванд вэва ӈэвам’ тенева, пыдув таб’’ламбивась. Хадан саць ӈока ӈамгэм’ теневава нихивад ӈули’’ пысамбидамзь.
Пронтир ӈудида нюрте’ мылахана масыда, тикахад ӈоб’’ пэнда терхана тялдэйда – ся’’яда хэткутнадрев’ ханзели’’вэкана, тикахад пыда ӈуданда хусувэй таркам’ сэр тохокана пэбтэйда, тол’ тяха’ ӈамды’’. Мал’ мяд’ мюй тибей енздей ӈабтхана паны. Сырпа’’нан, Пронтинд ся’’ мат’’манда пуд ӈод’’ яляркаӈэ нивы хань’’, тынрода валакада хаци’’ салмвыд’’. Ӈоб’’ пэнд терм’ хыди’’мана хамдсо’’махад, небява’’ ӈэрць харда’’лэй’’, хадахавава’’ Пронтинда ня’ нарнясавэй’ ӈэрпа пяди’. Тикахад лыдабтёва’ тахарув’ пыди’ ӈамзи’’ нибтя халэ ютек се’’ныбасьтыхы’. Сэв’’ вэӈгохона тикымди’ мань ӈо’’ небян хыдяхад палев – нян си мал’ ӈадамдархы’’, сён мюйм’ хибяхавар хар’ малхана енахалтархада, лэёр нянкони мюна ӈод’’ ӈаднанараха, хавон нер’’, пайдын морюмя, нёхов латы’’. Тикамд пуна мань тамна сидя мэва’ палев, хабтюв’’ хацяӈгава пин’ тарпыв’’. Варьяда ит парадавы сёми е, нянкони мюна лэё харпартарха, сёнзяхаваханан и’’лекаӈэ хая, ӈэн нюлма’’, ӈудин ӈод’’ нян ни’’ сабе инзеле’’. Мят’ салъюв’’.
Пыди’ хэвнанди’ хурцнанд яӈгоб’’ ӈод’’, хадава’’ Пронтинда ня’ тёрм’ няд’’миць лаханакуху’. Пронтинд мунзяламб’’, хадава’’ хыно’’ласьты’’. Нянан мядондава’’ хадана’’ ня’ са’’лимдарха’. Пронтир мер’ ӈамдё хонарэй’’, пыянда ӈыл’ мулнорць хыносо’’манда пуд хадава’’ ӈод’’ хонё налкада. Маньзьван теда’ нисяна’’ тован’ пудсялмэхэю хадава’’ Пронтинда ня’ мана’’-маханда сабе харвадм’. Нисява’’ валакада няби ялянда хубтахана ӈадимя.
– Уфу-у! Пыяня’’ам ӈабт! – пуня’ ӈэхэдась пыда варцеда, пихид мале вабцда тэвы’’: – Ӈавэда’’ тюкохона пэрӈадата’’?!
– Ни, Микул. Ӈамгэхэрт вуни ӈа’’. Тикы мань, Пронтидм, – ӈэвамда ея’ пан’ ӈыламна вэхэмлась мядондар вомдаларёйвана ма.
– Е’’эмняни’, Пронтиӈэ, пыдар харвабта нумн нибтя нибтя ӈылекаен ӈа’’, валакада… мань хибям’ ӈэвав пыдхавар нирув’ тенев’’!..
– Теневав, Микул. Теневав. Маньзьва – тэхэми’ хадкэ: ханув мальи, мэтин’ хая’’.
– Водкамд тикы… нялыбаха-ваб’’нанд – ӈэвамд’ ё’’мар ӈо’’ хубта вуни ӈа’’!
– Маньзьва, Микул, ханенан ӈэвамд ханяв тенев’’, пыдар сярканд ӈаб-тхартм’ вунин мине’’… юнуйхавар танда ня’ мал’ пывумдаӈгу’’ нидим’.
Нисява’’ Пронтирд ня’ валакада пихид лаханаку, иркыва’’ самляӈг тибянд хунхы варёнд ни’ несэйвана мярвана’’ ӈэсонд’ пыда мят’ ӈоб’ ни тю’’.
– Ханзер’’ тикы пыдара’’ паӈ-глутва идм’ ӈэрпира’’? – несэйвана мярвы мяд’ мюня ту’ харполаб’’ нисява’’ Пронтихинда хадахалё ма. – Мань нисяв ӈобтарем’ ӈэрпсадава, харкван тамна тиканд тэсхартамда нидамзь пале’’. Нив ӈод’’ пэрт’’! Ӈамтхартада тиканд мал’ сёнзян мюйм’ сядхалабадараха ӈэсьты.
– Нянанд – сава, маньзьван тиӈэрпив. эрпив. Яӈган тебӈгу – табаць ныхыв вуни таня’’.
Пэвсбмдёхона нисян вата ханан’ самляӈг тым’ подеромахад Пронтир ӈэдалэй’’. Маньзьван Пронтинд хавна тамна хибярит танява’ е’’эмня, нисян ӈамгэ варьяда идм’ нива ӈэрпва’ е’’эмня пондан’ юндарӈадамзь. Нисяхадан ӈокаркавна хибяхартанд ӈамгэм’ нива теневаван пунрё юнрасадама.
