Лимбя ирийна хасуюдимдей яляхана Саля’хардахана илена’’ хибяри’’ Елена Григорьевна Сусойм’ тензебтембиць. Яля’’ мер’’ миӈа’’, маля тет’’ ю’’ яля’’ ваера’’ ханзер’ тамбир’’ мэбета нява я’ ниня яӈгу.
Ваеравы по’ нюдя’ пэвдэй ирийна пудана яляхана Я’мал няд’ вэвко юнм’ намдаваць. Елена Григорьевна Сусой яӈгумам’. Ямалкана саць’ сахарамбада хибярись’. Елена Григорьевна Сусой тохолкода, почетный гражданин Ямала, кандидат педагогических наук, заслуженный учитель РФ. Тюку по’ яра ирий самлязимдей’ толыркана сиднтет ю’’ няхар’’ пода’ пангусь. Выӈгана мюсерта’’ ненэцие’’ мякана хад’’ ёльцяӈгана ёнар’’ хасуюёнар’’ няхар’’ ю’’ няхарамдэй похона соявысь. Нюдякоходанда я’’авлавысь, хусувэй ӈамгэм’ теневаван’ харванакось, ниня’’ теневанам’ манэць хонарковада ӈарка ӈэвы ӈэсьты.
Хойхана, нянэй мякана вадёвы не ӈацекы хой’ илм’ сававна теневанась, хой’ ямда мэненась. Ненэцие’’ ил’ ханзом’ илевахад’ теневадась. Илеванда ямбан нянэй ненэця’’ ватовна илесь. Илеванда ямбан тоходанась. Нерде Новый Порт’ школам’ ёльцевысь, тикахад’ Саля’хард’ маркана педучилищехэна тоходанась. Тохолкода манзаям’ торомдась Елена Григорьевна Ленинград’ маркана’ Герцен’ нювм’ нюбета институтхана тамна нерня’ тоходанась. Ленинград’ маркана маля ёнар’’ хасуюёнар’’ мат’’ ю’’ нябимдей похона аспирантурам’ ёльцевысь. Илеванда ямбан ӈокавна манзаравы не. Сямянд’ нерде ӈацембой тохолкода’ Саля’хардахана санаторно-лесной школахана воспитательӈэ’ таравысь, хануй’’ ӈацекы’’ няюв’ манзарась. Тикахад’ ненэця’ вада тохолкодаӈэ’ таняна таравысь. Хэвхы округхана танеда педучилищехэна вадам’ минрена тохолкодаӈэ’ маля понку’’ манзарабэй’’. Ямалкана манзарана’’ тохолкоди’’ тохолкода. Ханярина илена’’, теда тоходанна’’, ненэця’ вадам’ тохолабада’’ ӈацекы’’ Елена Сусой’ падвы учебник’’мана тоходана’’. Нянэй ненэця’ образование’ серт’ ӈока’’ ныхымда, теневанамда масьтевы.
Нянэй ненэця’’ культурам’, историям’, невхы’ илм’ теневанась. Тикы’ нямна вадада ханярина совы’’ ӈэсьты. Харта ӈод’ хынокад’ несь. Пыда сёмда ӈока’’ я’ тер’’ хибяри’’ намдурӈадось, «Сёётэй Ямал» ансамбльхана ӈока по’’ ямбан’ хыно’’ӈась. Ненэцие’ сём’ харвабтанась, теневанась. Хуркари’’ ӈарка’’ ма’’лёва’’ мальӈгана мэбець’ хэтвы’’ вадита’’ поӈгана сём’ ханасеты. Нянэй ненэця’ культурам’ тю’’у пэртясь. Манзараванда ямбан ненэцие’’ сё’’, лаханако’’ ма’’лабись. Нюртей ненэця’ вадавна падвы книгананда ненэцие’’ вадако’’, хобцоко’’ ма’’лавысь, тарця книгада самляӈг ю’’ тет’’ по’’ тяхана ӈадимясь. Тикы’ пуд падвы манзаида ӈани’’ таня’’. Леонид Васильевич Лапцуй вэсакодась, мэбета паднанась. Пыда пуданда хаёвы’’ манзараида Елена Григорьевна нядаӈговахана книгаӈэ’ ӈадимяць. Тэри’’ тарем’ ниць’ хаю’’.
Елена Григорьевна илеванда ямбан’ мэёвна илевы, мэёвна манзаравы. Сертавы манзаяда ӈока’’, пудана хаёвы’ сарпяда лата’’. Ханярина илена’’, Елена Григорьевна Сусойм’ теневана’’ хибяри’’ ихиня’ пыда пилибт’ илевнда.
