Ӈоб’’ сидя яля’ ваерахава ӈарка’’я не’ ня’ ӈани’ тэхэ’’на мэвэни’. Нями ӈамгэ тикы’’мана тэри лаханаку. Ӈани’ тарем’ ма: – Теда’ тай’ сыркар’’. Ӈока ты’’ поӈгана малк сюндым’ нирав’ мание’’. Нюдя нинеками илеванда мальӈгана малк сюндым’ юр’’ ты’ тяха’ ёӈго’’-лисетыда. Малк сюндым’ яркахавабат’ ханя сава ӈа’’.

Мань тарем’ мадм’: - Ярколахава ехэраеӈадм’. Ет’ хортанакэв.

Тикаринда ӈод’’ ӈарка’’я не есь’’ тахаравы тынзям’ танё’’. Тынзями саноць ӈарка’’я не’ малк сюндым хэвувнани танари’’ нидав’. Малк сюнды тохобэ ӈэвы. Тынзям’ манэць юр’’ нянда тяха’ тэсахалаӈада. Еся’ тахаравэм’ хасавадрев’ хэня ты’ пумна ханилебтев. Тарем’ сырапа’’ни сусанана мяра ёӈэнда тяхама. Вэта сакада. Ӈарка’’я не ёлида теклы: – Ёховы не нена’’ хынибэн! Нехэртан ӈэбтав’’. Хасавахаван ӈэ’’ридаб’’нанд, ӈоб’ тидпой’’ хасаван ӈа’’ма. Си’’ми неданд мы’’.

Мань ӈани’ мандм’: - Мара пыдъюл нехэртан ӈэбтав’’? Хасавахаван’ Нин хале ӈа’’? Ӈари’’ маньзяван сёбям’ нидм’ мэс’’!

Тарць’’ харахана не ервакоми вадам’ ни соя’’. Тикарини’ӈо’’ мякани’ хаяни’. Ӈамгэмда харамда ваде’’ливнадм’, не ерв ня’ тэхэ’’ сян’ нини’ хань’’. Илевари сер’’. Ся’’ны’ ӈэбто’ сывы’’ ӈэвы’’. Хувы тухуна ӈарка’’я не манзь ханада: -Ёховы не няхар’’ Хэно’ папа, инзелехэркар, вадам’ мэтадм’. Хув’ няна ӈэвтана’’ хибя’’ ӈылана’’ тута’’. Ханяӈэ-хэвамда’’ ӈэвтана’’ ханда’’.

Пирива мада, нё’ няюв’ вэн’’ тёрейд’’. Мани’ сидяӈэ пин’ санэйни’. Харасядахад ӈэдалёдамбой’’ вэто’ выяӈга’’. Пон’ нись мы’’ вадо’’на’’ ёркан’ нултариӈадо’. Нита нерденя Тысъя вэсако янэ’’ма’’ ӈэвы. Нисянда пумна Тысъя’ нюдя ню теда’ тю’’у’ миндя ябтамбой ӈаць нултариӈада. Таня ӈадябата Тысъя’ нюдя ню сядм’ сядо’’мы. Сава сякаданда таси сырада хэвонанараха’. Сидяда сэвда’ ябта пя’ хар енахалмэрахаха’. Самбляӈг сэрта ямдёкохотато’ ӈадядо’ яӈгу. Мани’ сидяӈэ мят’ сакадани’. Ӈамгэ пирка’’на ти’ сярамаха’’ нё тядэдэй. Тысъя вэсако мят тю’’ нив’. Ядциекомда миё’’ма минанда таси сыран’ пакал’’ нидав’. Пыда тарем’ма: – Сидя не янэ’’эм’ яноларабан’? Ӈули’’ намдахав.

Не ервкоми ӈани’ тарем’ ма: -Тысъя вэсако нин янолара’’. Мани’ сидянинё’’. Тысъя вэвако ӈани’ вахалъянё’’: - Хибяри ӈэя, нянана’’ мал’ ӈобтикы! Сидяӈэ хаюпаван’ харвабати’, сидди’ ӈобкана мэӈгува’’.

Ӈарка’’я’ не ӈани’ вахалъянё’’: – Ӈари’’ маньзяван нянанда’’ тутадм’. Нями ха’’манданакы. Мань вахалъяв’’: – Пыдар мамбат ӈамгэда вэвади’’. Хаюпа ӈули’’ хэхэнима.

Ӈэсы’ ӈацекы’’ тыдо’ танэйдо’. Не’ ервкондо’ мюданда сиӈэ юр’’ сэр’’ хабтм’ подеркаяӈанё’’. Мань маньзяван ӈамгэ таняна мюдаханани хэридавнадм’. Тысъя’ нюдя ню самбляӈг сэрм’ харей явна тэвада мань тёры’’ӈадм’. Нябтинд тэва хасава масьнё’’: – Не ӈацекы, ханани вэня’ тиванда ӈэбат самбляӈг сэр’’ни сеёто’ ӈыламна ниенась хань’’. Самбляӈг сэрми сеёто ӈыламна хэли хыбяхана маторпада ни’’ӈа’’.

Тысья’ нюдя ню хан’ вэня тикарини ӈо’’ вэ’’лими модм’. Тысъя вэсако си’’ми манэ’’лись хаця’’ ванибтей’’, пыда тарем’ ма: -Ёховы не – няхар’’ Хэно папа харто’ няханато хаюпадахав’’ яӈгорисетынё’’. Сеня’ ӈавнанда няхар’’ ниняканд хэдо’ хабцяӈгана хава’ мальӈгана нюдяко папар хаёвысенё’’. Тикы яхад мэта мантани хосаявась.