Си’’ив ю’’ тет по’’ тяхана саво’ ирий сидя ю’’ нюртей яляхана ӈэрм яхана вэвко юн’ тэвыць. Хэвняхад’ товы’’  хибяри’’ маня’’ яхана сайнорць товыць. Тарцям нись ламдамбю хусувэй яхана илена’’ хибяри’’ ямдо’  лэтравась тарпыдаць.

Хусувэй яхад’ хибярина сайнорманзь ӈэдалэйдаць. Ӈэрм’ яхана илена’’  ненэця’’ ӈод пуняна ниць хаю’’. Маня’’ округхадана  саю’’ по’’ ямбан ӈокханда хасую’’  ёнаркад’ вата’’ хибярива ямдо’ лэтбавась’  ӈэдалэйдаць. Маня’’ хибярина хуркари яхана сайнорӈаць. Хусувэй выӈгад’ нянэй ненэця’’   мякнандо’  недо’, нюкцидо’  хаесь сайнорманзь’ ӈэдалэйдаць. Тамальӈгана ӈобкартадо’ нивакы’’ ман’’ пондан’ хэнакэдм’. Хибярина сайнорма’ мер’’ ёльцеван’ енаць. Ханярина сайнорта’’ ненэциена пыдадо’ нись сяй сайнорӈаць, ямдо хэвняхад’ товэхэт’’  сахарамбидось. Ӈокаюв’ ненэця’’ пудана ӈарка сайнормахад’ мякандо’ нидаць’ тэв’’. Ӈэвдо’ сайнормы яханандо’ масьтець, ханяӈына  юнси’ юхубэйӈэ’ тенад’ толы’’. Ӈока’’ саю’ по’’ мальӈгана ӈацекы’’ ӈэвы’’ хибярина  евакоӈэ вадыць. Тюку по’ сайнорма ваера’’махад’ си’’ив ю’’ пом’ ядтаваць. Ханярина тарця ӈарка яля’ ед  хуркари’’ сер’’ хамадавыць’. Маня’’ яханана манзарана’’ мел’ не’’ ӈод ӈарка яля’ ед харто’ мядонзэймдо’ хамандаць. «Мел’ не’’» клубхана сэдорана’’ не’’ ты’’ ниць ирийна нюртей яляхана выставкам’ нэць. «На пути к победе» таремъюв’ нюмдевы выставкадо’ ирий ямбан манзарась. Ӈока’’ хибяри’’ манэ’’ӈадось, ӈацекы’’ турӈаць. Ӈокаюв’ турмы’’ хибяри’’ ихид’ миндя’’ вадидо’ таняна хаець. Ненсянда ӈод’, « Мел’ нехэна» сэдорана’’ нина’’ саць ӈарка манзаям’ сертаць. Выставкахана сертавы’’ манзаяханато’ манэ’’лабтадось: ханзер’’ ӈэрм’ ненэця’’ сайнорма похо’’на манзараць, ханзер’’ пыдо’ ямдо’ хэвняхад’ товэхэт’ лэтбидось. Ханзер’’ вындер’ хибяри’’ Победа’ ялям’ хахаялтамбидось. Мел’ нехэ ӈарка вада’’!