Тюку ирийна нябимдей толыркана Красной’ ӈэсыхына илена’’ хибяри’’ ненэцие’’ культура нямна хамандавы ӈарка ялямдо’ мэ’’ӈаць. Нянэй ненэця’’ традиции’’, быт’’ теневана’’ хибяри’’ поӈгнандо’ пирдырӈаць. Культура’ хардандо’ сценан’ си’’ив хибяри’’ ныхыдо’ хормась тарпыдаць. Няхар’’ не’’, тет ӈацембой хасавако’’.

Не’’ харто’ паӈгудо’ ваде’’ӈаць, нюкубць’ сё’’ мэ’’ӈаць, сэдвыдо’ манэ’’лабтабиць, ӈодя’’ таром’ хэтбиць. Хасавако’’ ӈани’ пэдаваць. Нянэй ненэця’’ ӈэвадо’ ӈадись. Пыдо’ тынзям’ паӈгалпиць, хан’ тя санарӈаць, хурка яха’ округханана таня –тикым’ падбиць. Тикахад’ сямянд’ ныхытидо’ нюмдець – не’’ поӈгана нюртейӈэ’ Парасковья Выучейская хаясь., хасава’’ поӈгана нердевы Николай Ледков. Хусувэй конкурсана мэвы’’ благодарственной письмом’, мядонзэйм’ ня’’амась.

Сава программам’ маркад’ товы’’, «Ханибцё» группахана сянакода нина’’ манэ’’лабтаць. Залхана ӈамдёвы’’ хибяри’’ нина’’ сянаковам’ маниесь ихид’ маймбиць, письӈаць.

Конкурсхана Краснойхана илена’’ не’’ ныхыдо’ хорпиць, поӈгнандо’ пирдырӈаць. Пыдо’ няюв лаханамась, хусувэдо’ харта вадамда хэтась.

Парасковья Выучейская: – Хадав’ Соболева Парасковья Андреевна, Красной ӈэсыхына пыда илесь, ӈацекыда ӈокаць. Харта не, тикы’ хавна луца’’ вадавна, ӈысма’’ вадавна лахана теневась. Те’ няна нябаков’ мась: хадава сававна яӈгарӈась, сёда сава ӈэвысь. Саць сававна сэдорась, мел’’ не ӈэвысь. Хибяри е’’эмня сэдорасьты, сэдъида явлы пудякоцярха’’ ӈэсьты’’. Мань’ хадан’ нюв мэ’’ӈадм’. Хадан’ илм’ нерня минредм’. Ӈодьбянда хадан’ то’’олхадм’ ӈэван’ харвадм’.

Маня’’ ӈэсынана хуркари’’ конкурс’’ танесеты’’, мань’ нядагосьтыдм’. Тарця конкурсана нюртей мэдамзь. Тюку’ мэвахана пирдырмахана няхар’’ не’’, тет хасава’’ ӈацекы’’ сянакуць, ихиня саць саварха. Ихинян’ тикада саварха, хасава’’ ӈацекы’’ маць: маня’’ харвась конкурсан’ товаць. Хибяхарт’ сиддо’ ныхыри’’ нись’ хай’’. Мальцята тэри’’ яду’’сумби’’, ихиняндо’ савархась, нянэй ненэця’’ ӈэвадо’ ӈадись.

Майя Лаптандер: – Мань’ нянэй мякана соямась, ты’’ ниць ирий юдимдей яля’ со’’яма яляв’. Нарэйкоця яляхана соявэдм’, ялясь, ибась. Небяв’, нисяв’ хойхана мэнаць, маня’’ мал’’ таняна вадываць. Нисяв’ хану’’ сертабись; небяв’ сэдорасьты. Соболева Мария Павловна, Иван Александрович Соболев сими’ вадавы нисяв’. Харн’ нисяв яӈгумась, тамальӈгана хойхана доктор’’ яӈгуць, хаӈгулыць. Сими’ вадавы нисяв’ саць сава хибярись. Няхар’’ не няв, хасава няв таня. Небями’ сидна’’ сэдорась тохолась. Тяхакуна ӈокавна сэдорасьтыдм’, тедахова ним’ сэдора, сэвун’ вэва’’. Мань семьянан’ ӈобтарем’ няхар’’ не’’ нюв, ӈопой хасава нюв. Нись’ ӈакуна ӈарка не нюв хаюпась ми’’ӈамась, тюнтаваць. Ӈопой не нюв Краснойхана иле, вэсакода тэхэна мэна, хойхана мюсерӈа.

Тюку’ мэвахана конкурс’ мэ’’ӈаваць. Ихинян’ тарця ма’’лёва саварха ӈэсьты’’. Ӈарка яля’ мальӈгана сими’ ханьзьты тюкон’. Мань’ турцетыдм’, хибяри’’ поӈгана мэбнанд’ ихинянд’ ӈэсьты. Нина’’ тюкохона хобсетына’’, лаханакуртава’’ поӈгнана. Мань’ мечтав’ таня, листвиничка’ няна ма’’лаван’ харвадм’. Таняна ю’’ по’’ ямбан нимась’ мэ. Я’’авлы таня тэворман’ харвадм’. Невхэна ӈарка яляхана таняна ма’’лёсьтыва’’, хуркари’’ конкурс’’ мэцьтыва’’. Хибяри’’ поӈгнандо’ пирдырцеты’’, сэдвы’’ манзаина конкурс’’ танесеты, мел’’ хибяри’’ манзаидо’ манэ’’лабтабасьты’’.

Хибярина пирдырмам’ таслабдаӈэ’ жюри манзарась. Юлия Ледкова конкурс’ пуд тарця вади’’ хэтась: – Тарця сер’ саць сава сер’. Тюку то’’олха’’ конкурс’’ ӈани’ ӈэсыхына тамна танябнандо’ таминдя’ саварка ӈэӈгусь. Хибяри’’ ваде’’ӈадось: ханзер’ харто’ ямдо’ тенева’’, не’’ ӈамгэм’ сэдась тенева’’, хасава’’ хан’ тя санарӈаць. Мэкадась. Валакада тикада сацьри’ саварха’ нинархась’ ӈа’’: нянэй пивам’ мэтадо’ валакада сидямбёясь, ӈанидо’ театральной пивам’ мэтаць. Тикахад’ ӈобкарт’ ненэця’’ вадам’ нимась намд’. Ненэцие’’ илм’ ваде’’ӈаць, ембдяр’’ манэ’’лабтабиць хусувэй ӈамгэмдо’ луца вадаривна хэтбидось. Ӈодя’’ е’’эмня лаханаць, ӈоб’ луца вадаривна. Иб’ ӈод мал’’ пирдырмы’’ хибяри’’ нянэй ненэця’’. Сырмась’ товы’’ хибяри’’ поӈгана ӈод’ ненэця’’ ӈокаць. Ненэця’’ вадавна лаханавы’’ ӈэбнандо’ таминдя’ саварка ӈэӈгусь.