Ӈэрм’ яхана сидя юкад’ вата по’’ тяхана’’ общественный организация’’ ӈадимяць. Таняна серу’’ тасламбада’’ хибяри’’ харто’ яханандо’ илена’’ толырто’ тянё ненэциедо’ нядамбава е’’эмня ӈадимдевыць.

Тарця ассоциация’ Я’малкана манзара’’. Небой по’ нюдя пэвдэй ирийхана сидя ю’’ самляӈг помдо’ мэ’’ӈаць. Таӈок по’’ ямбан сертавы’’ манзаидо’ маля ӈока’’. Танок по’’ ямбан «Ямал потомкам» ассоциация’ серу’’ нерня пэртяӈэ’ Сергей Харючи, Хатяко Езынги, Александр Евай, Роман Яндо тараць. Пудана сян’’ по’’ ямбан серудо’ нерня минренаӈэ Эдман Неркаги манзарась. Ӈарка пэвдэй ирий’ самлязимдей яӈганя яляхана Саля’хардахана ассоциация’ серу’’ пэртя’’ хибяри’’ яндахат’ товыць. Хусувэй районхад, маркад товы делегат’’ яля’ ямбан манзараць. Ассоциацияндо’ пудана’’ тет’’ по’’ ямбан манзаравам’ таслаць. Лахарёдо’ ӈокаць. Тюкумэвахана манзаравы ма’’лёвахана «Ямал потомкам» ассоциация несэй президентадамдо’ тэраць. Нерняӈы сян’’ по’’ ямбан тикы манзаяхана Эдуард Яунгад манзараӈгу, пыда Ямалкана округандо’ законодательной собрание’ депутат.

Ассоциация ма’’лёвахана Всероссийской ассоциация президент, Ямалкад’ РФ  Государственной  Дума депутат’ Григорий Ледков манзарась, пыда ӈэрм’ яхана нерня илева ханзер’’ мима’’серу’’ ваде’’ӈась.