Тюку по’ комсомол хасуюр’’ самляӈг пода панысь. Тарця ӈарка ялям’ невхэна комсомолкана мэвы’’ хибярина мэ’’ӈадось. Няръяна маркана комсомольской конференция ваерась. Хибярина «Лидер» нюбета ДЮЦ мякана ма’’люрӈаць. Невхы похо’’на манзара’’мидо’ ваде’’ӈаць, лахарёдо’ тянё ниць’ӈа’’.
Иван Егорович Ледков окружком комсомола’ секретарьӈэ’ манзарась. Тамальӈгы по’’ ихинянда тенад’ иле’’, тикы нямна тарця вади’’ мэ’’ӈась: – Мань комсомолан’ ся’’ня тюмась тикахана самляӈг ю’’ пода панысь. Тамальӈгана школа-интернатхана тоходанадамзь. Тикахад’ школана комсомольской организацияна секретарьӈэ’ сими’ тэраць. Тикахад’ окружком комсомола манзаравась’ пявась, по’ манзарась сими’ Москван’ тоходанвась ӈэдараць. Высшей комсомольской школахана тоходанамась. Таняд’ то’’омадан’ окружком комсомола мякана манзарамась. Тамальӈгана ӈокавна округ’’мана ӈэдалёрӈадамзь, маниесьтыва’’ ханзер’ ӈэсыхына комсомолец’’ иле’’, манзара’’. Хусувэй ӈэсыхына комсомольской организация’’ таняць, общественный манзаи’’ комсомолкана мэна’’ хибяри’’ сертамбиць. Хибяри’’ сяхарт’ нисьты’’ тарем лахана’’: есям’ салдадатак, тикахад’ ӈамгэхэвам’ сертагум’. Сертавнда манзаи’’ харто’ сертаба пясьтыдо’, есям’ тикы ед’ нисьты’’хай’’.
Мань’ нябакон’ Анастасия Алексеевна не нюда таня Саняда. Пыда’ сита манзаравась Вижасан’ ӈэдаравыць, маслопромхана манзарась. Вижис’ ниня ӈарка деревняко, таняна комсомольской организациядо’ танясь. Саня масьты: маня’’ таняна ёльце сававна илеваць, танеда манзаина сертабасьтына, ся’’ня тарабнанда субботникан’ ма’’ласьтына’’. Колхозхана юно’ подерцетына, тикахад’ ӈув’’ тэвравась ӈэдаласьтына’’. Ӈэсыкоцяхана ферма’ танясь, тарем’ нядагосьтыва. Тикахад’ ныланавась клубан’ ма’’ласьтына’’. Хар’’на манзараваць, ныланаваць.
Тамна мань’ тенев’, Хонгурейхана ӈобтарем’ комсомольской организациява таневысь. Тикы похо’’на комсомолкана мэвы’’ хибяри’’ ханярина нердеван’ харваць. Елизавета Филипповна Хатанзейская ( харта тензда Канюкова ӈэвысь), пыда комсомольской организация’ секретарьӈэ’ таняна тэрабэясь. Харта зверофермахана манзарась, саць со манзарась. Тикы’’ похо’’на Центральный комитет комсомола пыда нянда значок «Лучший зверовод» ми’’ӈась. Тикахад’ Елизавета Филипповнам’ 14 съезд комсомола делегатӈэ’ тэрадонзь, пыда округхадна Москван’ ӈэдалёрӈась. Хонгурейхана тамальӈгы похо’’ мостовой яӈгуць, пилорамадо’ танясь. Тикахана комсомолкана мэна’’ хибяри’’ ма’’лэйдаць, пилорамахана пяхад’ ладко’ мадаць, мостовой сертаць. Ӈэсыхына мостовой ӈадима комсомолецхад’ миӈась.
Ледковхана илена’’ поӈгана комсомолец’’ ӈань ӈокавна манзаравыць. Татьяна Ильинична Ледкова «Няръяна ты» колхозхана манзарась, комсомолкана мэвы’’ Афанасий Петрович Канюков, Александр Никифорович Талеев, Егор Николаевич Ледков, Алексей Гермагенович Ардеев мал’’ пыдо’ комсомольской организацияхана савовна манзаравыць. Сава илебцям’ нерняку’ пэрӈадось. Война’ пуд хибяри’’ ил’ хусувэй по’ саваркаӈэ’ хантанась. Хибяри’’ ханя’ таняна ныхыдо’ нись’ сяй’’ манзарасьты’’.
Татьяна Ильинична ваде’’цетыда: – Ледковхана ся’’ня хибярина нисьты’’ тэвор’’ комсомолкана мэна’’ ӈацекы’’ нядагосьты’’. Маслопромхана юрм’ сертабасьты. Сертавы юр’ ма’’лаӈгудо’, ледникхана лэтбаӈгудо’, тикахад’ ты’’пэртяха’ хоян’ ханасетыдо’. Таӈы’ мальӈгана сенокосхана манзарасьты’’. Хуркари’’ нумӈгана нядагосьты’’, тикахад’ хорова’’ ӈаврадо’ сыра ямбан тэвсеты.
Округханана ӈока ненэця’’ хибяри’’ комсомолкана со манзараць. Евдокия Ефимовна Хатанзейская школа-интернатхана пудана похо’’на манзарабэй, пыда окружком комсомола секретарьӈэ’ тэрабэй ӈэвысь. Пыда округмана ӈэдалёрмысь, хибяри’ няюв сававна манзаравысь. Любовь Николаевна Тайбарей школа- интернат ёльцембэй, тикы’ пуд Архангельскана тоходанась, тикахад’ Пёшана манзарась, окружком комсомола нюртей секретарьӈэ’ тэрабэй ӈэвысь. Сававна манзаравысь. Тарця хибярина ненэця’’ поӈгана ӈокаць. Мань’ нядан’ нюдярка няв Григорий Егорович Ледков Саляхана комсомольской организация’ секретарьӈэ’ сян’ по’’ таняна тарась, хибяри’’ масьты’’: сававна манзаямда пэрӈадась.
Комсомолкана мэвы’’ хибярина ханярина харто’ манзаидо’ сававна пэръядось. Тикы’ хавна ӈарка общественный манзаи’’ пэрцеты’’. Хусувэй серудо’ ма’’лёйкана таслабсетыдо’, нерня манзарась пландо’ танесеты’’. Комсомолкана’ мэвы хибяри’’ тикахад’ ханяӈыдо’ ервӈэ’ хэсьты, сельской Совет’ председательӈэ’ манзарасьты, ты’’пэртя’’ поӈгана бригадирӈэ’ манзараць. Комсомольской организацияхана тоходансеты’’: ханзер манзаям’ сертабась’ тара, хибяри’’ няюв ханзер’ сомбовна лаханась. Комсомол’ ӈока сава хибярим’ вадавысь, тарця организация’ ед маня’’ ӈока сава вади’’мэцьтыва’’.
Комсомол’ со’’яма ялям’ теда ӈод ӈарка яляӈэ’ мэ’’ӈава’’
