Перевод на ненецкий язык

Елена Киприяновна Чудинова мел’’мана сэдорана не – ӈухуко’’омна’’ сэдорона.

Сэдорабнанда Канин’ яда ихинда ха’’мурцеты, мюсерма ямда сэвханата маниена то’’олха ӈэсеты, ханяӈэхэна хэвхананда мюсермы нида’ тензебтебсеты. Тикахад ихинанда лимбяка ӈэсеты…

Нюдяко ӈэвы пода’ ихинда тосеты, сяха’ небянда, нисянда, нита’’ хэвхана ӈобкана мэсеты’’. Ханзер’’ мякнандо’ сертавнда манзаидо’ ёльцесь, не ӈацекы небянда’ хэван ӈамдась, сэдорась тоходанась. Елена, самляӈг похонанда, мале нибямда, ӈумбъямда мэёвна ня’’амбадась. Нюдякоця, парколась мэта хоркоцяда танесеты, пусакэци’ мадабасеты.

Теда’, по’’ ваерась,пыда мел’’мана сэдорана, ӈудида, ӈухуко’’омна сэдораванда мальӈгана сян’ нойм’ мэёвна ня’’амбасеты, тиртя пыякоци’ сэдабасеты, хусувэй манзаямда тёмбековна сертабасетыда.

Тюку яля’ Елена Чудинова – луца’’ вадавна манзь, теневана’’ ӈухуко’’омна сэдорана мел’’ не. Пыда сэдъида ӈани’’ манзаяхат несэй, харта сэдо’’ӈода’’, харта ӈухукуда.

Елена Киприяновна Чудинова – округна’’ этнокультурной центрхана танеда «Мел’’ не» клубхана нертей яляхад сэдора.

– Манзараван’ мальӈгана нисетыдм’ сэдора’’, ныланаванзь тарп’’махадан ивъер’ сэдора пявась. Пенсияхана мэм’, таӈгадм’, ивнан ӈэда манзаи’’ cэдбась времями’ тане. Илеван’ ямбан манзарадамзь – ӈока по’’ маркы’ рыбкоопхана лавчикӈэ манзарадамзь. Манзараван’ ёльцяӈгана ихинан’ масетыдм’, нибнани’ манзара, ненэцие’’ ӈавори’’мна сэдораӈгудм’. Теда’, тарця илан’ тэвыв. Ибедормахани’ тэвыв. Тикахад ихинани’ сава ӈэсеты, маймбасетыдм. Тарабнанда, теневана сава няхани’ мядонзэйӈэ ӈухуком’ сэдаӈгум’.

Мел’’мана сэдорана нява’’ теда’ тарця нювм’ минре – маня’’ яна’’ мел’’мана сэдорана не. 2019 похона «За заслуги в развитии художественного творчества» нагрудной знакм’ ня’’амась, НАО’ Администрация Почётной грамотада тане.

Пыда сэдвы манзаида региональной, всероссийской, международной выставкаха’ тэворцеты’’.

ӈоб’ нерня’ минрена манзаяхананда хусувэй серта сававна миӈая. Манзаида ӈокамданая, сидна’’ маймбтембая.