Нисян сэв’’ ӈарма’’, сюртявӈэ хая’’, хынотадрев’ ма: – Э-эа! Пыдар, хасаваӈэ, ӈэхэртад мальёрхавы’’ню’’! – пыда сидя ӈудахананда пиваха’’ни лапцей’’, нэкалпа пяйда, те’’мециед валакада сита таб’’ла’’. –Но-ко, но-ко! Екан’’ма пибид! Мерку’. Сякартар мал’ моресады, вэянда сэвхарт яӈгу… сиӈгаларавэрхан! Мерку’! Та-арем’! Сыр’’мада: мурод – манебэрха’’!.. Салабарха’’! – Пыда ипекаця пеӈг’’нанда мурон, ябтёйхадандо’ нялирпэй ӈэ’’эн ӈылад пуйби. –Ӈамгэ мунзин? Мале мал’ салабаӈэ хэвэнню’’! Тарем’ ӈэси’’ хаёва’ пир! Маня’’ серкнана’’, нявэй’’, мунзя вэва. Ти, тамна хурка… енанд хабя’’я!... нян лабцевы’’. Ниня ӈадьдаӈэ тамна ханан ни’ танавы’’! Серква вуни ӈа’’… тэкоцид сахарамба тара’’ма.
Сырахава няйна. Паль’’, са’’нюй сыра. Тикар тахаби сарёнда тахарув’ хамдома. Няӈун ӈылы’ хавна и’’ил макан мальцяни сэдоӈо’’омна ӈод’’ латолы’’. Нисян тэри нялправы «лабцевы’’» вада’’яда теда’ си’’ми есь ӈэтпи, ненэсяхава мань лабценахарт’ нидамзь, хананда ни’ тийваць – валакада!
Нисяв си’’ми ӈэн тамдалманзь табада, мальцян панно сюркаръяда, пад’ ня’’авдарев’ тынзяӈгана сыхыдэйда. Таремгава’ ядиворка, юна пяв.
– Но-о? Ибарка? – пыда юнра, вабцхананда пи’’лебцода сованонда.
– Иба, валакада тарем’ ӈод’’ мальцян мюй ӈарханда са’’нюй…
–Сёбянд мюд ӈо’’ нялкара’’, лухунд мю’ хадерад’’, – си’’ми ӈани’ табада.
Пуна пыда си’’ми ӈамгэхэва падраха’ мю’ сы’’ӈадаванонда, тикар хадри’ савкава, тикахавахана мал’ са’’нюядм’ ӈэб’’нан ӈод’’, ӈадя ядимя. Пинда ямбан’ нивы хонёвэӈэ си’’ми мерривна немар тале. Мале сатаркавна тырцанаван нид сидыдм’: ӈэдалёванани’ – лахациет, паромдэт Нина хан хамбабтыва.
–Хальмерамда’’ ти, мэра’’! – ханяхавахад ӈахат сонадарев’’, нисян вабц тэбкадаванонда.
– Вэ-эй, хосподи! Вэй! – вэнолавы небян тёрм’ намдадм’.
– Вэй тэхэ’’я! Вэй маянь’’я! –сейда хэвы хадами ӈод’’ па’’вэлаванонда. – Ӈамгэ тарця хэбяха’’я няна’’ лабцейта’’?! Хасава ӈацекэер ӈани’ хаяню’’! Ханяӈэдо’ илеӈгуда’’?!
Манзадахарта пина мань тензенадм’, тамна ӈамгэм’ ваде’’мамдо’ ӈатедм’. Тикахавахана… юд няльмера’’ –савканд, мальцянд мюд тарасумбдарха тунд лэё’ хэвхана лат’’ни’ мо’’нэюв’’. Тунд яляхад хайлани харто’ тяныд, хар’’н ӈани’ манзадахарта лэкотадм’.
– Иле-э! – мал’ лэмбаранда мюй индата посабтамба небяв тёрей’’, мэкадувна ӈудида сята хэван’ илась, пыда пулыта ни’ ха’’мы’’, нянанда мань теда’ иленя сядэйрахадм’ ӈэдарахадм’.
– Ти…ти…ти…- лабтэй’ Нина ӈамдёвы хадами тамдладарка ӈудита пеӈгана харта пыдамда пулы’’мана петембида. Вахалць харва, пысабцонда, майванда нид пыда «ти» ваданда хавна ӈамгэхэртм’ хэта я’’ма.
–сава тыбэртя ӈэӈгу, – ивъер’ нисями ма. – Серот тарем’ хэвахана ӈод’’ вэвар яӈгу. – пыда иланда тамна мал’ нерняна ӈа. Хасавар пинда ямбхана сэв нись тал’’. Вэвахава нувм’ мань хар’’н лыдабтавэв. Хар’’н вэвадм’.
Ялянд тоховась мань мал’ морюмядм’, ва’’авхан юсибтэюв’’, хабэвко’’омна ӈамдалкованд паӈгом’ пэӈан нина ваяртав.
