Сидя ю’’ самляӈг по’’ тяхана Всероссийский ассоциациява ӈадимясь. Таӈок по’’ ямбан толырто’ тянё ӈэрм яхана илена’’ ненэця’’ ӈобкана хуркари’’ серудо’ тасламби’’. Ассоциацияна ӈарка ма’’лёва Москва маркана тюку по’ ты’’ сие ниць ирийхана ваераӈгу. Тарця яляха’ хамякова’’ маля ханярина миӈа’’.

Маня’’ округхадана ӈод хибяри’’ хэванзь’ ятна, поӈгнандо тарця хибяри’’, хуний таӈок по’’ ямбан хари’’ яханандо’ ассоциацияхад’ перена манзаи’’ минре’’. Ты’’ сие ниць ирийхана яндахат’ товы’’ ненэця’’ сидя ю’’ нюртей яляхад сидя ю’’ маттамдэй’ толыр’’ ӈэсонд манзараӈгу. Ассоциация ма’’лёва поӈгана тамна тарця мероприятия’’ танеӈгу’’. «Кочевье Севера» нюбета фестиваль’ тарана’’, сё’’ мэта’’ коллектив’’ ма’’лаӈгу, тикахад ӈэрм’ тенз’ мэта паднана’’ ненэця’’ падвы манзаи’’ толаӈгова ваераӈгу. ВДНХ мат’’ ю’’ хасуюдимдей павильонхана сян яля ямбан «Сокровища Севера» международной выставка-ярмарка манзаямда минреӈгуда. Тюку по’ тарця ярмарка юдимдеймэвна манзараӈгу. Таняна мел’’ ненэця’’ манзаидо’ манэ’’лабтабаӈгу, мастер-класс’’ ваераӈгу, фотоконкурс танеӈгу’’.

Ты’’ ниць ирий’ сидя ю’’ няхарамдэй яляхана парламентские слушания танеӈгу’’, таняна ма’’лавы’’ ненэця’’ Россияна илена’’ толырто тянё хибяри’’ ваеравы ю’’ по’’ ямбан илевам’ таслабгу’’. Тикы яляхана тамна Всероссийский ассоциацияна Координационный Совет манзаямда минреӈгу.

Ӈани’ яляхана «Полярный стиль» нюбета фестиваль этнической моды ненэцие’’ ма’’лаӈгу, «Кочевье Севера» фестивалян’ товы’’ тарця ялян’ хамандавы’’ программыдо’ манэ’’лабтаӈгу. Всероссийский ассоциацияна сидя ю’’ самляӈг по’’ ямбан манзарава’ нямна ненэця’’ конференцияхана лаханаӈгуд’. Ты’’ ниць ирий сидя ю’’ самлязимдей толыркана ӈарка ныланава яля «Народы Севера приглашают друзей» яндахат’ товы’’ хибяри’’ ма’’лаӈгу, Ӈэрм ненэцие ӈавар’’ мирдапгу’’, мякнандо’ мядонди’’ ядтабгу’’, хынота’’, тарана ’’ манзаидо’ манэ’’лабтабаӈгу’’. Фестиваль’ манзаямда тюку ирийна сидя ю’’ маттамдэй яляхана ёльцеӈгуда’’. Тарця сер’’ товы ирийхана Москва маркана ваераӈгу’’.