Ӈарка Хардяӈг тарем’ мамонода: – Тай’ сырӈада’’. Тарця ненэцям’ тюку яхана навэдм’ манэс’’. Мядм’ пэртяда хыбя ӈэдакы. Недя ӈэбтав’? Няда ӈэбтав’? Нена’’ мэбе’’мы! Ӈопойриӈэ мята есебида. Нюдя Хардяӈг нява’’ нисисяню’’. Няна’’ неӈэ ёльце саванё’’!

Та’ ямбахана таня’ илева’’. Няхар’’ юр’’ тэни’ хадодо’ яӈга.Ӈэрёй сырада торикаковна, сырада ха’’амавы’’. Ӈарка Хардяӈг тарем’ мамонода: – Теда’ тюку яля’ ӈарка хардаха’’ луца’ ӈэва мирма’’ ханаӈгу’’ ни’’ивам’. Ханодо’ подерӈа’’. Хуркаси’’ – хараси’’ хадандо’ ӈылама’’. Сидя си’’ив яля’ сыӈгарёдо’ яӈгу, ӈамгэ’ пирка’’на торахаванодо’. Ӈарка Хардяӈг яберкаванода, тарем’ мамонода: – Тёняӈы нява’’, Харючи’ нюдя ню хунортакои нява’’ ӈэвынё’’. Ямб Сынэре’’эм’ хадарахавы, тикы ненэць’ параӈодахана ӈарка’’я ерв.

Тикы харанда та’ валакада. Ся’’ны ӈэбто’ ӈани’ тарем’ ма: – Теда’ тюку яля’ луца’ ӈэва мирма’’ ӈани’ ханаӈгува’’. Харючи’ нюдя ню’ ядэртабтав’. Мань ӈани’ мадм’: – Ядэрт’’ нидам’. Ехэрана ям’ манэт’’ нидам’. Си’’ив Хардяӈг тикандо’ хаянё’’. Пин’ тарпыв’’. Тет падвэми мань сярын. Сехэрэндо’ мю’ тэри ӈамдыв’’. Яля ерманянда хад’ хэняраха. Си’’ив Хардяӈгм’ аудандо’ тэвын. Пон’ нись мий’’, миндани ед’ хэхэ’ мядо’ сарва’’ пилибт’’ ӈадимя’’. Нув’ няран’ табцотанараха’’. Си’’ив Хардяӈг харад’ лыруйм’ нёраку’’ла’’. Юрётадо’ луца’ мяд’ хэварин’ нулта’’ нидём’. Ик нярморе’’э харданда мюд нисянзь ӈадимя. Си’’ив Хардяӈгм’ мят’ тюлейда. Хурка мань ӈод мят’ тюдама. Ямб толь’ тяха’ маня’’ ӈамдына’’. Няхар’’ ямб яля’ маня’’ ябева’’. Ӈамгэ пирка’’на нё’ лабна’’ ӈадимя’’. Сидя солдат пыди’ тарем’ маха’: – Харючи’ нюдя ню ерв сит хаӈа.

Тикари миӈгана тю’’ури’ пяв. Сидя солдат мань пыхыдами поӈганди’ сюрӈаха’. Тайна хунана’’ ерван’ тэвына’’. Пыда тарем’ ма: – Харючи’ нюдя ню Ямб Санэрем’’э хадарахавэн. Тарця ӈэбтав’?

Мань тарем’ мадм’: – Ненэсянда тарця! Харта вэвам’ хада’’ нисядам’. Ерв ӈани’ ма: – Ямб Санэре’’э саць ӈарка ерв. Харючи’ нюдя нюм’ лэтарида терва еся бочка’ мю’ тяха’ ладара’’. Бочка’ мю’ си’’ми лад’’ ни’’им’. Индани ханацям’ парэӈо’’ си’’ӈадо’. Сянат’- хунат’ мэб’’нани ӈод’’, ӈоб’’ лаханана тарем’ мамонода: – Харючи’ нюдя ню маньзяв хаядм’. Ханзер’’ ӈэӈгун? Мань тарем’ мадм’: – Хурка мань ӈод’’ вунидм’ хаёд’’! Ӈоб’’ пары’’ыв’’. Тар’ яӈэ мань хаядамнё’’. Парэ’ сивана пин’ тарпыв’’. Тикы яхад ӈахат миркани ӈани’ ха’’мыв’’. Марад’ нёхона тет падвэми тамна сяравы’’. Инями мэв. Ханямна мимами нив хамэдамбю’’. Яля’ ерманянда, яля’ хэхэва мядони ӈадимя’’. Пой ӈутокани нултамахад тыни ӈэдэйн. Ӈавормаханани хара вуни таня’’. Мань хонэйв’’. Си’’ивхав яля’ толими вэӈгалы. Си’’ив Хардяӈг торахаванодо’. Нюдя Хардяӈг яберкаванода. Тарем’ мамонода: – Теда’ тедахав Харючина’’ нюм’ еся бочкан’ лад’’ нисявам’. Тикы яханда лыда’ хэдемда’’.

Малда тамна ни’’ӈа’’.