Перевод на ненецкий язык

Округханана’’ забойной кампания’ манзаида ёльцевы. Ӈарка пэвдэй ирийхана СПК «Харп» тыбэртя’’ тэтнаць. Краснойхана хавадава’’ манзаидо’ миӈаць.

Ӈокханда юр’’ си’’ив ю’’ тонна’’ ты’ ӈамзам хамадаць. Тюку ялян’ хэтась, ӈамзидо’ мале Красной ӈэсы’ лавкахана мирдапидо. Ӈокаюв’ пеляда округна’’ еркы март’ тэвравы.

Ты хавадава’’ мальӈгана мань Красноян’ ӈэдалёрӈадамзь, ӈэсындо’ забойной пунктан’ тэворӈадамзь. Тикы яляхана нумда саць тецись, сата’ мерцясь. Тецьбата’ ӈод’’ забойхана манзарана’’ ты’’ хабарпава’’ манзаидо’ нидось нултамбю.

Таняна мэбнан’ маттадамдэй ӈэсы’ тер’’ манзаидо’ минрець. Лакамбой ныланаваханандо’ мань маттамдэй ӈэсы бригадир’ Тимофей Чупров няби кооперативандо’ председатель ӈуда’ ӈылы Василий Хатанзейской’ няюв лаханорӈадамзь.

– Тены’’ яляха’’на’’ ӈули’’ тэтнава’’, – вадамда Василий Егорович ханадась, – маттадамдэй ӈэсыхы тыбэртя’’ тыдо’ танаць. Тюкохона бригадандо’ нерм’ пэртя Тимофей Алексеевич Чупров манзара.

– Нумда ибарка ӈэбнанда саварка ӈэӈгусь, валакада тикы маня’’ нядана’’ ни’’ пере’’. Нумда хуркари ӈэбнанда’ ӈод’’ манзаина’’ нина’’ хаембю’’, – бригадир’ вадамда хана. – Тюкохона сидя ю’’ самляӈг хибяри’’ манзара’’, тикы’ хавна тыбэртя’’ нядаӈгу’’. Ӈарка каральхана сян’ ёнар’’ ты’’ – тикы маттамдэй бригада ты’’. Таӈок толыркад маня’’ сян’ ёнар’’ тым забоян’ яӈгреваць. Маня’’ ӈэсына’’ ты’’ поӈгана юхубэй – ӈани’’ ӈэсыхыт’ еримы’’ ты’’ тане, тарця ты’’ ӈани’’ яӈгрембина’’. Ма’’лаӈгуна’’, толаӈгуна’’, тикахад манзаина’’ ёльце’’ махадана’’ харто’ ӈэсыхыто’ тэвраӈгуна’’. Харто’ тыдо’ пэртя тюкохона манзара’’. Ханяӈыдо’ харто’ ӈамзадо’ ӈэӈгу, ханяӈыдо’ ӈамза’ комбинатан’ мирдатыдо’.

Тимофей Алексеевич хойхана манзаравидо’ ваде’’ӈась. Хурка тоенана’’ сер’’ хой’ илӈганандо’ танева’’ нямна хонравась. Тикы нямна тарем’ лахана.

– Тюкон’ тына’’ танабавана’’ мальӈгана мар’’ няӈэна тэри’’ тарем’ ядэрта’’ вэнеко’’ ӈока’’,тарця вэнеко’’ сидна’’ ядабтабсеты’’. Тына’’ вэнолтаби’’. Те’ ёльцяӈгана мал’ ӈэсы’’ тыдо’ танявна миӈа’’. Вэнеко’’ нид’, мар’’ ӈаркавна хаембива’’, сехэрыва тет ю’’ ӈэдалававна ӈарумдана. Забоян’ тэврамбада’’ тэхэ’’на’’ тарем’ ӈэбнанда’ ӈани’’ вэва. Ты’’ вэвдо’ юӈга, ӈамзидо’ ха’’мурна’’…

Тимофей Алексеевич Чупров – манзаямда теневана бригадир’, манзаямда сававна минрена. Нюдякоходанда хусувэй ӈамгэмда сававна пэрта ӈэвысь.

– Сян’ пыдами’ тенев’ пили’’ ты’’ хэвхана мэсетыдм’, – Тимофей писензь лахана. – Хойхана соядамзь, вадыдамзь, нисян’, небян’ хэвхана хари’’ явнана’’ пили’’ мюсернадамзь. Ӈацекы’’ ӈэвы пон’ сававна тенеян. Тарця юрбада ни ӈа’’. ӈацекэӈэ хойхана пили’’мэсетыдм’, ты’’ маниесетыдм’. Школами’ ёльце’’махадани таминда манзарась пявась. Армиян’ хэван нерцю няхарамдэй ӈэсына манзарамась, армияхад таня тодамзь. Тикахад маттамдэй ӈэсын’ еримядамзь, нисян’ бригадан, пыда бригадирӈэ тарась. Нисяв’, небяв’ илеванди ямбан’ тэхэ’’на’’ манзараӈаханзь. Нисяв’ Чупров Алексей Михайлович, «Харпхана» манзарась, бригадирӈэ ӈопой ӈэсына тет ю’’ по’’ ямбан тарась. Пыда нерцюнда ирив’ ӈэсым’ ня’’амбадась, пыда пуданда нисяв’ таня тось, пыда манзаямда хае’’мяхаданда мань маттамдэй ӈэсыва’’ ня’’амбив. Мань пудан’ хасава нюхуюн’ ӈэсыва’’ мэбнандо’ тарагу. Тарем’ нина’’ иле’’, манзара’’!