Мел’’мана сэдорана не’’ ханярина таня’’. Няръяна маркана тарця не’’ тянё ни’’ӈа’’.

Поӈгнандо’ Вера Ивановна Ледковам’ нюмдеӈгудм’. Ӈарка яхана соявы, вадювы не сэдорась нюдякоходанда тоховысь. Ӈацекы ӈэванда мальӈгана ӈока небянда’ хэвхана сэдорасьты. Ӈарка неӈэ’ хэсь ӈод сэдорась теневавамда нида хаембю. Ӈарка манзаи’’ хавна Вера Ивановна хуркари’’ӈани’’ манзаи’’ сертаби. Пыда сэдвы манзаида маркана танеда выставкахана танесеты, лавкахана мирдапсетыдо’. Хибяри’’ теневыдо’. Вера Ивановна мел’’мана сэдорана не, теда харта’ сэдорась хибяри’’ тохолаба мян’’ӈа, сувенир’’ сертабава нямна мастер-класс манэ’’лабтабсеты. Ӈарка пэвдэй ирийхана Вера Ивановна Ледкова Хорей-Вер ӈэсын’ ӈэдалёрӈась. Тикы ӈэсыхына мэванда мальӈгана ӈэсы’тер харвани’ сувенир’ сэдбась тохолабись. Школахана тоходанна’’ ӈацекы’’ няюв’ манзарась. Ты’ хобахад хуркари’’сувенир’ сэдбиць, кулон’’ сертабиць.

Хусувэй мастер-классхана манзаравы’’ хибяри’’ ихиня тарця савархась. Хорей Веркана илена’’ хибяри’’ тарця ялудо’ пон’ тенеӈгудо’. Пыдо’ Вера Ивановнам’ харто’ ӈэсынандо тамна ӈатедо. Тамна ӈока несэй ӈамгэм’ нядандо’ намдван’ харвана’’ тикы ӈэсыхына таня’’.