Маӈггабада тасу’ хаби маймба мяканда салъй’’. Хабэй пухуцям’ ханакохана валӈада. Неранда няна параӈода’ харад’’ ӈадимя’’. Харад варан’ пи’’ таркахат мядиком’ серта. Пухуцям’ сэдоранадарев’ ӈабтада. Сяланда ваӈгхад харм’ паклё хае. Параӈода’ мя’’ ёсана вуни ӈа’’ – мят’ мятю. Параӈода’ сидя не нюда ӈэвэхэ’. Ӈахат товы ӈэсь ситя сававна мядолабта’’. Хане’’мида няхата ваде’’ӈа. Халям’ ӈокавна хадавы. Параӈода’ мякна сидя яля’ мядоӈа.
Няхаромдэй яляхана параӈодаханда ма: – Вэй! Нянда’’ манзь юрвэдм’, харад’’ вархана пухуця небями’ нюдяко мядикохана хаедамзь. Не нюхуюд небяни’ ӈамгэм’ пэрмам’ ваде’’ӈади’.
Параӈода не нюхуюда ӈэдабтаӈахаюда. Пирибтяха’ писянзавэй’ мядико’ няна хаяха’.Ӈамгэ’ пирхана Хоркы’ Хобам’ Мэта ма: – Вэй! Нянда’’ манзь юрвэдм’, мят’ тэвотабта’ не нюхуюд ӈаркавна нёяха’ тёрыр’’. Небями’ лэруцеты. Сэдорана лэрёванда сер’ пыхыдамда хадюла пирта. Ханзер’’ манзь юрвэдм’? Тедахав’ мале хаяха’.
Сидя пирибтя мале мядико’ хэван’ тэввэхэ’. Теневана нянди’ небям’ манэ’’манзь ханзели’’ письӈаха’. Мяд’ мюня’ сакадаӈгуханзь – пухуця няби хэвня’ мо’’нэй’’. Сяланда ваӈгхад хар паклы. Тарцям’ манэць сейди’ хая’’. Мяканди’ паромба сюрбаяха’. Манэтамди’ нисяханди’, мядондаханди’ ваде’’ӈади’. Мядода няндо’ идя вома, манзь ханада: – Ӈамгэ ӈаркавна тюрыцади’? Небяни’ сейм’ харевэди’. Лэрёванда сер’ пыхыдамда матидевы. Мань теда’ ӈопойриӈэ ханзер’’ илеӈгудм’?
Параӈодан’ вахалъй’’:- Небями’ мале хава, теда’ тарем’ таслахава’’. Ӈаркаюм’ не нюр недни’ тад! Харта ӈо вэвава. Вадами’тарця.
Параӈода индя ядэро’’махад не нюмда ваторӈада. Хоркы’ Хобам’ Мэта параӈода’ не нюм’ неданда мэда. Маӈбада илевы нява’’ параӈода’ мяд’ вэкна пухуцянда ня’ илеӈаха’. По’ хэ’’мяхад хасава нюди’ соя. Ханяӈэхэна пухуцянда нюдя не ня хасава нюхунанди’ ӈамдёсеты. Ӈацекым’ лаханако няцетыда. Сяхав’ лахарёмди’ Хоркы’ Хобам’ Мэта намдада. Не пыда нюханда тарем’ ма: – Вадё’’махаданд мякнанд ӈопойриӈэ илеӈгун.Хусувэхана няхар’’ няньнд сэв, няхар’’ пэхэр ӈэӈгу’’. Тунд пяӈэ мэтар няхар’’ пэвдюнд пя’’ таняӈгу’’. Ся’’ны ӈэбта тикы’’ ӈаврад’’, пид ӈоб’’ мальӈгана сусадангуд. Сэват сер’’ ялтын. Яднаханд пухуцям’ едтеӈгун. Пудана суюмда ханаӈгур. Пуна юнотани’’ едтеӈгун. Суюдм хада’’махаданд юномдо’ мэ’’лаӈгун. Тад тикахад маӈгабада тасу’ хабим’ хоӈгун. Небямда ханакохана нюхулембаӈгу. Хабинд хабэй небям’ сюрманзь ханаӈгур. Хоркы’ Хобам’ Мэта’ иле’’мям’ хасава нюхунда не етри’ ваде’’ӈада. Параӈода’ не нюм’ неданда мэваханда тэврахава, пыда мяканда мятю Пухуцянда не нян’ ма: -Нямюр манэ’’лабтахарт! Ямб ӈэя!
Не нямюмда пин’ ӈадимдеда. Ихинянда ма:- Нямюми’ нянанда ӈамгэхана тарабата?
Хоркы’ Хобам’ Мэта ма:- Нямюр тарси’’ ямб ӈэвы! Хэбимдехарцяв!
Вадида мэсо’’махаданда харамда вэрда. Не’ нямюм’ хар’ мадада. Параӈода’ нюдя не ню нянзялма. Ӈобкарт вадам’ хэта я’’ма. Хасава’ няри’ тэри табековы. Ӈамгэ’ ваде’’мамда, ӈамгэн’ харвавамда хибяхат нивэда хамедамбю’. Ӈавэ’’ пиркана Хоркы’ Хобам’ Мэта ма: – Ӈамгэм’ хэтван’ харвавамда мань хамедамбив. Пыда ма’’нив: -Хоркы’ Хобам’ Мэтахана хаюпа хэб’’нани’ ӈани’ лахана пэӈгув’.
Параӈода нисяда ма: -Ненэся ваданда ӈэхэваб’,таня хаюпа хэява. Параӈгода’ вато’ сер’ – тюня ялям’ серта’’. Параӈгодадарев’ илелта нява’’ нябимдей немда мяканда валӈада.
Си’’ив яля’ хэсь, нямюсьда неханда ма: – Няндси няӈгаркарт. Нямэханда тотрев’ няндасим’ сим’ ӈани’ нэда.Вэсакода сепанда мюд ӈамгэхавм’ тюхулӈа. Паромба ненда нясин’ мода. Параӈгода’ нюда не ню нямюнда танявам’ хамедада. Тиканда пуд ӈани’ лахана пэй’’.
Майванда сэвта хаял’’ сидя падута ядувна нидо’ нертемби. Хоркы’ Хобам’ Мэта параӈода’мяд’ няби вэкна таня илесеты. Параӈода вэсэймзь пада параӈодаӈэ таралъй.
