Тюку по’ носиндалава ирийна сидя ю’’ сидндетимдей яляхана хэвхы округна еркы маркана Саля’хардахана яндат’ товы’’ паднана’’ ненэцие’’ ядтабгу’’. Тикы маркана Конгресс финно-угорских писателей ваераӈгу. Тюку по’ ма’’лавы’’ паднана’’ финно-угорский тенз’ мэта ненэцие’’ ӈацекы’’ е’’эмня паднава серудо’ таслаӈгу’’. Маня’’ яханана ӈацекына е’’эмня яӈга паднанина’’ яӈгу’’, тарем’ ӈод ӈацекы’’ е’’эмня таславы литература’ ӈадимберӈа.

Тарця сер’ нямна ӈарка манзаям’ округна этнокультурный центрхана манзарана’’ нина’’ сертамби’’, тикахад’ литературное объединение «Заполярье» манзара. Пудана’’ похо’’на сертавы’’ манзаидо’ тянё ни’’ӈа’’. Тарця манзаян’ ӈока ныхымда паднана нява Лукерья Александровна Валей масьтемби. Саля’хардахана ваеравнда паднана’’ конгрессхана маня’’ округхадана Лукерья Валей манзаравнда. Пыда яханана ӈадимы’’ книги’’ таняна манэ’’лабтаӈгу.

Тюку ялян’ хэтась, Саля’хардахана паднана’’ ма’’лёван’ маля хамады’’, яндат’ товы’’ паднани’’ ӈатейдо’. Тикы е’’эмня яӈга программа’ хамадавы. Ханярид’ товы’’ паднана’’ конрессхана манзаравандо’ хавна тамна ӈока несэй ӈамгэм’ манэ’’та’’. Я’мал хусувэй районхад’ паднана’’ ненэця’’ тута’’, тикахад’ Тюмень, Новый Уренгой, Ноябрьск, Москва, Няръяна маркад товы’’ паднана’’ танеӈгу’’. Носиндава ирий’ сидя ю’’ сидндетимдей толыркана яля’ ямбан паднава’ серм’ минрена’’ хибяри’’ сидя секцияхана манзараӈгу’’. Финно-угорский мир ӈацекы’’ е’’эмня паднава серм’ таслабгу’’, тикахад’ ӈацекы’’ вадамбава серкана хуркари’’ тенз’ мэта ненэцие’’ фольклор’ тэврабва таро’ нямна лаханакурта’’. Роль детской литературы образование’ серкана манэ’’сарта’’. Ӈацекы’’ тоходанва хардахана харто’ вадамдо’ тохоламбава серу’’ паднана’’ тохолкода’’ нито’ няюв ӈобкана таслаӈгу’’.

Ханярид’ товы’’ хибяри’’ экскурсияха’ ядэлаӈгудо’. Нюртей яляхана паднана’’ нина’’ ЯНАО национальной библиотекам’ манэта’’, таняна Электронный библиотека презентация’ ваераӈгу’’. Тикахад’ Конгрессан’ товы хибяри’’ харто’ яхадандо’ тэвравы’’ литературамдо’ няхато’ манэ’’лабтаӈгу’’. Тикы яляхана Геннадий Кельчин падвы книга’ презентация ваераӈгу. Яля’ нябю пеляхана мядонда’’ Горнокнязевскан’ ӈэдалаӈгуд’, таняна природно- этнографический комплекс манэта’’.

Конгресс’ нябимдей яляхана ЯНАО Правительство’ хардахана AFUL Правление ма’’лёйда ваераӈгу. Паднана’’ ненэця’’ ӈани’ ОГТРК «Ямал-Регион» хардан’ тэворта’’, ханяӈыдо’ телевидениен’ падбагудо’. Тикы яляхана тамна ненэця паднана Л.В.Лапцуй музеян’ тэворта’’, Саля’хард маркы дом ремесел’ хардахана манзарана’’ ненэцие’’ манзаравам’ манэманзь’ ядэрта’’, тамна Ямальский многопрофильный колледжхана тохолкода’’ ӈацекы’’ няюв паднанина’’ лахарёдо’ мэта’’.

Тамна тюку’ мэвахана ваеравнда ма’’лёвахана финно-угорский мир паднана’’ AFUL организация’ президентха’ тэрабаӈгу’’, хибя тарця манзаям’ нерня минреӈгуда тикым’ нянда конресс’ пуд хэтгува’’.

Финно-угорский паднана’’ нябимдей’ яӈганя конресс’ Саля’хардахана тет яля’’ ямбан манзараӈгу’’, таӈок яля’’ ямбан таславы сер’’ тянё ни’’ӈа’’. Ханярид’ товы’’ паднана’’ ӈобкана ма’’лась ӈока тарана’’ серу’’ таслаӈгу’’. Конгресс’ манзаярава нямна вадина нерняӈы’’ яля’’хана тамна танеӈгу’’.