Я’ сяр ниня’’ илена’’, хуркари’’ тенз’ мэта хибяри’’ харто’ лаханакудо’, вадакудо’ таня’’. Ханяӈы’’ вадако’ невхы похот’ товы’’, ханяӈы тандая’’ ӈадимы’’. Нянэй ненэця’’ поӈгана ӈод’ тарця. Нейко Янгасова илеванда ямбан ӈока лаханаком’ ма’’лавы, ханяӈыдо’ книган’ паклевы. Ӈопой тарця лаханаком’ теда толара’’.

Сидя не илевэхэ’. Ханахавади’ – ю’’ вандако. Сэвати’ ӈадимзь мяти’ мюня ян’ сидярихи’ ӈэвэхэ’. Тэди’ луца ю’’ ёнар’’. Тайкуна ӈахакуна тидянати’ мяд’’ таня’’.

Сяны’’ хунат’ илебати’ ӈод’’, нябакоюм’ есята ӈэвамда та’’нёмба пяда. Сепъя хавопида яля’ иняраха’. Ӈэва’’ямда та’’нёё’’махаданда няханда вахалъй’’: – Ӈэвамд ӈани’ есята та’’нёӈгав. –Ӈэвами нёр та’’нёй’’.

Нябакоюм’ яля’ ямбан’ сэкта: – Ӈэвамд та’’нёӈгав. Ся’’ны’ ӈэбта ӈод’’ нё’ няюв’ вэн’’ тёрейд’’. Тарем’ сырпа’’ни, ӈоб’’ ӈэдалёда. (Лаханаком’ мэтаӈэ нюдяюм’ не хая.Тад нерня’ пыда лаханаӈгу).

Сидя хаво’’ ний нойтанараха’’, сэр’’ саваканда пыв’ хо’’ма яӈгу. Ӈарка Хопляв тидя’’яв ӈэвы. Ханамда сяра мят’ тю. Ӈамгэ лахарёмда мале’’мяхаданда нябакоми хана. Нябакони хэ’’мяхад ялэ’’ ярӈадм’. Яртахани сэвани тыра’’. Ся’’ны’ ӈэбта ӈод’’ вэн’’ ӈани’ тёрейд’’. Пин’ сырадм’. Нюдя Хопляв тидями товы. Ханамда сяра мят’ нив’’ тю’’. Тидяв маси’’: – Нянан ту’’. – Мань нидм’ тут’’. Тидя’’ями си’’ми ня’’амара пя, тум’ сюрте си’’ми нёраку’’ла. Тарем’ си’’ми нёракутаханда пин’ тарпыв’’. Ӈарка’’я мя’’ми сюре’’ле пядм’. Ӈарка’’я мя’’ми мярыбаб’’ ӈаркаӈэсеты. Илаӈэ пясь тарода яӈговы. Луца’ ю’’ хурёдам’ сюре’’ле пяни’. Хурабава’ мальӈгана ӈока’’я ӈэсеты’’. Ӈока ты’’ни’ няюв варцятев. Тидя’’ями тамна си’’ми нёдаю Ӈока’’я тыни’ сюре’’ле пяни’, ма’’ламбаб’’ ӈока ӈэсеты’’, илаӈэ пясь –тародо’ яӈговы. Тикахавахад яркосавэй’ харасяда ян’ варцятев. Тидя’’ями си’’ми ня’’амварида хаи. Ӈаво’’ пирка’’на нерни’ няна хабэвку манэ’’ӈадм’. Ӈули’’ паромба поӈгандо сы’’уаяв’’. Хабэвкоӈэ пилибт’’ хаядм’. Та’ илелъяв’’.

Та’ малда.