Округханана сидя юкад’ вата ӈэсыва, хусувэй ӈэсыхына хибярина иле’’. Харто’ илевамдо’ ӈэсынандо’ мэ’’ӈадо. Манзаянда танедар’, манзара. Манзаянда яӈгудар’ тэри’’ тарем’ иле. Хусувэй ӈэсыхына ӈацекы’’ вадюдана’’, тоходана’’. Хаювы яля’’хана мань’ Индиган’ тэворӈамась.

Тикы ӈэсын’ сидя юкад вата по’’ ниван’ хабемась тэвор’’. Сэвхана маниесь ӈэсыдо’ вадювы, едэй харад’’ ӈадимы’’, едэй лекарь’ мято’ таня, теда школам’ мимби’’. Миртя’’ сававна манзаидо’ сертабабнандо’, харвабнанда Индига ӈацекы’’ сидя ёнар’’ маттамдэй яӈганя похона тохолковамдо’ едэй школахана минреӈгудо’. Тохолкода ӈод варёмдо’ мэць ӈацекыдо’ едэй, иба, яля мякана тохолабгудо’. Индигахана ӈарка ӈэсы нибнанда ӈа’’ ӈод тоходанва по’ мальӈгана хасуюёнар’’ ӈацекы’’ тоходансеты’’. Мат’’ яӈганя ӈацекы’’ Выучейской ӈэсыкоцяхад’ турӈа’’, тоходанвандо’ ёльцяӈгана интернатхана илесеты’’. Невхы похона Индигахана илевы’’ хибяри’’ ӈокаювдо’ хойхана манзараць, совхоздо’ ӈаркась, тыдо’ ӈокаць. Теда СПК «Индига», тэхэна мэнидо тамна таня. Таняна тет юкад вата хибяри’’ манзара’’, тикы манзаранахат’ сидя ю’’ хасую’’ хибяридо’ тыбэртяӈэ’ тара’’. Самляӈг бригададо’, сидя яӈганя ёнар’’ мян’ ты’’ Тиман явна хадырӈа. Кооперативхана серудо’ тоена миӈа’’, есьдо’ яӈгу’’. Есяндо’ яӈгова нид тюку по’ ты’’ ялямдо’ нидось мэс’’. Ӈэсына культура хардахана концерт ваерась, тыбэртяха’’ сейхад’ миндя вади’’ хэтвась ӈэсындо’ ерв ӈуда ӈылӈэ’ тарана не тось. Тикахад сейхана сомбой концерт’ манэ’’лабтаць. Выучейской ӈэсыхына Андрей Григорьевич Явтысый иле, таняна соявы, харта ӈэсымда мэнена ненэць, нида’’ нядабада. Пыда Индига ӈэсыхы’ депутатӈэ тара. Няданда ӈока сава сер’’ миӈа’’. Тикы хасава хойхана манзарана нида ӈарка яляси’ нивыдась хае’’. Хойхана самлязимдей ӈэсыхы’ бригадахана тыбэртя’’ ненэциеда ма’’лавысь. Ӈарка яляхана нылавась нюртей, самлязимдей, маттамдэй ӈэсыхына манзарана’’ хибяри’’ ма’’люрӈаць. Ненэця’’ е’’эмня программам’ Явтысый А.Г. хамандавысь. Тыбэртя’’ поӈгнандо’ пирдырӈаць, тэхэ’’на ӈэдалёрӈаць. Яля ямбан сававна нылэйдаць. Ӈацембой хасава’’ ӈобкана ма’’лась сянакуць, тэхэ’’на’’ ӈэдалёрӈаць, нерня манзарава нямна лаханакурӈаць. Андрей Явтысый вадавна: – тыхэ’’на мэна’’ хибярина харто’ манзаидо’ сававна минрейдо’. Нюртей ӈэсыхына манзарана’’ хасава’’ кооперативхана серудо’ сямянд’ сава’’. Бригадирто’ Николай Паньков. Хасава’’ тыдо’ сававна лэтбидо’, пилибт’ маниейдо’. Тикы ӈэсыхына тет яӈганя по’’ ямбан тыто’ толыр’’ сидямэвна нядэяць. Ӈокханда ты’ ялям мэ’’мась сидя юд’ мян’ тыбэртя’’ товыць. Тэхэ’’на ӈэдалёрмахана нердевы хибяридо’ мядонзэй’’ ня’’амӈгу’’.

Индигахана, Выучейской ӈэсыхына харто’ ямдо’ мэнена’’ хибяри’’ иле’’. Тюкумэвахана таняна ӈока хибяри’’ няюв лаханакурӈамась. Ӈокаювдо’ илевандо’ ямбан таняна иле’’, ӈока по’’ ямбан харто’ манзаидо’ пэрӈаць. Тикы нямна падвын’ тамна танеӈгу’’.