Тюку яля’ пилю’’ ирий маля маттамдэй’ толырта. Тарця ириян’ тэвась округна хибяри’’ ты’ ялямдо’ мэцьты’’. Ты’ – ненэця ил’. Ты’ нянэй ненэцям’ ӈавламбида, ембпида, яндамна’’ ядэлада. Тэси’ нянэй ненэць’ илда яӈгуд’ нив.

Тарцям’ хамандабась маня’’ хибярина хусувэй выӈгана тыдо’ пэрць явнандо’ мюсерӈа’’. Хасава’’ тыдо’ лэтби’’, не’’ ӈод хоян’ ханяӈы’ яхана танаӈга’’. Пыдо’ хасавидо’ нядабась вымна мюсерӈа’’, нюкцидо’ хэвханандо’ вадамби’’. Округханана ёнаркад’ вата хибярива выӈгана мюсерць’ иле’’. Пыдо’ варёмдо’ мэць невхы иринато’, хадунато’ сарпям’ минресь ӈоб’ нерня миӈа’’. Хуркари’’ тоенана’’ сер’’ ӈадимберпато’ ӈод, манзаравандо’ е’’эмня тянё есям’ нямарпабнандо’ ӈод харто’ иламдо’, харто’ манзаямдо’ сямянд’ саваӈэ’ тасламбидо’. Хой’ хибярина харто’ яндо’ ерв’. Пыдо’ ямдо’ сахарамбась, тыдо’ сянзь’, паӈгудо’ лэтбась илевамдо’ мэ’’ӈадо’.

Ты’ яля – пыдо’ ялядо’. Тикы яляхана хойхана манзарана’’ нина’’ нылана’’. Нидо’ манэць няхато’ маймби’’. Хойхана манзара’’ хибярина’’ маям’ ехэрась илея’’, сенз’’ ӈэя’’, тыто’ хадырць я’ тэворӈая.